Efeso 3:1-21
3 Gapu itoy siak, ni Pablo, a balud+ ni Kristo Jesus maigapu kadakayo, a tattao iti nasnasion+—
2 no, pudno unay, nangngegyo ti maipapan iti kinamayordomo+ ti di kaikarian a kinamanangngaasi ti Dios a naited kaniak maipaay kadakayo,
3 a babaen ti maysa a paltiing naipakaammo kaniak ti sagrado a palimed,+ a kas iti insuratko idi iti ababa.
4 Gapu itoy, inton mabasayo daytoy, mabigbigyo ti adda kaniak a pannakaawat+ iti sagrado a palimed+ ti Kristo.
5 Iti sabsabali a kaputotan saan a naipakaammo daytoy a palimed+ iti annak ti tattao a kas ti pannakaipalgakna+ ita kadagiti nasantuan nga apostolna ken kadagiti mammadto+ babaen ti espiritu,
6 awan sabali, tapno dagiti tattao iti nasnasion agbalinda a kadua a makipagtawid ken pada a kamkameng iti bagi+ ken makiraman kadatayo iti kari+ a maikaykaysa ken Kristo Jesus babaen ti naimbag a damag.
7 Nagbalinak a ministro+ daytoy maitunos iti awan bayadna a sagut ti di kaikarian a kinamanangngaasi ti Dios a naited kaniak maitunos iti wagas a panagtignay ti pannakabalinna.+
8 Kaniak, a maysa a tao a nanumnumo+ ngem ti kanunumuan iti amin a sasanto, naited daytoy di kaikarian a kinamanangngaasi,+ tapno ideklarak kadagiti nasion+ ti naimbag a damag maipapan kadagiti di matukod a kinabaknang+ ti Kristo
9 ken ipakitak kadagiti tattao no kasano a matarawidwidan+ ti sagrado a palimed+ a manipud iti di nakedngan a napalabas naitalimeng iti Dios, a namarsua iti amin a bambanag.+
10 Maipaay daytoy iti panggep nga ita kadagiti gobierno ken autoridad+ kadagiti nailangitan a disso maipakaammo koma ti kasta unay panagdudumana a sirib ti Dios+ babaen ti kongregasion,+
11 maitunos iti agnanayon a panggep a binukelna mainaig iti Kristo,+ ni Jesus nga Apotayo,
12 a babaen kenkuana addaantayo iti daytoy wayawaya nga agsao ken iyaadani+ buyogen ti panagtalek babaen ti pammatitayo kenkuana.
13 Gapuna dawatek kadakayo a dikay sumuko gapu kadagitoy rigatko+ a maigapu kadakayo, ta dagitoy kaipapananda ti dayag kadakayo.
14 Gapu itoy agparintumengak+ iti Ama,+
15 a nakautangan ti tunggal pamilia+ idiay langit ken iti daga ti naganna,+
16 a ti panggep ket ipaayna koma kadakayo maitunos iti kinabaknang+ ti dayagna a mapabilegkayo iti kinataoyo iti uneg+ buyogen ti pannakabalin babaen ti espirituna,+
17 tapno mapagnaedyo ti Kristo iti puspusoyo babaen ti pammatiyo buyogen ti ayat;+ tapno maparamut+ ken maipasdekkayo iti pamuon,+
18 tapno naan-anay a maawatanyo iti isipyo+ agraman ti amin a sasanto no ania ti kaakaba ken kaatiddog ken kangato ken kauneg,+
19 ken tapno maammuanyo ti ayat ti Kristo+ a manglab-aw iti pannakaammo, tapno mapnokayo iti isuamin a kinanaan-anay+ nga ipaay ti Dios.
20 Ita iti daydiay makabalin, maitunos iti pannakabalinna nga agtigtignay+ kadatayo, a mangaramid a nawadwadwad unay a lab-awanna ti amin a bambanag a dawaten wenno panunotentayo,+
21 maadda koma kenkuana ti dayag babaen iti kongregasion ken babaen ken Kristo Jesus kadagiti amin a kaputotan iti agnanayon ken awan inggana.+ Amen.
