Deuteronomio 9:1-29
9 “Denggem, O Israel, ita nga aldaw ballasiwem ti Jordan+ tapno sumrekka ket ikkatam iti sanikua dagiti nasion a daddadakkel ken nabilbileg ngem sika,+ siudad a dadakkel ken nasarikedkedan agingga iti langlangit,+
2 maysa nga ili a dakkel ken natayag, ti annak ni Anakim,+ a maipapan iti dayta sika naammuam ken sika nangngegmo a naikuna, ‘Siasino ti makapagtakder a sititibker iti sanguanan ti annak ni Anak?’
3 Ket pagaammom unay ita nga aldaw a ni Jehova a Diosmo bumallasiw iti sanguanam.+ Isu maysa a mangibus nga apuy.+ Talipuposennanto+ ida, ket isu parukmaennanto ida iti sanguanam; ket masapul nga ikkatam ida iti sanikua ken dadaelem ida a sipapardas, kas iti sinao kenka ni Jehova.+
4 “Dika kunaen daytoy iti pusom inton pagtalawen ida ni Jehova a Diosmo iti sanguanam, ‘Gapu iti bukodko a kinalinteg a ni Jehova inserreknak a mangtagikua itoy a daga,’+ idinto ta gapu iti kinadangkes dagitoy a nasion a ni Jehova pagtalawenna ida iti sanguanam.+
5 Saan a gapu iti kinalintegmo+ wenno gapu iti kinapalungdo ta pusom+ a sumrekka a mangtagikua iti dagada; iti kinapudnona, gapu iti kinadangkes dagitoy a nasion a ni Jehova a Diosmo pagtalawenna ida iti sanguanam,+ ken tapno itungpal ti sao nga insapata ni Jehova kadagidi ammam, a da Abraham,+ Isaac+ ken Jacob.+
6 Ket masapul nga ammuem a saan a gapu iti kinalintegmo a ni Jehova a Diosmo itedna kenka daytoy a nasayaat a daga tapno tagikuaem; ta maysaka a natangken ti panaglenglengngesna nga ili.+
7 “Laglagipem: Dika lipaten no kasano a pinagpungtotmo ni Jehova a Diosmo idiay let-ang.+ Manipud iti aldaw nga iruruarmo manipud daga ti Egipto agingga iti iyaayyo iti daytoy a disso napaneknekan a rebeliosokayo iti panagtigtignayyo ken Jehova.+
8 Uray idiay Horeb ginargariyo nga agunget ni Jehova iti kasta nagpungtot unay kadakayo ni Jehova agingga a talipuposennakay koman.+
9 Idi simmang-atak iti bantay tapno awatek dagiti tapi a bato,+ dagiti tapi ti tulag a pinatalgedan kadakayo ni Jehova,+ ket intultuloyko ti nagnaed iti bantay iti uppat a pulo nga aldaw ken uppat a pulo a rabii,+ (saanak a nangan iti tinapay wenno uray imminum iti danum,)
10 idin inted kaniak ni Jehova ti dua a tapi a bato a nasuratan babaen ti ramay ti Dios;+ ket adda iti rabawda ti amin a sasao a sinao kadakayo ni Jehova iti bantay manipud tengnga ti apuy idi aldaw ti kongregasion.+
11 Ket naaramid nga idi ngudo ti uppat a pulo nga aldaw ken uppat a pulo a rabii inted kaniak ni Jehova ti dua a tapi a bato, dagiti tapi ti tulag;+
12 ket kinuna kaniak ni Jehova, ‘Tumakderka, darasem ti sumalog manipud ditoy, agsipud ta dagiti kailiam nga inruarmo manipud Egipto nagtignayda iti makadadael.+ Simiasida a sidadaras iti dalan a maipapan iti dayta binilinko ida. Inyaramidanda ti bagbagida iti sinukog a ladawan.’+
13 Ket kinuna kaniak ni Jehova daytoy, ‘Nakitak daytoy nga ili, ket, adtoy! maysa nga ili a natangken ti panaglenglengngesna.+
