Roma 6:1-23
6 Iti kasta, anianto ti kunaentayo? Agtultuloytayo aya iti basol, tapno umadu ti di kaikarian a kinamanangngaasi?+
2 Saan koma a pulos mapasamak dayta! Yantangay nataytayo no maipapan iti basol,+ kasano nga agtultuloytayo nga agbiag pay laeng iti dayta?+
3 Wenno dikay aya ammo a datayo amin a nabautisaran ken Kristo Jesus+ nabautisaran iti ipapatayna?+
4 Gapuna naitabontayo+ a naikanunong kenkuana babaen ti pannakabautisartayo iti ipapatayna, tapno iti kasta, no kasano a ni Kristo naibangon manipud kadagiti natay babaen ti dayag ti Ama,+ kasta met a magnatayo koma iti kinabaro ti biag.+
5 Ta no naikaykaysatayo kenkuana iti kaasping ti ipapatayna,+ sigurado a maikaykaysatayto met kenkuana iti kaasping ti panagungarna;+
6 agsipud ta ammotayo a ti daan a personalidadtayo nailansa a naikanunong kenkuana,+ tapno ti managbasol a bagitayo mapagbalin koma a di aktibo,+ tapno saantayon nga agtultuloy nga agpaadipen iti basol.+
7 Ta ti natayen naluk-atanen iti basolna.+
8 Mainayon pay, no nataytayo a naikanunong ken Kristo, patientayo nga agbiagtayto met a maikanunong kenkuana.+
9 Ta ammotayo a ni Kristo, ita ta naibangonen manipud kadagiti natay,+ saanen a matay;+ ti ipapatay saanen nga agturay kenkuana.
10 Ta ti ipapatay a nakatayanna, nakatayanna a namimpinsanen no mainaig iti basol;+ ngem ti biag a pagbiaganna, pagbiaganna no mainaig iti Dios.+
11 Kasta met dakayo: ibilangyo ti bagbagiyo a pudno a natay+ no mainaig iti basol ngem sibibiag+ no mainaig iti Dios babaen ken Kristo Jesus.
12 Gapuna dikay palubosan ti basol nga agtultuloy nga agturay kas ari+ iti mortal a bagbagiyo tapno agtulnogkayo koma kadagiti derrepda.+
13 Dikay met itultuloy nga iparang dagiti kamengyo iti basol+ kas ig-igam ti kinakillo,+ no di ket iparangyo ti bagbagiyo iti Dios a kas dagidiay sibibiag+ manipud kadagiti natay, kasta met dagiti kamengyo iti Dios kas ig-igam+ ti kinalinteg.
14 Ta ti basol masapul a di agturay kadakayo, yantangay awankayo iti sidong ti linteg+ no di ket iti sidong ti di kaikarian a kinamanangngaasi.+
15 Ania ti sumaruno? Agaramidtayo aya iti basol gapu ta awantayo iti sidong ti linteg+ no di ket iti sidong ti di kaikarian a kinamanangngaasi?+ Saan koma a pulos mapasamak dayta!
16 Dikay aya ammo a no itultuloyyo nga iparang ti bagbagiyo iti asinoman kas ad-adipen tapno agtulnog kenkuana, ad-adipennakayo agsipud ta agtulnogkayo kenkuana,+ uray iti basol+ maipaay iti ipapatay+ wenno iti kinatulnog+ maipaay iti kinalinteg?+
17 Ngem pagyamanan iti Dios ta ad-adipennakayo idi ti basol ngem nagbalinkayo a natulnog manipud iti puso iti dayta a kita ti sursuro a nakayawatanyo.+
18 Wen, yantangay nawayawayaankayo+ iti basol, nagbalinkayo nga ad-adipen+ iti kinalinteg.+
19 Agsasaoak iti natauan a panagsao gapu iti kinakapuy ti lasagyo:+ ta no kasano nga imparangyo dagiti kamengyo+ kas ad-adipen iti kinarugit+ ken kinakillo a maipaay iti kinakillo, kasta met nga ita iparangyo dagiti kamengyo kas ad-adipen ti kinalinteg a maipaay iti kinasanto.+
20 Ta idi ad-adipennakayo ti basol,+ siwayawayakayo no maipapan iti kinalinteg.
21 Ania, ngarud, ti bunga+ nga adda idi kadakayo iti dayta a tiempo? Bambanag+ nga ibainyo itan. Ta ti panungpalan dagidiay a bambanag ket ipapatay.+
22 Nupay kasta, ita, agsipud ta nawayawayaankayon iti basol ngem nagbalinkayo nga ad-adipen ti Dios,+ aw-awatenyon ti bungayo+ no maipapan iti kinasanto, ket ti panungpalanna agnanayon a biag.+
23 Ta dagiti isupapak ti basol isu ti ipapatay,+ ngem ti sagut+ nga ipaay ti Dios isu ti agnanayon a biag+ babaen ken Kristo Jesus nga Apotayo.+
