Deuteronomio 28:1-68
28 “Ket mapasamakto a no umimdengka a di bumurong iti timek ni Jehova a Diosmo babaen ti siaannad a panangaramidmo iti amin a bilbilinna nga ibilbilinko kenka ita nga aldaw,+ ni Jehova a Diosmo sigurado met nga ikabilnakanto iti ngatuen ti amin a sabsabali a nasion ti daga.+
2 Ket umayto kenka dagitoy amin a bendision ket kamakamendaka,+ agsipud ta umim-imdengka iti timek ni Jehova a Diosmo:
3 “Benditokanto iti siudad,+ ket benditokanto iti tay-ak.+
4 “Benditonto ti bunga ti tianmo+ ken ti bunga ti dagam ken ti bunga ti naamo nga animalmo,+ ti urbon ti bakbakam ken ti annak ti arbanmo.+
5 “Benditonto ti labbam+ ken ti paggamayam.+
6 “Benditokanto no sumrekka, ket benditokanto no rummuarka.+
7 “Ni Jehova ipaabaknanto iti sangom dagiti kabusormo a tumakder a bumusor kenka.+ Iti maymaysa a dalan rummuardanto a bumusor kenka, ngem iti pito a dalan agtalawdanto iti sangom.+
8 Ikeddengto ni Jehova maipaay kenka ti bendision kadagiti pagipempenan ti abastom+ ken tunggal gapuanam,+ ket sigurado a bendisionannakanto iti daga nga ited kenka ni Jehova a Diosmo.
9 Ipasdeknakanto ni Jehova kas nasantuan nga ili kenkuana,+ kas iti insapatana kenka,+ agsipud ta itultuloymo a salimetmetan ti bilbilin+ ni Jehova a Diosmo, ket nagnaka iti daldalanna.
10 Ket kasapulan a makitanto ti amin nga il-ili ti daga a ti nagan ni Jehova nayawag kenka,+ ket pudno nga agbutengdanto kenka.+
11 “Ni Jehova pudno a paglippiasennakanto met iti kinarang-ay iti bunga ti tianmo+ ken ti bunga dagiti naamo nga animalmo ken ti bunga ti dagam,+ iti daga nga insapata ni Jehova kadagidi ammam nga ited kenka.+
12 Luktanto kenka ni Jehova ti nasayaat a kamaligna, ti langlangit, tapno ipaayna ti tudo iti dagam iti panawenna+ ken tapno bendisionanna ti tunggal aramid ta imam;+ ket sigurado nga agpautangkanto kadagiti adu a nasion, idinto ta sika saankanto nga umutang.+
13 Ket pudno nga ikabilnakanto ni Jehova iti ulo ket saan nga iti ipus; ket addakanto laeng iti ngato,+ ket saankanto a maipan iti baba, agsipud ta agtultulnogka iti bilbilin+ ni Jehova a Diosmo, nga ibilbilinko kenka ita nga aldaw a salimetmetam ken aramidem.
14 Ket dika sumiasi iti amin a sasao nga ibilbilinko kadakayo ita nga aldaw, iti makannawan wenno iti makannigid,+ tapno sumurotka iti sabali a didios tapno pagserbiam+ ida.
15 “Ket mapasamakto a no saanka nga umimdeng iti timek ni Jehova a Diosmo babaen ti panagannad a mangaramid iti amin a bilbilinna ken paglinteganna nga ibilbilinko kenka ita nga aldaw, dumtengto met kenka amin dagitoy a lunod ket kamakamendaka:+
16 “Mailunodkanto iti siudad,+ ket mailunodkanto iti tay-ak.+
17 “Mailunodto ti labbam+ ken ti paggamayam.+
18 “Mailunodto ti bunga ti tianmo+ ken ti bunga ti dagam,+ ti urbon ti bakbakam ken ti annak ti arbanmo.+
19 “Mailunodkanto no sumrekka, ken mailunodkanto no rummuarka.+
20 “Ibaonto kenka ni Jehova ti lunod,+ pannakariribuk+ ken babalaw+ iti tunggal gapuanam a padasem nga itungpal, agingga a natalipuposkan ken napukawkan a sidadaras, gapu iti kinadakes ti ar-aramidmo ta binaybay-annak.+
21 Ipakapetto kenka ni Jehova ti angol agingga a matalipuposnaka iti daga a mapanmo tagikuaen.+
22 Kabilennakanto ni Jehova iti sarut+ ken nakabarbara a gurigor ken panagebbal ken makapagurigor a pudot ken iti kampilan+ ken pannakakset+ ken buot,+ ket sigurado a kamatendakanto agingga a napukawkan.
