Maysa a disso iti asideg ti Gaza a nadakamat iti kaunaan a rekord dagiti beddeng ti teritoria ti Canaan. (Ge 10:19) Kadagiti naglabas, ti Gerar ket kadawyan a maikunkuna nga isu ti Tell Jemmeh (Tel Gamma), agarup 12 km (7.5 mi) iti abagatan ti agdama a Gaza. Ngem iti agdama, kunaen ti adu a geograpo nga isu dayta ti Tell Abu Hureirah (Tel Haror), a masarakan kadagiti turturod iti sakaanan ti bambantay ti Judea, agarup 19 km (12 mi) iti abagatan a daya ti agdama a Gaza. Nasarakan iti dayta a disso ti adu a ribak ti damili a patien nga addan idi tiempo dagiti patriarka. Nagtaeng ni Abraham iti apagbiit kas ganggannaet idiay Gerar ken kasta met ni Isaac idi agangay, ket nakilanglangenda iti arina a ni Abimelec (mabalin a dua a nagduma nga agturay nga addaan itoy a nagan wenno opisial a titulo).​—Ge 20:1-18; 21:22-34; 26:1-31; kitaenyo ti ABIMELEC Num. 1 ken 2.

 Kalpasan nga impagteng ni Jehova ti pannakaabak ti dakkel a buyot ni Zera nga Etiope, kinamat dagiti puersa ni Ari Asa ti agtaltalaw a kabusor agingga idiay Gerar. Kalpasan dayta, kinabil ken sinamsaman dagiti taga Juda “dagiti amin a siudad iti aglikmut ti Gerar” (nalabit gapu ta kaaliado ida dagiti Etiope); “kinabilda uray dagiti tolda nga addaan kadagiti dinguen iti kasta nangkautiboda kadagiti arban iti dakkel a bilang ken kamkamelio.”​—2Cr 14:8-15.

 Kunaen ti dadduma nga eskolar a mabaliwan koma iti “Gerar” ti mabasa iti 1 Cronicas 4:39, 40 imbes a “Gedor” (kas inaramid ti LXX). Daytoy a teksto inaigna ti Gedor iti maysa a rehion a sigud a nagnaedan dagiti Hamita ken addaan iti nasayaat a pagpaaraban, ket maitutop daytoy a deskripsion kadagiti panangtukoy ti Biblia iti lugar iti aglawlaw ti Gerar.