Maysa a mangidadaulo nga opisial iti sinagoga (nalabit idiay Capernaum) a ti kakaisuna nga anakna a babai pinagungar ni Jesus.​—Mt 9:18; Mr 5:22; Lu 8:41, 42.

 Iti maudi a paset ti 31 wenno nasapa a paset ti 32 K.P., naaddaan iti nakaro a sakit ti 12 ti tawenna a balasitang ni Jairo ken manamnama idin a matay. Ni Jairo sinapulna ni Jesus, nagruknoy iti sakaananna, ket nagpakaasi kenkuana nga umay ket agasanna ti balasitang sakbay a maladaw ti amin. Bayat nga iturturongna ni Jesus iti pagtaenganna, sigurado a naparegta unay ni Jairo iti nasaksianna a panangagas ni Jesus iti babai nga agpaspasar iti 12 a tawen a panagbulos ti dara. Ngem anian a makapaupay a maammuan kadagiti mensahero a natayen ti bukodna a balasitang! Nupay kasta, indagadag ni Jesus a saan nga agbuteng ni Jairo no di ket maaddaan iti pammati. Ni Jairo, ti asawana, ken ti tallo nga apostol kinuyogda ni Jesus a sumrek iti balay. Limmasatda iti tengnga dagiti naariwawa nga agan-anug-og a nanglais ken nanguyaw iti kinuna ni Jesus a matmaturog laeng ti ubing. Idin insubli ni Jesus ti biag ti balasitang. Kas mainanama, ni Jairo ken ti asawana “saanda a natngelan ti riknada buyogen ti dakkel a panagsiddaaw.”​—Mr 5:21-43; Mt 9:18-26; Lu 8:41-56.