23 Dagiti tangatangmo nga adda iti ngatuen ta ulom agbalindanto met a gambang, ket ti daga nga adda iti babam landok.+
24 Mangipaayto ni Jehova iti pulbos ken tapok kas tudo ti dagam. Manipud langlangit bumabanto kenka agingga a natalipuposkan.
25 Ipaabaknakanto ni Jehova iti sango dagiti kabusormo.+ Iti maymaysa a dalan rummuarkanto a bumusor kadakuada, ngem iti pito a dalan agtalawkanto iti sangoda; ket agbalinkanto a nakaal-aliaw a banag iti amin a pagpagarian ti daga.+
26 Ket ti natay a bagim agbalinto a taraon iti tunggal agtaytayab a parsua iti langlangit ken kadagiti animal iti tay-ak, nga awan mamagpigerger kadakuada.+
27 “Kabilennakanto ni Jehova iti busali ti Egipto+ ken busbusigit ken gudgod ken rettab ti kudil, a kadagita saankanto a mapaimbag.
28 Kabilennakanto ni Jehova iti kinamauyong+ ken pannakapukaw ti panagkita+ ken pannakariribuk ti puso.+
29 Ket pudno nga agbalinkanto a maysa nga agari-arikap iti tengnga ti aldaw, kas iti panagari-arikap ti bulsek a tao iti daguyemyem,+ ket saanmonto a mapagballigi ti daldalanmo; ket agbalinkanto laeng a maysa a kanayon a masaur ken matakawan, nga awan asinoman a mangisalakan kenka.+
30 Makitinnulagkanto iti maysa a babai, ngem ramesento ti sabali a lalaki.+ Mangbangonkanto iti balay, ngem saankanto nga agnaed iti dayta.+ Agmulakanto iti kaubasan, ngem saanmonto a rugian nga usaren.+
31 Ti torom naparti dita imatangmo—ngem saankanto a mangan iti aniaman iti dayta. Ti asnom natakaw manipud sanguanam—ngem saanto a maisubli kenka. Ti karnerom naited kadagiti kabusormo—ngem awanankanto iti manangisalakan.+
32 Ti annakmo a lallaki ken annakmo a babbai nayawat iti sabali nga ili+ ket dagiti matam kanayon a kumitkita ken mail-iliw kadakuada—ngem dagita imam awananto iti pannakabalin.+
33 Ti bunga ti dagam ken ti isuamin a napataudmo kanento ti maysa nga ili a saanmo a naam-ammo;+ ket agbalinkanto a maysa laeng a nasaur ken nailupitlupit a kanayon.+
34 Ket sigurado a mapagmauyongkanto iti mabuya dagita matam a makitamto.+
35 “Kabilennakanto ni Jehova iti naut-ot a busali iti dua a tumeng ken dua a luppo, nga iti dayta saankanto a mapaimbag, manipud iti dapan ti sakam agingga ita kuppokuppom.+
36 Ni Jehova paglasatennakanto+ ken ti arim+ nga isaadmonto a mangituray kenka nga agturong iti nasion a saanmo a naammuan, uray sika wenno uray dagidi ammam; ket sadiay kasapulanto nga agserbika iti sabali a didios, a naaramid iti kayo ken naaramid iti bato.+
37 Ket agbalinkanto a banag a pagmalangaan,+ maysa a pagkukuna a proverbio+ ken maysa a pangrurod iti tengnga ti amin nga il-ili a pangipananto kenka ni Jehova.
