2 Cronicas 4:1-22
4 Kalpasanna inaramidna ti gambang nga altar,+ a duapulo a kasiko ti kaatiddogna, ken duapulo a kasiko ti kaakabana, ken sangapulo a kasiko ti kangatona.+
2 Ket inaramidna ti sinukog a baybay+ sangapulo a kasiko manipud maysa a ngarabna agingga iti sabali a ngarabna, nagsirkulo iti intero nga aglikmut, ket ti kangatona lima a kasiko, ket kinasapulan ti banteng a tallopulo a kasiko tapno palikmutan ti intero nga aglikmutna.+
3 Ket adda ti kaas-asping dagiti sinantabungaw+ nga arkos iti sirokna iti intero nga aglikmut, a mangpalikmut iti dayta, sangapulo iti maysa a kasiko, a mangtikub iti baybay iti intero nga aglikmut.+ Dagiti sinantabungaw nga arkos addada iti dua nga intar, a nasukog iti sukoganna.
4 Agtaktakder dayta iti rabaw ti sangapulo ket dua a toro,+ tallo ti nakasango iti amianan ket tallo ti nakasango iti laud ket tallo ti nakasango iti abagatan ket tallo ti nakasango iti daya; ket ti baybay adda iti ngato iti rabawda, ket amin dagiti kamaudi a pasetda agpauneg.+
5 Ket ti kapuskolna sangadakulapan; ket ti ngarabna kas iti pannakaaramid ti ngarab ti maysa a kopa, maysa a sabong a lirio.+ Kas maysa a pagkargaan, tallo ribu a bat+ a sukat ti malaonna.+
6 Kanayonanna, nangaramid iti sangapulo a palanggana, ket nangikabil iti lima iti makannawan ken lima iti makannigid,+ tapno kadagita ti pagbugguan.+ Ti bambanag nga adda pakainaiganna iti daton a mapuoran+ ugasanda kadagita. Ngem ti baybay agpaay iti papadi tapno dayta ti pagbugguanda.+
7 Kalpasanna nangaramid kadagiti pagsaadan ti silaw+ a balitok, sangapuloda nga addaan agpapada a plano,+ ket inkabilna ida idiay templo, lima iti makannawan ket lima iti makannigid.+
8 Kanayonanna, nangaramid iti sangapulo a lamisaan, ket insaadna ida idiay templo, lima iti makannawan ket lima iti makannigid,+ ket nangaramid iti sangagasut a malukong a balitok.
9 Kalpasanna inaramidna ti paraangan+ ti papadi+ ken ti dakkel nga alug-og+ ken dagiti ruangan a maipaay iti alug-og, ket dagiti ruanganda kinalupkopanna iti gambang.
10 Ket ti baybay inkabilna iti makannawan a sikigan, iti daya, a sumango iti abagatan.+
11 Kamaudiananna inaramid ni Hiram dagiti lata+ ken dagiti suplad+ ken dagiti malukong.+
Iti kasta nalpas nga inaramid ni Hiram ti trabaho nga inaramidna maipaay ken Ari Solomon iti balay ti pudno a Dios.
12 Ti dua nga adigi+ ken dagiti nagbukel a paratok+ iti tuktok ti dua nga adigi ken ti dua nga aramid nga iniket+ a pangabbong iti dua a nagbukel a paratok nga adda iti tuktok dagiti adigi
13 ken ti uppat a gasut a granada+ maipaay iti dua nga aramid nga iniket, dua nga intar dagiti granada maipaay iti tunggal aramid nga iniket a pangabbong iti dua a nagbukel a paratok nga adda iti rabaw dagiti adigi,+
14 ken ti sangapulo a kareton+ ken ti sangapulo a palanggana+ iti rabaw dagiti kareton;
15 ti maysa a baybay+ ken ti sangapulo ket dua a toro iti sirokna,+
16 ken dagiti lata ken dagiti suplad+ ken dagiti tinidor+ ken amin dagiti aruatenda+ inaramid ni Hiram-abiv+ maipaay ken Ari Solomon nga agpaay iti balay ni Jehova, manipud napasileng a gambang.
17 Idiay Distrito ti Jordan sinukog ida ti ari idiay napuskol a daga iti nagbaetan ti Succot+ ken Zereda.+
18 Iti kasta inaramid ni Solomon dagitoy amin nga aruaten a nakaad-adu unay, ta ti dagsen ti gambang saan a nasinunuo.+
19 Ket inaramid ni Solomon dagiti amin nga aruaten+ nga adda iti balay ti pudno a Dios ken ti nabalitokan nga altar+ ken dagiti lamisaan+ a ti tinapay ti pamarang adda iti rabawda,
20 ken dagiti pagsaadan ti silaw+ ken dagiti pagsilawanda+ a puro a balitok, tapno gangtan ida iti sanguanan ti kaunggan a siled+ sigun iti pagannurotan;
21 ken dagiti sabong ken dagiti pagsilawan ken dagiti pangarsang,+ a balitok, (dayta idi ti kasusudian a balitok,)
22 ken dagiti pagiddep ken dagiti malukong ken dagiti kopa ken dagiti pagikkan iti apuy, a puro a balitok,+ ken ti pagserkan iti balay,+ dagiti makin-uneg a ruanganna maipaay iti Kasasantuan ken dagiti ridaw+ ti balay ti templo, a balitok.
