Deuteronomio 34:1-12
34 Kalpasanna simmang-at ni Moises manipud desierto a tantanap ti Moab nga agturong iti Bantay Nebo,+ iti tapaw ti Pisga,+ a sumango iti Jerico.+ Ket impakita kenkuana ni Jehova ti intero a daga, ti Galaad agingga iti Dan,+
2 ken ti intero a Neftali ken ti daga ti Efraim ken Manases ken ti intero a daga ti Juda agingga iti makinlaud a baybay,+
3 ken ti Negeb+ ken ti Distrito,+ ti ginget a tanap ti Jerico, ti siudad dagiti kayo a palma,+ agingga iti Zoar.+
4 Ket kinuna kenkuana ni Jehova: “Daytoy ti daga a maipapan iti dayta nagsapataak kada Abraham, Isaac ken Jacob, a kinunak, ‘Itedkonto dayta iti bin-im.’+ Impakitak dayta kenka iti bukodmo a matmata, yantangay saankanto a bumallasiw a mapan sadiay.”+
5 Kalpasan dayta ni Moises nga adipen ni Jehova+ natay idiay daga ti Moab iti panagbilin ni Jehova.+
6 Ket intabonna iti ginget iti daga ti Moab iti sanguanan ti Bet-peor,+ ket awan asinoman a makaammo iti tanemna agingga itoy nga aldaw.+
7 Ket ni Moises agtawen iti sangagasut ket duapulo idi natay.+ Ti matana saan a kimmudrep,+ ket ti bilegna saan a pimmanaw.+
8 Ket ti annak ti Israel sinangitanda ni Moises idiay desierto a tantanap ti Moab iti tallopulo nga aldaw.+ Idi agangay naturpos ti al-aldaw a panagsangit iti periodo ti panagleddaang maipaay ken Moises.
9 Ket ni Josue nga anak ni Nun napno iti espiritu ti kinasirib,+ ta impatay kenkuana ni Moises ti imana;+ ket ti annak ti Israel rinugianda ti umimdeng kenkuana ket inaramidda kas iti imbilin ni Jehova ken Moises.+
10 Ngem kaskasdi nga awan a pulos ti timmakder a mammadto iti Israel a kas ken Moises,+ a naam-ammo ni Jehova iti rupanrupa,+
11 no maipapan kadagiti amin a pagilasinan ken milagro a nangibaonan kenkuana ni Jehova nga aramidenna iti daga ti Egipto ken Faraon ken iti amin nga ad-adipenna ken iti intero a dagana,+
12 ken no maipapan iti isuamin a napigsa nga ima ken isuamin a naindaklan a kinanakaam-amak a winatwat ni Moises iti imatang ti intero nga Israel.+
