Levitico 12:1-8
12 Ket intultuloy ni Jehova ti agsao ken Moises, a kunkunana:
2 “Agsaoka iti annak ti Israel, a kunaem, ‘No kas pagarigan ti maysa a babai mangyinaw iti bin-i+ ket mangipasngay iti maysa a lalaki, isu narugitto iti pito nga aldaw; kas iti al-aldaw ti kinarugit bayat ti panagkadawyanna isu narugitto.+
3 Ket iti maikawalo nga aldaw makugitto ti lasag ti makinsango a kudilna.+
4 Iti tallopulo ket tallo nga aldaw pay isu agtalinaedto iti dara ti panaggugor. Rebbeng a saanna a sagiden ti aniaman a nasantuan a banag, ket rebbeng a di sumrek iti nasantuan a disso agingga iti pannakatungpal ti al-aldaw ti panaggugorna.+
5 “‘Ita no mangipasngay iti babai, isu narugitto ngarud iti sangapulo ket uppat nga aldaw, kas iti kabayatan ti panagkadawyanna. Iti innem a pulo ket innem nga aldaw pay isu agtalinaedto iti dara ti panaggugor.
6 Kalpasanna iti panagngudo ti al-aldaw ti panaggugorna maipaay iti anak a lalaki wenno maipaay iti anak a babai isu mangipanto iti maysa nga urbon a kalakian a karnero a tumawenen a maipaay a daton a mapuoran+ ken maysa nga urbon nga atap a kalapati wenno maysa a pagaw+ a maipaay a daton gapu iti basol iti pagserkan ti tolda ti gimong iti padi.
7 Ket masapul nga idatagna dayta iti sanguanan ni Jehova ken mangaramid iti panangabbong maipaay kenkuana, ket isu nadalusto manipud iti ubbog ti darana.+ Daytoy ti linteg maipapan kenkuana a mangipasngay iti uray lalaki wenno babai.
8 Ngem no saan nga umdas ti kabaelanna maipaay iti maysa a karnero, masapul ngarud a mangala iti dua a pagaw wenno dua nga urbon nga atap a kalapati,+ maysa ti maipaay a daton a mapuoran ken maysa ti maipaay a daton gapu iti basol, ket ti padi masapul a mangaramid iti panangabbong+ maipaay kenkuana, ket isu nadalusto.’”