14 Bay-annak tapno matalipuposko+ ida ken mapunasko ti naganda iti baba ti langlangit,+ ket aramidenka a maysa a nasion a nabilbileg ken ad-adu ti umilina ngem isuda.’+
15 “Kalpasan dayta nagbaw-ingak ket simmalogak iti bantay, bayat a ti bantay sumsumged iti apuy;+ ket ti dua a tapi ti tulag adda iti dua nga imak.+
16 Idin kimmitaak, ket sadiay nagbasolkayo maikaniwas ken Jehova a Diosyo! Inyaramidanyo ti bagbagiyo iti sinukog a kigaw a baka.+ Simiasikayo a sidadaras iti dalan a maipapan iti dayta binilinnakayo ni Jehova.+
17 Iti kasta iniggamak ti dua a tapi ket intupakko ida manipud iti dua nga imak ket binurakko ida iti imatangyo.+
18 Ket inruknoyko ti bagik iti sanguanan ni Jehova, kas idi damo, iti uppat a pulo nga aldaw ken uppat a pulo a rabii. Saanak a nangan iti tinapay wenno uray imminum iti danum,+ gapu iti isuamin a basolyo a naaramidanyo ta nagaramidkayo iti dakes kadagiti mata ni Jehova tapno pagrurodenyo.+
19 Ta nagamakak gapu iti nabara nga unget a babaen iti dayta nagrurod kadakayo ni Jehova agingga a talipuposennakay koman.+ Nupay kasta, immimdeng met kaniak ni Jehova iti dayta a tiempo.+
20 “Kasta met ken Aaron, nagpungtot unay ni Jehova agingga a talipuposenna koman;+ ngem immararawak+ met maigapu ken Aaron iti daydi met laeng a tiempo.
21 Ket ti basolyo nga inaramidyo, ti kigaw a baka,+ innalak, ket impuorko iti apuy ken rinumekko, a minekmekko a naan-anay agingga a nagbalin a napino a kas iti tapok; a kalpasan dayta impuruakko ti tapokna iti napegges nga ayus nga agpabpababa manipud iti bantay.+
22 “Kanayonanna, idiay Tabera+ ken idiay Massah+ ken idiay Kibrot-hataava+ nagbalinkayo a mananggargari ken Jehova nga agunget.+
23 Ket idi imbaonnakayo ni Jehova manipud Cades-barnea,+ a kinunana, ‘Sumang-atkayo ket tagikuaenyo ti daga a sigurado nga itedko kadakayo!’ idin nagtignaykayo a sirerebelioso iti bilin ni Jehova a Diosyo,+ ket saanyo a winatwat ti pammati+ kenkuana ken saankayo nga immimdeng iti timekna.+
24 Pinaneknekanyo a rebeliosokayo iti panagtigtignayyo ken Jehova+ manipud iti aldaw a pannakaam-ammok kadakayo.
25 “Gapuna pinagtalinaedko a siruruknoy ti bagik iti sanguanan ni Jehova iti uppat a pulo nga aldaw ken uppat a pulo a rabii,+ ta inruknoyko ti bagik a kasta agsipud ta sinao ni Jehova a talipuposennakayo.+
26 Ket rinugiak ti umararaw+ ken Jehova ken agkuna, ‘O Soberano nga Apo Jehova, dika dadaelen ti ilim, ti mismo a kabukbukodam a sanikua,+ a sinubbotmo babaen ti kinanaindaklanmo, nga inruarmo manipud Egipto+ babaen ti napigsa nga ima.+
27 Lagipem da adipenmo nga Abraham, Isaac ken Jacob.+ Dika taliawen ti kinatangken daytoy nga ili ken ti kinadangkesda ken ti basolda,+
28 ta amangan no kunaen ti daga+ a nangiruaram kadakami: “Gapu ta saan a nabalinan ni Jehova nga ipan ida iti daga nga inkarina kadakuada, ken gapu ta ginurana ida inruarna ida tapno papatayenna ida iti let-ang.”+
29 Isuda, met, ti ilim ken ti kabukbukodam a sanikua+ nga inruarmo babaen ti dakkel a pannakabalinmo ken ti siuunnat a takiagmo.’+
