Mapan iti linaonna

Mapan iti listaan dagiti linaonna

 DAGITI TAMPOK ITI NAPALABAS A TAWEN

2016 Legal Report

2016 Legal Report

Bayat a mailablaban ti kalintegantayo kadagiti korte ken maipaspasango dagiti kakabsat iti naririgat a kasasaad, pampaneknekanda ti kinasungdoda ken Jehova a Dios. Maparegtatayo a mangtulad iti pammatida ken agtalektayo a “ni Jehova sigurado nga ilasinnanto [wenno, tratuennanto iti espesial a pamay-an] daydiay nasungdona.”—Sal. 4:3.

ARGENTINA | Kalintegan a Mangisuro Kadagiti Annak Maipapan iti Relihion

Dimmakkel ni Ruth iti pamilia a Saksi ngem nagbalin a di aktibo idi agtutubo pay laeng. Idi agangay, nakirelasion iti maysa a lalaki ket naaddaan iti anak a babai. Maysa nga aldaw, iti siudad ti La Plata, nakitana dagiti Saksi ni Jehova a mangaskasaba babaen iti literature display table ket nalagipna ti relihion a dimmakkelanna. Natignay nga agsubli iti kongregasion ket inrugina nga inyadalan iti Biblia ti balasitangna. Busbusoren ti ama ti ubing dagiti narelihiosuan nga aktibidad ni Ruth. Indarumna ni Ruth tapno lapdanna a mangisuro iti Biblia iti balasitangda wenno mangitugot kenkuana iti gimong.

Imbaga ti abogado ni Ruth nga agpada nga adda kalintegan dagiti nagannak a mangisuro iti anakda iti maipapan iti relihion ken saan a mabalin a makibiang ti korte malaksid no adda prueba a pagdaksan dayta ti ubing. Nagdesision ti korte a masapul a respetuen dagiti nagannak ti kalintegan ti ubing a mangpili iti relihion a kayatna. Ngem gapu ta uppat laeng ti tawen ti ubing, nagapelar ni Ruth tapno malawlawagan ti desision. Inlawlawag ti court of appeal nga agpada ti kalintegan dagiti nagannak a mangisuro iti ubing maipapan iti relihion.

Basbasaen ti balasitang ni Ruth ti Bibliana kada rabii ken makigimgimongen a kadua ni nanangna. Magagaran met a bumisita iti Bethel idiay Buenos Aires.

 AZERBAIJAN | Kalintegan a Mangiranud iti Patpatien

Napaliiw ni apostol Pablo nga iti pudno a kongregasion Kristiano, “no ti maysa a kameng agsagaba, amin dagiti dadduma a kameng agsagabada a mairaman iti dayta.” (1 Cor. 12:26) Kasta a kasta ti napasamak idi nakisimpatia dagiti Saksi ni Jehova iti intero a lubong iti panagsagaba da Irina Zakharchenko ken Valida Jabrayilova idiay Azerbaijan. Idi Pebrero 2015, naakusaranda iti illegal a narelihiosuan nga aktibidad. Impaibalud ida ti hues sakbay ti pannakabistada, ken gapu ta naitantantan ti pannakabistada, dandani makatawen a naibaludda. Saan a nasayaat ti pannakatratoda ken saanda a napalubosan a mabisita, matawagan, ken dadduma pay.

Azerbaijan: Da Valida Jabrayilova ken Irina Zakharchenko

Idi nausig met laengen ti kasoda idi Enero 2016, nagdesision ti hues a nakabasol ti dua a sister ket pinagmultana ida. Ngem saanna idan a pinagbayad gapu ta naibaludda sakbay ti pannakabistada. Kalpasanna, pinalubosanna idan. Nagapelarda iti Baku Court of Appeal ngem imbasura dayta ti korte isu a nagapelarda iti Korte Suprema. Nangisubmitirda met kadagiti reklamo iti UN Human Rights Committee gapu iti saan a nasayaat a pannakatratoda ken gapu ta saan a nabigbig ti kalinteganda a mangiranud kadagiti patpatienda.

Kabayatanna, ikagkagumaan ti dua a sister a bumangon iti napasaranda a rigat. Agyamyamanda unay iti panangisakit ken iti adu a kararag dagiti kakabsat para kadakuada. Insurat  ni Sister Jabrayilova iti Bagi a Manarawidwid: “Nakatulong dagiti karkararagyo tapno maibturanmi dagiti pakarigatan, ken talaga a nariknak dayta. Diakto pulos malipatan ti ayat ken pannakaseknan nga impakitayo, impakita ni Jehova, ken dagiti kakabsat iti intero a lubong.”

