Levitico 24:1-23
24 Ket ni Jehova nagsao ken Moises, a kunkunana:
2 “Bilinem ti annak ti Israel nga iyalaandaka iti puro, nadingpil a lana ti olibo a maipaay iti silaw,+ tapno panggangat a patinayon iti pagsilawan.+
3 Iti ruar ti kortina ti Pammaneknek iti tolda ti gimong rebbeng a patinayon nga urnosen dayta ni Aaron manipud rabii agingga iti bigat iti sanguanan ni Jehova. Paglintegan dayta agingga iti tiempo a di nakedngan bayat dagiti kaputotanyo.
4 Iti pagsaadan ti silaw+ a puro a balitok rebbeng nga urnosenna a patinayon dagiti pagsilawan+ iti sanguanan ni Jehova.+
5 “Ket masapul a mangalaka iti nasayaat nga arina ket lutuem a pagbalinen a sangapulo ket dua a nagtimbukel a tinapay. Dua nga apagkapullo ti maysa nga efa ti rebbeng a maipaay iti tunggal nagtimbukel a tinapay.
6 Ket masapul nga ikabilmo ida kas dua a nagsina a katuon, innem iti tunggal katuon,+ iti rabaw ti lamisaan a puro a balitok iti sanguanan ni Jehova.+
7 Ket masapul a mangikabilka iti puro nga olibano iti rabaw ti tunggal katuon, ket masapul nga agserbi kas tinapay a mangipalagip,+ maysa a naipuor a daton ken Jehova.
8 Iti maysa nga aldaw ti sabbath kalpasan ti sabali rebbeng nga urnosenna dayta a patinayon iti sanguanan ni Jehova.+ Tulag dayta iti annak ti Israel agingga iti tiempo a di nakedngan.
9 Ket masapul nga agbalin a kukua ni Aaron ken ti annakna,+ ket masapul a kanenda iti maysa a nasantuan a disso,+ agsipud ta kasasantuan a banag dayta maipaay kenkuana manipud kadagiti naipuor a daton ni Jehova, kas alagaden agingga iti tiempo a di nakedngan.”
10 Ita ti anak ti maysa a babai nga Israelita, a, nupay kasta, anak ti maysa a lalaki nga Egipcio,+ rimmuar a napan iti tengnga ti annak ti Israel, ket ti anak ti Israelita a babai ken ti maysa a lalaki nga Israelita nangrugida nga agdangadang+ iti pakarso.
11 Ket ti anak ti babai nga Israelita rinugianna a tabbaawan ti Nagan+ ken pagbassawangan dayta.+ Gapuna isu impanda ken Moises.+ Kabayatanna, Selomit ti nagan ti inana, ti anak ni Dibri iti tribu ni Dan.
12 Kalpasanna inyawatda iti pannakaipupok+ agingga nga adda nalawag a deklarasion kadakuada sigun iti sasao ni Jehova.+
13 Ket ni Jehova nagsao ken Moises, a kunkunana:
14 “Daydiay nagbassawang ipanmo iti ruar ti pakarso;+ ket amin dagidiay nakangngeg kenkuana masapul nga ipatayda dagiti imada+ iti ulona, ket ti intero a gimong masapul nga isu uborenda iti batbato.+
15 Ket rebbeng nga agsaoka iti annak ti Israel, a kunaem, ‘No kas pagarigan ti asinoman a tao pagbassawanganna ti Diosna, masapul ngarud a manungsungbat iti basolna.
16 Gapuna ti mangbassawang iti nagan ni Jehova rebbeng a mapapatay a di bumurong.+ Ti intero a gimong rebbeng nga isu uborenda iti batbato. Ti ganggannaet nga agnanaed kas met laeng iti katutubo rebbeng a mapapatay iti panangbassawangna iti Nagan.+
17 “‘Ket no kas pagarigan ti maysa a tao makabilna a mapapatay ti asinoman a kararua ti tao, rebbeng a mapapatay a di bumurong.+
18 Ket ti mangkabil a mangpapatay iti kararua ti naamo nga animal rebbeng a subadanna dayta, kararua iti kararua.+
19 Ket no kas pagarigan ti maysa a tao mangparnuay ti pilaw iti katimpuyogna, ngarud kas iti inaramidna, kasta ti rebbeng a maaramid kenkuana.+
20 Dunor iti dunor, mata iti mata, ngipen iti ngipen; ti isu met laeng a kita ti pilaw a maparnuayna iti tao, dayta ti rebbeng a maparnuay kenkuana.+
21 Ket ti mangkabil a mangpapatay iti maysa nga animal+ rebbeng a subadanna+ dayta, ngem ti mangkabil a mangpapatay iti maysa a tao rebbeng a mapapatay.+
22 “‘Maymaysa a hudisial a pangngeddeng ti rebbeng nga agtultuloy nga agpaay kadakayo. Ti ganggannaet nga agnanaed rebbeng a kas met laeng iti katutubo,+ agsipud ta siak ni Jehova a Diosyo.’”+
23 Kalpasan dayta nagsao ni Moises iti annak ti Israel, ket daydiay nagbassawang impanda iti ruar ti pakarso, ket inuborda iti batbato.+ Iti kasta ti annak ti Israel inaramidda kas iti imbilin ni Jehova ken Moises.
