Levitico 26:1-46
26 “‘Dikay iyaramidan ti bagbagiyo iti awanan pateg a didios,+ ket dikay ipasdekan ti bagbagiyo iti kinitikitan a ladawan+ wenno sagrado a munmon, ket dikay mangisaad iti bato kas maysa a rebulto+ iti dagayo tapno pagruknoyanyo;+ ta siak ni Jehova a Diosyo.
2 Rebbeng a salimetmetanyo dagiti sabbathko+ ken agtakderkayo a siaamak iti santuariok. Siak ni Jehova.
3 “‘No agtultuloykayo a magna kadagiti paglintegak ken mangsalimetmet kadagiti bilinko ket itungpalyo ida,+
4 sigurado nga ipaaykonto met dagiti dumayasadas a tudoyo iti umiso a tiempoda,+ ket pudno nga ipaayto ti daga ti bungana,+ ket ti kayo iti tay-ak ipaaynanto ti bungana.+
5 Ket ti panagirikyo sigurado a dumanonto iti panagburasyo iti ubas, ket ti panagburas iti ubas dumanonto iti panagimula iti bin-i; ket pudno nga agpennekkayto a mangan iti tinapayyo+ ken agnaedkayo a sitatalged iti dagayo.+
6 Ket mangikabilakto iti talna iti daga,+ ket pudno nga agiddakayto, nga awan asinoman a mamagpigerger kadakayo;+ ket pagpukawekto ti makadangran nga atap nga animal manipud iti daga,+ ket ti kampilan saanto a lumasat iti dagayo.+
7 Ket pudno unay a kamatenyonto dagiti kabusoryo,+ ket pudno a mapasagdanto iti sanguananyo babaen ti kampilan.
8 Ket ti lima kadakayo pudno unay a kamatendanto ti sangagasut, ket ti sangagasut kadakayo kamatendanto ti sangapulo a ribu, ket dagiti kabusoryo pudno a mapasagto iti sanguananyo babaen ti kampilan.+
9 “‘Ket bumaw-ingakto kadakayo+ ket pagbalinenkayo a nabunga ken paaduenkayo,+ ket itungpalkonto ti tulagko kadakayo.+
10 Ket sigurado a kanenyonto ti baak ti kallabes a tawen,+ ket iruaryonto ti baak nga umun-una ngem iti baro.
11 Ket sigurado nga ikabilkonto ti tabernakulok iti tengngayo,+ ket saannakayto a karurod ti kararuak.+
12 Ket pudno a magnaakto iti tengngayo ket agbalinak a Diosyo,+ ket dakayo, iti biangyo, agbalinkayto nga ilik.+
13 Siak ni Jehova a Diosyo, a nangiruar kadakayo manipud daga ti Egipto manipud panagannong kas ad-adipen kadakuada,+ ket tinukkolko dagiti barra ti sangolyo ken pinapagnakayo a sililinteg.+
14 “‘Nupay kasta, no saankayto nga umimdeng kaniak wenno saanyo nga aramiden amin dagitoy a bilin,+
15 ken no laksidenyonto dagiti paglintegak,+ ken no karurodto ti karkararuayo dagiti hudisial a pangngeddengko iti kasta saanyo nga aramiden amin a bilbilinko, agingga a salungasingenyo pay ti tulagko,+
16 ngarud, iti biangko, aramidekto kadakayo ti sumaganad, ket kas pannusa sigurado nga iyegkonto kadakayo ti pannakariribuk iti sarut+ ken nakabarbara a gurigor, a mamagkapuy kadagiti mata+ ken mamagutoy iti kararua.+ Ket imulayonto ti bin-iyo iti awan kapapay-anna laeng, ta sigurado nga ibusento dagiti kabusoryo.+
17 Ket pudno nga iturongkonto ti rupak maibusor kadakayo, ket sigurado a maabakkayto iti sanguanan dagiti kabusoryo;+ ket ibaddebaddekdakayto laeng dagidiay manggura kadakayo,+ ket pudno nga agtalawkayto idinto ta awan ti mangkamkamat kadakayo.+
18 “‘Nupay kasta, no agpapan pay kadagitoy a banag, saankayto nga umimdeng kaniak, dusaenkayto ngarud iti mamimpito ti kaaduna gapu kadagiti basolyo.+
19 Ket kasapulanto a burakek ti panagpannakkel ti pigsayo ket pagbalinek ti langityo a kasla landok+ ken ti dagayo a kasla gambang.