ERITREA | Naibaludda Gapu iti Pammatida

Idi Hulio 2016, addan 55 a Saksi ni Jehova idiay Eritrea nga imbalud ti gobierno gapu iti pammatida. Sipud pay idi Septiembre 1994, nakabaluden da Paulos Eyassu, Isaac Mogos, ken Negede Teklemariam, ken adda pay 9 a kakabsat a nakabalud iti saan a nababbaba ngem 10 a tawen.

Nupay kasta, adda nasayaat a napasamak idi Enero 2016. Inusig ti korte ti kaso dagiti Saksi a naaresto bayat ti Memorial idiay Asmara idi Abril 2014. Dayta ti kaunaan a gundaway a pormal nga indarum dagiti autoridad dagiti Saksi iti maysa a “krimen” ket inikkanda ida iti gundaway a mangidepensa iti bagida. Kas ninamnama, nagdesision ti korte a kaaduan kadagiti naaresto ket nakabasol gapu ta immatenderda iti “illegal” a gimong. Napagmultada sa nawayawayaanda. Nupay kasta, saan a nagbayad ti maysa kadagiti akusado a ni Saron Gebru gapu ta saan nga ipalubos ti konsiensiana. Gapuna, nasentensiaan a maibalud iti innem a bulan. Naipalubos a mabisita ni Sister Gebru iti maminsan iti kada lawas, ken imbagana a nasayaat ti pannakatratona. Agyamyaman ni Sister Gebru ken ti 54 a kakabsat nga adda iti pagbaludan kadagiti karkararagtayo para kadakuada bayat a ‘sipapanunottayo kadagidiay sipaparaut iti pagbaludan a kasla naparautantayo a nairaman kadakuada.’—Heb. 13:3.

GERMANY | Wayawaya ti Relihion—Legal a Pannakabigbig

Idi Disiembre 21, 2015, impalubos met laengen ti estado ti Bremen, iti makin-amianan a laud ti Germany, a maikkan ti Religious Association of Jehovah’s Witnesses idiay Germany iti legal nga estado a nangatngato ngem iti dati. Resulta dayta ti  uppat a tawen a panangilaban dagiti kakabsat iti kalinteganda kadagiti korte idiay Germany. Idi nangipaulog iti desision ti Higher Administrative Court idiay Berlin, kaaduan kadagiti 16 nga estado idiay Germany ti nangted kadagiti Saksi ni Jehova iti nangatngato a legal nga estado, a naawagan iti public law status. Nupay kasta, nagdesision dagiti opisial iti Bremen a saan a maited dayta kadagiti Saksi, kangrunaanna a gapu kadagiti ulbod nga akusasion dagiti bumusbusor.

Idi 2015, nagdesision ti Federal Constitutional Court ti Germany a ti inaramid ti Bremen ket panangsalungasing iti kalintegan dagiti Saksi sigun iti konstitusion. Paneknekan ti desision a ti wayawaya ti relihion nga ipapaay ti konstitusion protektaranna ti kalintegan dagiti Saksi ni Jehova a mangaramid kadagiti narelihiosuan nga aktibidadda idiay Bremen. Naikkan dagiti kongregasion sadiay iti kalintegan a saan nga agbayad iti buis ken iti dadduma pay a probision a kas iti maipapaay kadagiti kangrunaan a relihion idiay Germany.

KYRGYZSTAN | Kalintegan a Mangiranud iti Patpatien

Idi Marso 2013, nagimbento dagiti autoridad idiay Osh, Kyrgyzstan, iti ebidensia tapno maidarum ni Oksana Koriakina ken ti nanangna a ni Nadezhda Sergienko. Inakusaran ti prosekiutor ti dua a sister a luklukuenda dagiti kaarrubada bayat nga ipakpakaammoda ti isursuro ti Biblia, ket sinentensiaan ida ti hues a maibalud iti balayda bayat a nakapila ti kasoda. Idi Oktubre 2014, natakuatan ti korte a naimbento laeng ti ebidensia, saan a nasurot ti umiso a proseso, ken inosente ti dua a sister. Sinuportaran ti nangatngato a korte dayta a desision idi Oktubre 2015.

Nupay kasta, nagapelar ti city prosecutor ti Osh iti Korte Suprema ti Kyrgyzstan. Kinanselar ti Korte ti pannakaabsuelto ti dua a sister ken nagdesisionda a maluktan manen ti kaso. Idi nadengngeg ti kaso idi Abril 2016, dagiti abogado a mangireprepresentar iti dua a sister imbagada a rumbeng a maisardeng dayta gapu ta nagpason ti tiempo nga inkeddeng ti linteg  a mabalin a mausig manen ti kaso. Awanen ti maaramidan ti hues—pinasardengna ti pannakausig ti kaso ket naserraanen dayta.

