Efeso 5:1-33
5 Gapuna, agbalinkayo a tumutulad iti Dios,+ kas annak a dungdungnguen,
2 ket itultuloyyo ti magna iti ayat,+ no kasano a ti Kristo inayatnakayo+ met ken inyawatna ti bagina maipaay kadakayo kas daton+ ken sakripisio iti Dios nga agpaay a kas nasayamusom a banglo.+
3 Ti pannakiabig+ ken tunggal kita ti kinarugit wenno kinaagum+ saan koma nga uray madakamat iti nagtetengngaanyo,+ kas maitutop kadagiti nasantuan a tattao;+
4 uray ti nakababain nga ugali+ wenno minamaag a panagsasao wenno naalas+ a panagang-angaw, bambanag a di mayanatup, no di ket ti panangipaay iti panagyaman.+
5 Ta pagaammoyo daytoy, a bigbigbigenyo dayta iti bagbagiyo, nga awan ti mannakiabig+ wenno narugit a tao wenno naagum a tao+—a kaipapananna ti panagbalin a managrukbab iti idolo—nga addaan aniaman a tawid iti pagarian ti Kristo ken ti Dios.+
6 Awan koma ti tao a mangallilaw kadakayo babaen iti ubbaw a sasao,+ ta gapu iti bambanag nga immunan a naibaga um-umayen ti pungtot ti Dios iti annak ti kinasukir.+
7 Gapuna dikay agbalin a mannakiraman kadakuada;+
8 ta idi naminsan sipngetkayo,+ ngem lawagkayo itan+ mainaig iti Apo. Itultuloyyo ti magna kas annak ti lawag,
9 ta ti bunga ti lawag buklen ti tunggal kita ti kinaimbag ken kinalinteg ken kinapudno.+
10 Itultuloyyo a siguraduen no ania ti makaay-ayo+ iti Apo;
11 ket isardengyo ti makiraman+ kadakuada iti di nabunga nga ar-aramid a kukua ti kinasipnget,+ ngem, imbes ketdi, tubngarenyo+ pay ket ida,
12 ta ti bambanag nga aramidenda iti nalimed nakababain uray saritaen laeng.+
13 Ita ti amin a bambanag a matubtubngar+ maiparangarang babaen ti lawag, ta amin a banag a maiparparangarang+ ket lawag.
14 Gapuna kunana: “Agriingka,+ O mannaturog, ket bumangonka manipud kadagiti natay,+ ket ti Kristo silnagannakanto.”+
15 Gapuna itultuloyyo ti agaluad a siiinget a ti pannagnayo+ saan a kas kadagiti nakuneng no di ket kas kadagiti masirib a tattao,
16 a gatangenyo ti nainggundawayan a tiempo+ maipaay iti bagbagiyo, agsipud ta dagiti aldaw dakesda.+
17 Gapu itoy sardenganyo ti panagbalin a di nainkalintegan, no di ket itultuloyyo a lasinen+ no ania ti pagayatan+ ni Jehova.
18 Kasta met, dikay agbarbartek+ iti arak, nga iti dayta adda kinagaramugam,+ no di ket agtultuloykayo a mapno iti espiritu,+
19 nga agsasaokayo iti bagbagiyo kadagiti salmo+ ken daydayaw+ iti Dios ken naespirituan a kankanta, nga agkankanta+ ken pakpakuyoganyo ti bagbagiyo iti musika+ iti puspusoyo ken Jehova,
20 nga iti nagan ni Apotayo a Jesu-Kristo kankanayon nga agyamankayo+ iti Dios ken Amatayo gapu iti amin a bambanag.
21 Agpasakupkayo iti maysa ken maysa+ gapu iti buteng ken Kristo.
22 Dagiti babbai agpasakupda+ koma kadagiti assawada a kas iti Apo,
23 agsipud ta ti lalaki isu ti ulo ti asawana+ a kas met ti Kristo isu ti ulo ti kongregasion,+ yantangay isu ti manangisalakan iti daytoy a bagi.
24 Iti kinapudnona, no kasano a ti kongregasion agpaspasakup iti Kristo, kasta met koma dagiti babbai kadagiti assawada iti amin a banag.+
25 Assawa a lallaki, itultuloyyo nga ayaten dagiti assawayo,+ no kasano a ti Kristo inayatna met ti kongregasion ken inyawatna ti bagina a maipaay iti dayta,+
26 tapno masantipikarna dayta,+ a dalusanna iti panangbuggo iti danum babaen ti sao,+
27 tapno maiparangna iti bagina ti kongregasion iti kinangayed dayta,+ nga awanan mulit wenno karetket wenno aniaman kadagiti kasta a banag, no di ket nasantuan koma dayta ken awan pakapilawanna.+
28 Iti kastoy a pamay-an rebbeng a dagiti lallaki ayatenda dagiti assawada a kas kadagiti bukodda a bagi. Ti agayat iti asawana a babai ay-ayatenna ti bagina,
29 ta awan pay a pulos ti tao a nanggura iti bukodna a lasag; no di ket taraonan ken ipatpategna dayta,+ a kas met ti panangipateg ti Kristo iti kongregasion,
30 agsipud ta kamkamengnatayo ti bagina.+
31 “Iti daytoy a rason panawanto ti maysa a lalaki ti amana ken ti inana ket makitiponto iti asawana, ket dagiti dua agbalindanto a maymaysa a lasag.”+
32 Daytoy a sagrado a palimed+ ket naindaklan. Ita agsasaoak maipapan ken Kristo ken iti kongregasion.+
33 Uray pay kasta, ayaten koma ti tinunggal maysa kadakayo ti asawana a babai+ a kas ti panagayatna iti bagina; iti sabali a bangir, ti babai rebbeng nga addaan iti nauneg a panagraem+ iti asawana.