20 Ket mabusbosto ti bilegyo iti awan kapapay-anna laeng, ta ti dagayo saanto a mangipaay iti bungana,+ ket ti kayo iti daga saanto a mangipaay iti bungana.+
21 “‘Ngem no agtultuloykayo a magna a bumusor kaniak ket saanyo a kayat ti umimdeng kaniak, kasapulan ngarud a kabilenkayo iti mamimpito nga ad-adu pay maitunos kadagiti basolyo.+
22 Ket ibaonkonto iti tengngayo dagiti atap nga animal ti tay-ak,+ ket sigurado nga ulilaendakayto iti annak+ ken gessatenda dagiti naamo nga animalyo ken pabassitenda ti bilangyo, ket pudno a malangalangto dagiti dalanyo.+
23 “‘Nupay kasta, no babaen kadagitoy a banag dikay ipalubos nga ilintegkayo+ ket magnakayto latta a bumusor kaniak,
24 siak, wen, siak, kasapulan ngarud a magnaakto a bumusor kadakayo;+ ket siak, mismo a siak, kasapulanto a kabilenkayo iti mamimpito gapu kadagiti basolyo.+
25 Ket sigurado nga iyegkonto kadakayo ti kampilan a mangyeg iti pammales+ maipaay iti tulag;+ ket pudno nga aguurnongkayto kadagiti siudadyo, ket pudno unay a mangibaonakto iti angol iti tengngayo,+ ket mayawatkayto iti ima ti maysa a kabusor.+
26 Inton natukkolkon maipaay kadakayo dagiti ungkay nga iti aglikmutda naibitin dagiti nagtimbukel a tinapay,+ iti kasta pudno a sangapulo a babbai ti manglutonto iti tinapayyo iti maymaysa nga urno ket isublida ti tinapayyo a tinimbang;+ ket mangankayto ngem saankayto a mapnek.+
27 “‘Nupay kasta, no babaen iti daytoy saankayto nga umimdeng kaniak ket magnakayto latta a bumusor kaniak,+
28 kasapulanto ngarud a magnaak nga addaan nabara nga ibubusor kadakayo,+ ket siak, wen, siak, kasapulanto a dusaenkayo iti mamimpito gapu kadagiti basolyo.+
29 Iti kasta kasapulanto a kanenyo ti lasag ti annakyo a lallaki, ken kanenyonto ti lasag ti annakyo a babbai.+
30 Ket sigurado a talipuposekto dagiti sagrado a nangato a dissoyo+ ken putdek dagiti pagsaadan ti insiensoyo ket iparabawko dagiti mismo a bangkayyo kadagiti bangkay dagiti makadurmen nga idoloyo;+ ket karurodnakayto laeng ti kararuak.+
31 Ket pudno nga iyawatkonto dagiti siudadyo iti kampilan+ ken paglangalangek dagiti santuarioyo,+ ket saankonto a say-upen dagiti makapainana a sayamusomyo.+
32 Ket siak, iti biangko, paglangalangekto ti daga,+ ket dagiti kabusoryo nga agnanaed iti dayta mulagatandanto laeng a sisisiddaaw.+
33 Ket dakayo iwarawarakayto kadagiti nasion,+ ket mangasutakto iti kampilan a sumurot kadakayo;+ ket ti dagayo agbalinto a langalang,+ ket dagiti siudadyo agbalinto a langalang a rebba.
34 “‘Iti dayta a tiempo sulnitanto ti daga dagiti sabbathna iti amin nga al-aldaw ti panaglangalangna, bayat nga addakayo iti daga dagiti kabusoryo. Iti dayta a tiempo mangsalimetmetto ti daga iti sabbath, yantangay masapul a bayadanna dagiti sabbathna.+
35 Amin nga al-aldaw ti panaglangalangna mangsalimetmetto iti sabbath, iti rason a saan a nangsalimetmet iti sabbath bayat dagiti sabbathyo idi nagnaedkayo iti dayta.
36 “‘No maipapan kadagidiay nabatbati kadakayo,+ sigurado nga iyegkonto ti panagalikaka kadagiti pusoda iti dagdaga dagiti kabusorda; ket ti karasakas ti bulong a maipalais pudno unay a kamatennanto ida, ket pudno a pumanawdanto kas iti panagtalaw iti kampilan ket mapasagda nga awan asinoman a kumamkamat.+
37 Ket sigurado a maitibkoldanto maibusor iti maysa ken maysa a kasla manipud sanguanan ti kampilan nga awan ti asinoman a kumamkamat, ket kadakayo awanto ti pannakabael a tumakder a sumaranget iti sanguanan dagiti kabusoryo.+
38 Ket madadaelkayto iti tengnga dagiti nasion,+ ket ibusennakayto ti daga dagiti kabusoryo.
39 No maipapan kadagidiay nabatbati kadakayo, agrunotdanto+ gapu iti biddutda kadagiti daga ti kabkabusoryo. Wen, uray pay gapu kadagiti biddut ti ammada,+ agrunotdanto a maikanunong kadakuada.
40 Ket sigurado nga ipudnodanto ti bukodda a biddut+ ken ti biddut dagiti ammada iti saanda a kinamatalek idi nagtignayda a di simamatalek kaniak, wen, uray pay idi nagnada a bumusor kaniak.+
41 Kaskasdi siak, iti biangko, nagnaak a bumusor kadakuada,+ ket kasapulan idi nga ipanko ida iti daga dagiti kabusorda.+
“‘Nalabit iti dayta a tiempo mapagpakumbabanto+ ti di nakugit a pusoda,+ ket iti dayta a tiempo ikarodanto ti biddutda.
42 Ket pudno a lagipekto ti tulagko ken Jacob;+ ket uray ti tulagko ken Isaac+ ken uray ti tulagko ken Abraham+ lagipekto, ket ti daga lagipekto.
43 Bayat dayta binaybay-anda ti daga ket sinulsulnitanna dagiti sabbathna+ bayat a silalangalang dayta nga awanda ket isuda met laeng nagikarkaroda iti biddutda,+ gapu ta, gapu a mismo ta, linaksidda dagiti hudisial a pangngeddengko,+ ket kinarurod ti karkararuada dagiti paglintegak.+
44 Ket iti laksid amin daytoy, bayat ti panagtalinaedda iti daga dagiti kabusorda, sigurado a saankonto a laksiden ida+ wenno karurod ida+ tapno talipuposek ida, tapno salungasingek ti tulagko+ kadakuada; ta siak ni Jehova a Diosda.
45 Ket lagipekto maigapu kadakuada ti tulag dagiti inapo+ isuda nga inruarko manipud daga ti Egipto iti imatang dagiti nasion,+ tapno agbalinak a Diosda. Siak ni Jehova.’”
46 Dagitoy ti al-alagaden ken dagiti hudisial a pangngeddeng+ ken dagiti linteg nga inkabil ni Jehova iti nagbaetanna ken ti annak ti Israel idiay Bantay Sinai babaen ken Moises.+