Nagtalinaed a positibo dagiti sister bayat dagita a pakarigatan. Imbaga ni Sister Sergienko, “Kaaduanna a makapungtot ti maysa no saan a nasayaat ti pannakatratona, ngem nariknak ti ayat ken pannakaseknan ni Jehova babaen kadagiti kakabsat—saankam a pulos nabaybay-an.” Nakita a mismo dagiti sister a tungtungpalen ni Jehova ti karina iti Isaias 41:10: “Dika agbuteng . . . Itultuloykanto nga iggaman a siiirut babaen ti bukodko a makannawan nga ima ti kinalinteg.”

KYRGYZSTAN | Wayawaya ti Relihion—Legal a Pannakabigbig

Idi Agosto 9, 2015, aggimgimong ti maysa a kongregasion iti siudad ti Osh, Kyrgyzstan, idi bigla a simrek ti 10 a polis. Imbagada a masapul nga isardengda ti “illegal” a gimong ken impangtada pay a paltoganda ti nasurok nga 40 nga immatender. Impan dagiti polis ti 10 a kakabsat iti presinto. Siam kadakuada ti minaltrato ken kinabkabil dagiti polis sada pinagawid. Kalpasan ti dua nga aldaw, inaresto dagiti polis ti maysa kadagiti kakabsat a nakabkabil a ni Nurlan Usupbaev, ket inakusaranda iti illegal a narelihiosuan nga aktibidad gapu iti panangidaulona iti gimong.

Idi nausig ti kaso ni Brother Usupbaev iti Osh City Court, napaneknekan ti hues nga awan ti nakaibatayan ti darum ket imbasurana ti kaso. Nagapelar ti prosekiutor iti Osh Regional Court ngem imbasura dayta ti korte. Paneknekan dayta a saan a mabalin a makasuan ni Brother Usupbaev iti illegal a narelihiosuan nga aktibidad gapu ta legal a nairehistro dagiti Saksi ni Jehova idiay Kyrgyzstan.

Saan a nagsardeng ti prosekiutor ket nagapelar iti Korte Suprema ti Kyrgyzstan. Nabang-aran ni Brother Usupbaev idi inserra ti Korte Suprema ti kaso idi Marso 2016, a nangsuporta iti desision dagiti nababbaba a korte ken nangpatalged manen  iti kalintegan dagiti Saksi ni Jehova a mangangay kadagiti gimong idiay Kyrgyzstan. Nakapila iti korte ti darum dagiti biktima kontra kadagiti polis idiay Osh.

RUSSIA | Wayawaya ti Relihion

Agtultuloy latta ti panangbusor ti gobierno ti Russia kadagiti Saksi ni Jehova ken kadagiti narelihiosuan nga aktibidadda uray no konkontraen dayta dagiti eksperto iti kalintegan ti tao. Iti kaudian a report, 88 a publikasiontayo ti indeklaran dagiti autoridad kas “extremist” ken imparitda ti opisial a website-tayo a jw.org. Idi 2015, saan nga impalubos dagiti opisial a  maiserrek iti Russia ti Baro a Lubong a Patarus ti Nasantuan a Kasuratan, ken ad-adalen ti maysa a korte idiay Vyborg no maibilang dayta kas “extremist.” Idi Marso 2016, impangta ti Prosecutor General’s Office a maiserra ti sanga nga opisina dagiti Saksi ni Jehova idiay Solnechnoye, nga adda iti ruar ti St. Petersburg, gapu iti maipagarup nga “extremist nga aktibidad.”

Nupay nakaro ti panangbusor ti gobierno kadagiti Saksi ni Jehova, adda latta naimbag a damag. Idi Oktubre 2015, nangyuli ti maysa a prosekiutor iti kaso tapno maiserra ti Local Religious Organization (LRO) idiay Tyumen, nga adda iti agarup 2,100 a kilometro iti daya ti Moscow. Uray no adda prueba a nagimbento laeng dagiti polis iti ebidensia kontra kadagiti Saksi, nagdesision ti Tyumen Regional Court a nakabasol ti Tyumen LRO. Ngem idi Abril 15, 2016, binaliktad ti Supreme Court of the Russian Federation ti desision ti nababbaba a korte. Imbaga ti korte nga “awan ti pakaibatayan ti pannakaiserra ti LRO dagiti Saksi ni Jehova iti Siudad ti Tyumen.” Idi imbasa ti hues ti desision, naragsakan a timmakder ti 60 a kakabsat nga adda iti korte.

