2 Samuel 13:1-39
13 Ket naaramid kalpasan dagita a banag a ni Absalom+ nga anak ni David addaan iti napintas a kabsat a babai nga agnagan Tamar,+ ket ni Amnon+ nga anak ni David nagayat+ kenkuana.
2 Ket nakariribukan unay dayta ni Amnon iti kasta nagsakit+ maigapu ken Tamar a kabsatna, agsipud ta birhen, ket kadagiti mata+ ni Amnon nakarigrigat nga aramiden ti aniaman latta kenkuana.+
3 Ita addaan ni Amnon iti kadua nga agnagan Jehonadab,+ ti anak ni Simeah,+ kabsat ni David; ket ni Jehonadab masirib unay a lalaki.
4 Gapuna kinunana kenkuana: “Apay a sika, nga anak ti ari, naleddaangka a kas itoy, iti binigat? Saanmonto kadi nga ibaga kaniak?”+ Gapu itoy kinuna kenkuana ni Amnon: “Agayatak+ ken Tamar a kabsat a babai+ ni Absalom a kabsatko.”
5 Kalpasan dayta kinuna kenkuana ni Jehonadab: “Agiddaka iti pagiddaam ket aginsasakitka.+ Ket sigurado nga umaynakanto kitaen ni amam, ket kunaemto kenkuana, ‘Pangngaasim, pastrekem ni Tamar a kabsatko ket mangted kaniak iti tinapay nga agpaay iti masakit, ket aramidennanto iti imatangko ti tinapay a pangliwliwa tapno makitak dayta, ket manganakto manipud iti imana.’”+
6 Iti kasta nagidda ni Amnon ket naginsasakit,+ ket iti kasta simrek ti ari a kumita kenkuana. Idin kinuna ni Amnon iti ari: “Pangngaasim, pastrekem ni Tamar a kabsatko ket mangluto iti dua a sinanpuso a tinapay iti imatangko, tapno makapanganak manipud iti imana iti tinapay nga agpaay iti masakit.”
7 Iti kasta ni David nagbaon ken Tamar iti balay, a kunkunana: “Inka, pangngaasim, iti balay ni Amnon a kabsatmo ket iyaramidam iti tinapay a pangliwliwa.”
8 Gapuna napan ni Tamar iti balay ni Amnon+ a kabsatna bayat a nakaidda. Kalpasanna innalana ti bellaay nga arina ket ginamayna ket inaramidna dagiti tinapay iti imatangna ket linutona dagiti sinanpuso a tinapay.
9 Kamaudiananna innalana ti nauneg a pariok ket impakbona iti sangona, ngem nagkitakit a mangan ni Amnon ket kinunana: “Paruarenyo ti isuamin manipud kaniak!”+ Idin rimmuar ti isuamin manipud kenkuana.
10 Ni Amnon kinunana ita ken Tamar: “Ipanmo ti tinapay a pangliwliwa iti makin-uneg a siled, tapno kanek dayta kas maysa a masakit manipud ita imam.” Gapuna innala ni Tamar dagiti sinanpuso a tinapay nga inaramidna ket inyegna ida ken Amnon a kabsatna iti makin-uneg a siled.
11 Idi immasideg kenkuana tapno isu mangan, madagdagus a ginammatanna+ ni Tamar ket kinunana kenkuana: “Umayka, makikaiddaka+ kaniak, kabsatko.”+
12 Nupay kasta, kinunana kenkuana: “Saan, kabsatko! Saannak a mulitan;+ ta saan a gagangay nga aramiden ti kasta iti Israel.+ Dika aramiden daytoy nakababain a kinamaag.+
13 Ket siak—sadino ti pangipanakto iti pannakaumsik? Ket sika—agbalinkanto a kas iti maysa kadagiti nakuneng a lallaki iti Israel. Ket ita agsaoka, pangngaasim, iti ari; ta saannakto nga ipaidam kenka.”
14 Ket saan nga immannugot nga umimdeng iti timekna, no di ket inusarna ti pigsa a nabilbileg ngem iti pigsana ket isu minulitanna+ ket nakikaidda kenkuana.+
15 Ket isu nangrugi a ginura ni Amnon iti dakkel unay a pananggura, agsipud ta ti gura a pinanggurana kenkuana dakdakkel ngem iti ayat a pinangayatna kenkuana, iti kasta kinuna kenkuana ni Amnon: “Tumakderka, pumanawka!”
16 Gapu itoy kinunana kenkuana: “Saan, kabsatko; ta daytoy kinadakes a panangpapanawmo kaniak dakdakkel ngem iti sabali nga inaramidmo kaniak!” Ket saan nga immannugot nga umimdeng kenkuana.
17 Gapuna inayabanna ti katulonganna nga agserserbi kenkuana ket kinunana: “Paruarem daytoy a tao manipud kaniak, pangngaasim, ket punitam ti ruangan iti likudanna.”
18 (Ita adda naikawes kenkuana a nagayad a pagan-anay a garitgaritan;+ ta kasta idi ti panagkawes ti annak a babbai ti ari, dagiti birhen, kadagiti awan manggasna a lambon.) Gapuna isu inturong ti agserserbi kenkuana agingga iti ruar, ket pinunitanna ti ruangan iti likudanna.
19 Kalpasanna nangikabil ni Tamar iti dapdapo+ iti ulona, ket rinay-abna ti nagayad a pagan-anay a garitgaritan a naikawes kenkuana; ket dagiti imana pinagtalinaedna a nakaparabaw iti ulona+ ket nagna a pimmanaw, nga um-umkis bayat a magmagna.
