Implano ni Ismael a taga-Mexico a basaen ti intero a Biblia. Iti uneg ti makatawen, namindua a nabasana dayta, ngem idi agangay, saanen a makakita. Kalpasan ti sumagmamano a tawen, nakasarita isuna ni Ángel a maysa a Saksi ni Jehova. Imbaga ni Ángel ti maipapan kadagiti kari ti Dios. Kayat ni Ismael a maammuan  ti ad-adu pay, ngem imbagana, “Bulsekak; diak mabasa ti Biblia.”

Impasigurado ni Ángel, “Dika madanagan, suruanka nga agbasa iti Braille.”

“Ammom ti agbasa iti Braille?” insaludsod ni Ismael.

“Saan, ngem agsursurota a dua,” insungbat ni Ángel. Saan a patien ni Ismael nga aramidenna dayta para kenkuana. Ngem idi nagawid ni Ángel, nag-research no kasano ti agbasa iti Braille, ken nangaramid kadagiti letra a Braille iti cardboard. Kalpasanna, sinuruanna ni Ismael nga agbasa iti Braille. Di nagbayag, nasursuron ni Ismael ti alpabeto a Braille, nangrugin a makigimong, ken agbasbasan kadagiti publikasiontayo iti Braille. Adda itan uppat a bulsek nga iyad-adalan ni Ángel iti Biblia. Magusgustuanda nga iyestoria ti maipapan iti Paraiso a sadiay makakitadanto manen.

Insurat ti 14 anyos a sister nga aggigian idiay United States a ni Viannei: “Iti social studies a klasemi, relihion ti topiko ti substitute teacher-mi. Imbagana a mangibagakami kadagiti relihion, isu nga imbagak dagiti Saksi ni Jehova. Nagkakatawa dagiti kaklasek ket imbagada nga is-istorbuentay ida, nga awan ti sabali a maaramidtayo, ken ibelbellengda dagiti publikasiontayo. Madi met laeng ti imbaga ti titser maipapan kadatayo.

 “Isu nga inkararagko ken Jehova a tulongannak a mangasaba. Imbagak kadakuada a ditay mapmapan kadagiti balayda tapno mangistorbo. Imbes ketdi, mapmapantayo ta imbaonnatayo ni Jehova a mangted kadagiti makatulong a balakad iti Biblia. Imbagak a dida koma ibelbelleng dagiti publikasiontayo ta makatulong dagita a mangbalbaliw iti biagda tapno maisalakanda. Nagpadispensar ti titsermi, sa inkarina nga inton adda mapan a Saksi iti balayda, luktannan ti ruangan, dumngegen,  ken basaennan dagiti publikasiontayo. Diak idi patien nga aramidenna dayta.

“Kalpasan ti uppat a bulan, nakitak ti titser ket nasorpresaak ta makipagad-adalen. Kalpasan ti innem a bulan, binirbiroknak iti eskuelaan ket nagyaman ta kinasabaak. Diak pay ketdin nailasin ta nagpapukisen ken nagibarbas. Maysa itan a di bautisado nga agibumbunannag.”

Idi napan a tawen, impaayan dagiti Saksi ni Jehova idiay Brazil iti espesial nga atension ti naglawa a rehion ti Amazon. Adu kadagiti aggigian sadiay ti saan pay a nakaskasabaan. Gapu iti dayta, inaprobaran ti Bagi a Manarawidwid ti makatawen nga espesial a kampania a panangasaba tapno madanon ti rinibu a tattao nga aggigian kadagiti karirigatan a madanon a lugar iti Amazon.

Nangpili ti sanga nga opisina iti 53 nga ili, nga adda iti agsasanga a karayan ti Amazon, a papanan dagiti agibumbunannag bayat ti kampania. Iti uneg laeng ti uppat a bulan, nasurok nga 6,500 a kakabsat ti nagboluntario.

Sangapulo ket maysa nga aldaw a nagyan ti 10 a kakabsat iti adayo nga ili ti Anamã. Awan ti agibumbunannag sadiay. Nakaipaima dagiti kakabsat iti nasurok a 12,500 a literatura ken nakairugida iti agarup 200 a panangyadal iti Biblia, a maitultuloy ita babaen iti telepono. Nangyurnosda met kadagiti gimong bayat ti kaaddada sadiay. Iti maudi a gimong sakbay a pumanawda, naragsakanda ta 90 ti immatender. Makitanto pay laeng ti dakdakkel nga epekto ti kampania.

Innem a tawenen nga agkaklase da Jehizel ken Mariana iti maysa nga eskuelaan idiay Venezuela. Gapu ta maysa a Saksi ni Jehova ni Jehizel, masansan nga uy-uyawen ni Mariana. Para ken Mariana, saan nga ammo ni Jehizel ti ag-enjoy. Maysa nga aldaw, kalpasan nga inuy-uyaw ni Mariana, imbaga ni Jehizel: “Mariana, kitaem ti website-mi a jw.org. Mapanka iti ‘Agbirok iti Video,’ sa i-click-mo ti kahon a ‘Tin-edyer.’”

 Kamalmanna, tinawagan ni Mariana ni Jehizel. “Maawatankan,” imbagana.

Saan nga ammo ni Jehizel ti kayatna a sawen isu nga insaludsodna, “Uyawennak kadi manen?”

“Saan, dikan uy-uyawen,” insungbatna. “Gapu kenka, maawatak itan a ti gayam makagapu kadagiti problemak ket dagiti aramid a pagarupko idi a mangparparagsak kaniak.” Nairugi a nayadalan ni Mariana iti Biblia, ket umat-atenderen iti amin a gimong.

Agtrabtrabaho ni Gérole kas sekretaria iti simbaanda idiay Haiti. Maysa nga aldaw, nagbilib idi nasungbatan  dagiti Saksi manipud iti Biblia ti amin a saludsodna. Nakipagadal ni Gérole ken ti balasangna iti Biblia. Natukay ti pusoda iti maad-adalda isu nga indawatda a mayadalanda iti mamindua iti kada lawas.

Kalpasan ti tallo a bulan a panagadalna, immasideg ni Gérole iti pastor ti simbaanda ket insaludsodna: “Kaano a naitrono ni Jesus kas Ari? Papanan dagiti nasingpet a tattao no matayda? Papanan dagiti dakes a tattao no matayda? Nakailansaan ni Jesus, iti krus wenno iti maysa laeng a kayo?” Imbaga ti pastor a masungbatanna laeng ti maikadua ken maikatlo a saludsod. “Ibagbaga dagiti Saksi ni Jehova a 144,000 ti mapan idiay langit,” kinunana. “Ngem mamatiak nga amin a mangar-aramid iti pagayatan ti Dios ket mapan idiay langit. Agnanayon met a mapuoran dagiti dakes a tattao iti impierno.” Idi nagdamag ni Gérole kadagiti teksto a pammaneknekna, awan ti maibagana. Nadismaya ni Gérole ngem ad-adda a nagbalin a determinado a mangituloy iti panagadalna iti Biblia. Immikkat iti simbaan ket imbagana nga ad-adu ti naammuanna iti Biblia iti tallo a bulan a pannakipagadalna kadagiti Saksi ni Jehova ngem iti nasurok a 30 a tawen a pannakimismisana. Nabiit pay a nabautisaran ni Gérole ken ti balasangna, ket nakairugidan iti 23 a panangyadal iti Biblia iti purokda.