Ti Griego a sao nga staʹsis, a kangrunaan a kaipapananna ti “sitatakder” (Heb 9:8), ket naaddaan iti kaipapanan nga “iyaadayo” wenno “iyaalsa.” (Mr 15:7; Lu 23:19, 25, Int) Mabalin met nga ipatarus a “di panagtutunos” (Ara 15:2), ken no dadduma ipasimudaagna ti kinaranggas.​—Ara 23:7, 10.

 Iti sidong ti linteg ti Roma, ti pannakiraman iti iyaalsa wenno panangisayangkat wenno pannakipaset iti derraaw ket basol a mapatawan iti dusa nga ipapatay. Gapuna, ti managilista iti siudad ipakpakdaarna idi nga agpegpeggad ti nagulo a bunggoy iti Efeso idi kinunana: “Pudno nga agpegpeggadtayo a mapabasol iti iyaalsa gapu iti pasamak ita nga aldaw, awan ti uray maysa a makagapu a mangipalubosto kadatayo nga irasonan daytoy nagulo a panagraragup.” (Ara 19:40) Iti saklang ti Romano a Gobernador Felix, ni Tertulo inakusaranna ni Pablo kas “mangparparnuay kadagiti iyaalsa iti tengnga dagiti amin a Judio.” Nakadagdagsen idi daytoy a pammabasol ta no mapaneknekan a kasta, nadusa koma ni Pablo iti ipapatay.​—Ara 24:5.