20 Gapu itoy kinuna kenkuana ni Absalom+ a kabsatna: “Nagkaduakayo kadi ken Amnon+ a kabsatmo? Ket ita, kabsatko, agulimekka. Isu kabsatmo.+ Dika isaad ta pusom itoy a banag.” Ket ni Tamar nangrugi nga agnaed iti balay ni Absalom a kabsatna, bayat a nalapdan a makitimpuyog iti sabsabali.
21 Ket nangngeg ni Ari David ti maipapan kadagitoy amin a banag,+ ket nakaunget unay.+
22 Ket ni Absalom saan a nakisao ken Amnon uray iti dakes wenno naimbag; ta ni Absalom ginurana+ ni Amnon gapu iti kinapudno a minulitanna ni Tamar a kabsatna.
23 Ket napasamak kalpasan ti intero a dua a tawen a ni Absalom naaddaan kadagiti mammukis iti karnero+ idiay Baal-hasor, nga adda iti asideg ti Efraim;+ ket inawis ni Absalom ti amin nga annak ti ari.+
24 Gapuna simrek ni Absalom a napan iti ari ket kinunana: “Adtoy, ita, ti adipenmo addaan kadagiti mammukis iti karnero! Kumuyog koma ti ari, pangngaasim, ken kasta met dagiti adipenna, iti adipenmo.”
25 Ngem ti ari kinunana ken Absalom: “Saan, anakko! Saankami koma a mapan amin, pangngaasim, tapno saankami nga agbalin a dadagsen kenka.” Nupay ginuyguyugoyna,+ saan nga immannugot a mapan ngem isu binendisionanna.+
26 Kamaudiananna kinuna ni Absalom: “No saan a sika, kumuyog koma kadakami ni Amnon a kabsatko, pangngaasim.”+ Gapu itoy kinuna kenkuana ti ari: “Apay koma a kumuyog kenka?”
27 Ket rinugian a guyugoyen ni Absalom,+ iti kasta imbaonna a kumuyog kenkuana ni Amnon ken dagiti amin nga annak ti ari.
28 Idin binilin ni Absalom dagiti katulonganna, a kunkunana: “Kitaenyo, pangngaasiyo, nga apaman a ti puso ni Amnon agragragsak iti arak,+ ket pudno unay a kunaek kadakayo, ‘Kabilenyo ni Amnon!’ masapul ngarud a papatayenyo. Dikay agbuteng.+ Saan kadi a siak ti nangbilin kadakayo? Bumilegkayo ket agbalinkayo a maingel a lallaki.”
29 Ket dagiti katulongan ni Absalom inaramidda ken Amnon ti kas iti imbilin ni Absalom;+ ket amin a sabsabali nga annak ti ari timmakderda ket nagsakayda tunggal maysa iti mulona ket nagtalawda.
30 Ket naaramid a, bayat nga addada iti dalan, ti met laeng damag dimteng ken David, a naikuna: “Kinabil ni Absalom ti amin nga annak ti ari, ket awan uray maysa kadakuada ti natedda.”
31 Gapu itoy timmakder ti ari ket rinay-abna dagiti pagan-anayna+ ket nagidda iti daga,+ ket amin dagiti adipenna sitatakderda idi iti sibayna a naray-ab dagiti kawesda.+
32 Nupay kasta, ni Jehonadab+ nga anak ni Simeah,+ kabsat ni David, simmungbat ket kinunana: “Saan koma a pagarupen ti apok nga amin dagiti agtutubo a lallaki nga annak ti ari ti pinapatayda, ta ni Amnon laeng ti natay,+ agsipud ta iti panagbilin ni Absalom napasamak dayta kas maysa a banag a naituding+ manipud idi aldaw a minulitanna+ ni Tamar a kabsatna.+
33 Ket ita saan koma nga ipapuso ti apok nga ari ti sao, a naikuna, ‘Amin dagiti mismo nga annak ti ari natayda’; no di ket ni Amnon laeng ti natay.”
34 Kabayatanna, nagtalaw ni Absalom.+ Idi agangay ti agtutubo a lalaki, ti managwanawan,+ intangwana dagiti matana ket kimmita, ket, adtoy! adda adu a tattao nga um-umay manipud iti dalan iti likudanna iti bakras ti bantay.
35 Gapu itoy kinuna ni Jehonadab+ iti ari: “Adtoy! Dimteng dagiti mismo nga annak ti ari. Maitunos iti sao ti adipenmo kasta ti napasamak.”+
36 Ket naaramid nga, apaman a nalpas a nagsao, adtoy dimteng a mismo ti annak ti ari, ket rinugianda nga ipigsa ti timekda ket nagsangitda; ket uray ti ari ken amin dagiti adipenna nagsangitda iti dakkel unay a panagsangit.
37 No maipapan ken Absalom, nagtaray tapno makapan ken Talmai+ nga anak ni Amihud nga ari ti Gesur.+ Ket nagtultuloy nga agleddaang+ ni David gapu iti anakna iti amin nga al-aldaw.
38 No maipapan ken Absalom, nagtaray ket napan idiay Gesur;+ ket adda idi sadiay iti tallo a tawen.
39 Kamaudiananna inil-iliw ti kararua ni David nga ari ti mapan ken Absalom; ta naliwliwanan ti bagina maipapan ken Amnon, agsipud ta natayen.