38 “Mangipankanto iti adu a bin-i iti talon, ngem bassitto ti maummongmo,+ agsipud ta lamutento ti dudon.+
39 Agmulakanto kadagiti kaubasan ket pudno unay a sukayem, ngem awanto ti arak nga inumem ken awanto ti burasem nga iserrek,+ agsipud ta ibusento ti igges.+
40 Maaddaankanto kadagiti kayo nga olibo iti intero a teritoriam, ngem awanto ti lana nga iyaprosmo iti bagim, agsipud ta agregregto dagiti olibom.+
41 Agipasngaykanto iti annak a lallaki ken annak a babbai, ngem saandanto nga agtultuloy a kukuam, agsipud ta mapandanto iti pannakakautibo.+
42 Amin dagiti kayom ken ti bunga ti dagam tagikuaento dagiti umarimbangaw nga insekto.
43 Ti ganggannaet nga agnanaed nga adda iti tengngam ngumatngatonto a ngumatngato iti ngatuem, bayat a sika—bumabbabakanto a bumabbaba.+
44 Isunto ti agpautang kenka, bayat a sika—saankanto nga agpautang kenkuana.+ Isu agbalinto nga ulo, bayat a sika—agbalinkanto nga ipus.+
45 “Ket amin dagitoy a lunod+ sigurado a dumtengdanto kenka ket kamatendaka ken kamakamendaka agingga a natalipuposkan,+ agsipud ta saanmo nga inimdengan ti timek ni Jehova a Diosmo babaen ti panangsalimetmet kadagiti bilinna ken kadagiti paglinteganna nga imbilinna kenka.+
46 Ket agtalinaeddanto kenka ken iti putotmo kas maysa a pagilasinan ken maysa a tanda agingga iti tiempo a di nakedngan,+
47 gapu iti kinapudno a saanka a nagserbi ken Jehova a Diosmo buyogen ti panagragsak ken rag-o+ ti puso iti kinaruay ti amin a banag.+
48 Ket kasapulanto a pagserbiam dagiti kabusormo+ nga ibaonto ni Jehova maibusor kenka buyogen ti bisin+ ken waw ken kinalamolamo ken ti kinakirang iti amin a banag; ket sigurado a mangikabilto iti sangol a landok iti tengngedmo agingga a matalipuposnaka.+
49 “Mangibangonto ni Jehova maibusor kenka iti nasion nga adayo,+ manipud ungto ti daga, kas iti panagsippayot ti maysa nga agila,+ maysa a nasion a saanmonto a maawatan ti pagsasaona,+
50 maysa a nasion a narungsot ti rupana,+ a saanto a mangidumduma iti lakay wenno mangipakita ti pabor iti agtutubo.+
51 Ket sigurado a kanendanto ti bunga dagiti naamo nga animalmo ken ti bunga ti dagam agingga a natalipuposkan,+ ket awanto ti bukel, baro nga arak wenno lana, awan urbon dagiti bakam wenno annak ti arbanmo, nga iteddada maipaay kenka agingga a nadadaeldaka.+
52 Ket pudno a lakubendakanto iti uneg dagiti amin a ruanganmo agingga a dagiti nangato ken nasarikedkedan a padermo a pagtaltalkam marba iti isuamin a dagam, wen, sigurado a lakubendakanto iti uneg dagiti amin a ruanganmo iti intero a dagam, nga inted kenka ni Jehova a Diosmo.+
53 Kalpasanna kasapulanto a kanem ti bunga ti tianmo, ti lasag ti annakmo a lallaki ken annakmo a babbai,+ nga inted kenka ni Jehova a Diosmo, gapu iti kinairteng ken pakarigatan a pangalikubkobto kenka ti kabusormo.