 Determinado ti ili ni Jehova idiay Russia nga agtultuloy nga agdaydayaw kenkuana ‘aniaman nga igam a mabukel maibusor kadakuada.’—Isa. 54:17.

RWANDA | Kalintegan iti Edukasion nga Awan ti Panangidumduma iti Relihion

Iti nabiit pay a tawtawen, naikkat iti eskuelaan dagiti ubbing a Saksi idiay Rwanda gapu ta saanda a kayat ti makipaset kadagiti narelihiosuan wenno nasionalistiko nga aktibidad. Tapno masolbar ti problema, nangipaulog ti gobierno iti bilin idi Disiembre 14, 2015 a nairanta a mangikkat iti panangidumduma iti relihion kadagiti eskuelaan. Sigun iti dayta a bilin, masapul a respetuen dagiti eskuelaan ti wayawaya dagiti estudiante iti panagdayaw.

Idi Hunio 9, 2016, nairuar iti seksion a Newsroom ti jw.org ti artikulo a “Rwanda Acts to Counter Religious Discrimination in Schools.” Makapainteres ta in-repost dayta ti maysa a sikat nga online a newspaper idiay Rwanda. Di nagbayag, naaddaan ti website ti newspaper iti nasurok a 3,000 a hits, ken adu ti nangi-post kadagiti positibo a komento maipapan iti inaramid ti gobierno. Agyamyaman dagiti Saksi idiay Rwanda iti naipaulog a bilin a mangipasigurado a makapagadal dagiti annakda nga awan ti panangidumduma iti relihion.

Rwanda: Nagsublida iti eskuelaan

SOUTH KOREA | Kalintegan a Mangsurot iti Konsiensia—Panagkedked nga Agsoldado

Iti napalabas a nasurok nga 60 a tawen, naipasango dagiti brother nga agtawen iti 19 agingga iti 35 idiay South Korea iti isyu maipapan iti panagsoldado. Saan a bigbigbigen ti gobierno ti South Korea ti kalinteganda nga agkedked nga agsoldado gapu iti konsiensia ken awan ti ipapaayda a serbisio a kasukat ti panagsoldado. Adda dagiti pamilia a Saksi a napadasan ti lolo, ama, ken anak ti maibalud gapu ta saanda a kayat ti agsoldado.

 Naminduan a nagdesision ti Constitutional Court a ti Military Service Law ket maitunos iti konstitusion, ngem dagiti nababbaba a korte ken dagiti naibalud gapu iti dayta a linteg indatagda manen ti isyu iti Constitutional Court. Kas resultana, idi Hulio 9, 2015, dinengngeg ti Korte dagiti argumento dagiti nangirepresentar kadagiti nagkedked nga agsoldado. Naibalud ni Brother Min-hwan Kim iti 18 a bulan gapu ta saan nga ipalubos ti konsiensiana a masanay iti militar. Imbagana: “Naibaludak ken nawayawayaanak. Ngem saan koman a maibalud ti dadduma pay nga agkedked nga agsoldado gapu iti konsiensiada. No mapalubosanda a mangaramid iti alternatibo a serbisio, makatulongda iti komunidad.” Dandanin iyanunsio ti Constitutional Court ti desisionna.

TURKMENISTAN | Bahram Hemdemov

Ni Brother Hemdemov nga agtawen iti 53 ket naasawaan ken addaan iti uppat nga annak. Naregta ken naespirituan a tao ni Brother Hemdemov ken maresrespeto iti komunidad. Idi Mayo 2015, nasentensiaan a maibalud iti uppat a tawen ken agtrabaho iti nadagsen gapu iti panangidaulona iti “illegal” a gimong iti balayna. Nakarigrigat ti kasasaad iti nakaipananna a pagbaludan iti ili ti Seydi. Namin-adu a napagsaludsodan ken kinabkabil dagiti autoridad. Nupay kasta, nagtalinaed a matalek ken Jehova a Dios, a kas iti pamiliana. Napalubosan ti asawana a ni Gulzira a sagpaminsan a mangbisita kenkuana tapno paregtaenna.

Ikarkararagantayo dagiti adipen ni Jehova nga agtaltalinaed a nasungdo bayat a maipaspasangoda kadagiti pakarigatan. Gapu iti ulidanda, matignaytayo met a mangpalagda iti kinasungdotayo iti Dios, nga agtaltalektayo iti karina iti Salmo 37:28: “Saannanto a panawan dagidiay nasungdona.”