Deuteronomio 34:1-12

  • Ipakita ni Jehova ken ni Moises ti daga (1-4)

  • Ipapatay ni Moises (5-12)

34  Manipud tanap ti Moab, simmang-at ni Moises idiay Bantay Nebo,+ iti tuktok ti Pisga,+ a sumango iti Jerico.+ Ket impakita kenkuana ni Jehova ti intero a daga, manipud Gilead agingga idiay Dan,+  ken ti intero a Neftali ken ti Efraim ken Manases, ken ti intero a Juda agingga iti makinlaud a baybay,*+  ken ti Negeb+ ken ti Distrito,+ ti tanap ti Jerico, ti siudad dagiti kayo a palma, agingga idiay Zoar.+  Kinuna kenkuana ni Jehova: “Daytoy ti daga nga inkarik kada Abraham, Isaac, ken Jacob, idi imbagak: ‘Itedkonto daytoy iti kaputotam.’*+ Impakitak daytoy kenka, ngem saanka a bumallasiw sadiay.”+  Kalpasanna, natay ni Moises nga adipen ni Jehova iti daga ti Moab kas imbaga ni Jehova.+  Intabonna iti tanap iti daga ti Moab, iti batog ti Bet-peor, ket awan ti makaammo iti tanemna agingga ita nga aldaw.+  Agtawen ni Moises iti 120 idi natay.+ Saan a kimmudrep ti matana ken saan a kimmapuy ti bagina.  Sinangitan dagiti Israelita ni Moises idiay tanap ti Moab iti 30 nga aldaw.+ Kalpasanna, nagpatinggan dagiti aldaw a panangsangit ken panangdung-awda ken Moises.  Napno iti espiritu ti kinasirib ni Josue nga anak ni Nun ta imparabaw idi ni Moises ti imana kenkuana;+ ket dimngeg kenkuana dagiti Israelita, ken inaramidda ti imbilin ni Jehova ken ni Moises.+ 10  Ngem awanen ti propeta a timmaud iti Israel a kas ken Moises,+ nga am-ammo ni Jehova iti rupanrupa.+ 11  Inaramidna amin a pagilasinan ken milagro nga impaaramid kenkuana ni Jehova idiay daga ti Egipto, iti sanguanan ni Faraon ken ti amin nga adipenna ken iti intero a dagana,+ 12  babaen ti mannakabalin nga ima ken nakaskasdaaw a pannakabalin nga impakita ni Moises iti sanguanan ti amin nga Israelita.+

Footnotes

Kayatna a sawen, ti Dakkel a Baybay, ti Mediteraneo.
Lit., “bin-im.”