[Daga].

 Maysa kadagiti lima a siudad iti rehion ti “Nababa a Tanap ti Siddim” a nagnaedan dagiti Canaanita. (Ge 10:19; 14:1-3) Daytoy nababa a tanap, wenno ginget, nalabit adda iti asideg ti makin-abagatan nga ungto ti Asin a Baybay.

 Ti Adma ken ti arina a ni Sinab agraman dagiti kabangibangna a siudad ti Sodoma, Gomorra, Zeboiim, ken Bela (Zoar), ket naabak idi rimmaut ti uppat nga ar-ari iti daya. (Ge 14:8-11) Ipakita ti Deuteronomio 29:23 nga idi agangay nadadael ti Adma agraman ti Sodoma, Gomorra, ken Zeboiim idi pinagtudo ni Jehova iti apuy ken asupre iti dayta a lugar. (Ge 19:25) Iti Oseas 11:8 natukoy dayta, agraman ti Zeboiim, kas maysa a mamakdaar a pagarigan.

 Patien ti adu nga eskolar a dagiti sigud a disso ti Adma ken ti dadduma pay a “siudad ti Distrito” ket adda itan iti tukok ti dandanum ti Asin a Baybay. Nupay iti kallabes a tiempo, adda dagiti mangibaga a ti rebrebba dagiti siudad ket mabalin nga isu dagiti disso a naipataraigid kadagiti naapres a ginget iti daya ken abagatan a daya ti Natay a Baybay.​—Ge 13:12.