54 “No maipapan iti nalami unay ken nalanay a lalaki iti tengngam, ti matana+ agannayasto iti dakes iti kabsatna a lalaki ken iti ipatpategna nga asawa ken ti nabatbati iti annakna a natedda kenkuana,
55 iti kasta saanna nga ikkan ti asinoman kadakuada iti aniaman iti lasag ti annakna a kanennanto, agsipud ta awanen a pulos ti nabati kenkuana gapu iti kinairteng ken pakarigatan a pangalikubkobto kenka ti kabusormo iti uneg dagiti amin a ruanganmo.+
56 No maipapan iti nalami ken nalanay a babai iti tengngam a saan a pulos naggandat a mangibaddek iti dapan ti sakana iti daga gapu iti nalanay nga ugalina ken gapu iti kinalami,+ ti matana agannayasto iti dakes iti ipatpategna nga asawa ken iti anakna a lalaki ken iti anakna a babai,
57 uray iti kadkaduana a rummuar iti nagbaetan dagiti luppona ken iti annakna nga impasngayna,+ agsipud ta kanennanto ida a sililimed maigapu iti kinakirang ti amin a banag gapu iti kinairteng ken pakarigatan a pangalikubkobto kenka ti kabusormo iti uneg dagiti ruanganmo.+
58 “No saanmonto nga annadan nga itungpal amin a sasao daytoy a linteg a naisurat itoy a libro+ tapno pagbutngam daytoy nadayag+ ken nakaam-amak+ a nagan, ni Jehova+ a mismo, ti Diosmo,
59 sigurado a pagbalinento met ni Jehova dagiti saplitmo ken dagiti saplit ti putotmo a naisangsangayan ti kinakaroda, dadakkel ken napaut a sapsaplit,+ ken makapapatay ken napaut a saksakit.+
60 Ket pudno nga isublinanto kenka dagiti amin a sagubanit ti Egipto nga iti sanguananda nagamakka, ket sigurado a kumpetdanto kenka.+
61 Kasta met, aniaman a sakit ken aniaman a saplit a saan a naisurat iti libro daytoy a linteg, iyegto ida kenka ni Jehova agingga a natalipuposkan.
62 Ket pudno a mabatikayto a bassit unay ti bilangyo,+ nupay nagbalinkayo a kas kadagiti bituen ti langlangit ti kinaaduna,+ agsipud ta saanmo nga inimdengan ti timek ni Jehova a Diosmo.
63 “Ket mapasamakto a no kasano a nagrag-o kadakayo ni Jehova a mangaramid iti naimbag kadakayo ken mangpaadu kadakayo,+ kasta met nga agrag-onto kadakayo ni Jehova a mangdadael kadakayo ken mangtalipupos kadakayo;+ ket maalat-atkayto laeng manipud iti daga a mapanmo tagikuaen.+
64 “Ket sigurado nga iwarawaranakanto ni Jehova iti tengnga dagiti amin nga ili manipud maysa nga ungto ti daga agingga iti sabali nga ungto ti daga,+ ket sadiay kasapulanto nga agserbika kadagiti sabali a didios a saanmo a naammuan, uray sika wenno uray dagidi ammam, kayo ken bato.+
65 Ket iti tengnga dagidiay a nasion awanankanto iti nam-ay,+ wenno uray aniaman a lugar a paginanaan maipaay iti dapan ti sakam; ket pudno nga ipaayannakanto sadiay ni Jehova iti agpigpigerger a puso+ ken panagkapuy dagiti mata+ ken pannakaupay ti kararua.
66 Ket sigurado nga agpeggadkanto iti napalalo unay gapu iti biagmo ket agalinggagetka iti rabii ken aldaw, ket saanmonto a masigurado ti biagmo.+
67 Iti bigat kunaemto, ‘No koma laeng rabiin!’ ket iti rabii kunaemto, ‘No koma laeng bigaten!’ gapu iti panagalinggaget ta pusom a pagalinggagetamto ken gapu iti mabuya dagita matam a makitamto.+
68 Ket ni Jehova sigurado nga isublinakanto iti Egipto babaen kadagiti barko iti dalan a maipapan iti dayta kinunak kenka, ‘Saanmonton a pulos makita,’+ ket kasapulan nga ilakoyonto ti bagbagiyo sadiay kadagiti kabusormo kas ad-adipen a lallaki ken ad-adipen a babbai,+ ngem awanto ti gumatang.”
