2 Cronicas 36:1-23
36 Idin dagiti umili ti daga innalada ni Jehoacaz+ nga anak ni Josias ket pinagbalinda nga ari a mangsandi iti amana idiay Jerusalem.+
2 Duapulo ket tallo ti tawen ni Jehoacaz idi nangrugi nga agturay, ket iti tallo a bulan nagturay idiay Jerusalem.+
3 Nupay kasta, isu inikkat ti ari ti Egipto idiay Jerusalem+ ket minultana ti daga iti sangagasut a pirak a talento+ ken maysa a balitok a talento.
4 Kanayonanna pay, ti ari+ ti Egipto pinagbalinna nga ari ni Eliakim+ a kabsatna iti Juda ken Jerusalem ket sinukatanna ti naganna iti Jehoiaquim; ngem ni kabsatna a Jehoacaz, innala ni Neco+ ket impanna idiay Egipto.+
5 Duapulo ket lima ti tawen ni Jehoiaquim+ idi nangrugi nga agturay, ket iti sangapulo ket maysa a tawen nagturay idiay Jerusalem;+ ket intuloyna nga aramiden no ania ti dakes kadagiti mata ni Jehova a Diosna.+
6 Maibusor kenkuana simmang-at+ ni Nabucodonosor+ nga ari ti Babilonia tapno parautanna babaen iti dua a gambang a grilios tapno ipanna idiay Babilonia.+
7 Ket ti sumagmamano kadagiti aruaten+ iti balay ni Jehova impan ni Nabucodonosor+ idiay Babilonia ket kalpasanna inkabilna ida iti palasiona idiay Babilonia.+
8 No maipapan iti dadduma pay kadagiti pasamak+ ni Jehoiaquim ken iti nakarimrimon+ a bambanag nga inaramidna ken iti masarakan idi maibusor kenkuana, sadiay naisuratda iti Libro+ ti Ar-ari ti Israel ken Juda; ket ni Jehoiaquin+ nga anakna nangrugi nga agturay a mangsandi kenkuana.
9 Sangapulo ket walo ti tawen ni Jehoiaquin+ idi nangrugi nga agturay, ket iti tallo a bulan+ ken sangapulo nga aldaw nagturay idiay Jerusalem; ket intuloyna nga aramiden no ania ti dakes kadagiti mata ni Jehova.+
10 Ket iti panangrugi ti tawen+ nagbaon ni Ari Nabucodonosor+ ket impanna idiay Babilonia+ agraman dagiti matarigagayan nga aruaten iti balay ni Jehova.+ Kanayonanna, pinagbalinna nga ari ni Zedekias+ a kabsat ti amana iti Juda ken Jerusalem.+
11 Duapulo ket maysa ti tawen ni Zedekias+ idi nangrugi nga agturay, ket iti sangapulo ket maysa a tawen nagturay idiay Jerusalem.+
12 Ket intuloyna nga aramiden no ania ti dakes+ kadagiti mata ni Jehova a Diosna. Saanna nga impakumbaba+ ti bagina iti sango ni Jeremias+ a mammadto+ a binilin ni Jehova.
13 Ket nagrebelde pay ken Ari Nabucodonosor,+ a namagsapata kenkuana babaen iti Dios;+ ket intultuloyna a pinasikkil+ ti tengngedna ken pinatangken+ ti pusona tapno saan nga agsubli ken Jehova a Dios ti Israel.
14 Uray dagiti amin a panguluen ti papadi+ ken dagiti met laeng umili nagaramidda iti nakaro unay a di kinamatalek, maitunos iti amin a nakarimrimon+ a bambanag dagiti nasion, iti kasta tinulawanda ti balay ni Jehova a sinantipikarna idiay Jerusalem.+
15 Ket ni Jehova a Dios dagidi ammada nagtultuloy a nagbaon maibusor kadakuada babaen kadagiti mensaherona,+ a nagbaon a maulit-ulit, agsipud ta nariknana ti panangngaasi iti ilina+ ken iti pagnaedanna.+
16 Ngem nagtultuloy nga inang-angawda+ dagiti mensahero ti pudno a Dios ken inum-umsida ti sasaona+ ken rinabrabakda+ dagiti mammadtona, agingga a simged ti pungtot+ ni Jehova iti ilina, agingga nga awan ti pannakapaimbag.+
17 Gapuna inyegna maibusor kadakuada ti ari dagiti Caldeo,+ a nangpapatay kadagiti agtutuboda a lallaki babaen ti kampilan+ idiay balay ti santuarioda,+ saanna met a narikna ti panangngaasi iti agtutubo a lalaki wenno iti birhen, iti lakay wenno iti duduogan.+ Isuamin intedna iti imana.
18 Ket amin dagiti aruaten,+ dakkel+ ken bassit, iti balay ti pudno a Dios ken dagiti gameng+ iti balay ni Jehova ken dagiti gameng ti ari+ ken dagiti prinsipena, isuamin impanna idiay Babilonia.
19 Ket pinuoranna ti balay ti pudno a Dios+ ket rinugpona ti pader+ ti Jerusalem; ket amin dagiti pagnanaedan a torrena pinuoranda iti apuy ken kasta met dagiti amin a matarigagayan nga aruatenna,+ tapno mangpataud iti pannakadadael.+
20 Kanayonanna pay, impanna a kautibo idiay Babilonia dagidiay nabati manipud iti kampilan,+ ket nagbalinda nga ad-adipen kenkuana+ ken iti annakna agingga a nangrugi ti panagturay ti naarian a pannakabalin ti Persia;+
21 tapno tungpalen ti sao ni Jehova babaen ti ngiwat ni Jeremias,+ agingga a ti daga nasulnitannan dagiti sabbathna.+ Amin dagiti aldaw a pannakapaglangalang sinalimetmetanna ti sabbath, tapno matungpal ti pitopulo a tawen.+
22 Ket idi umuna a tawen ni Ciro+ nga ari ti Persia,+ tapno maibanag ti sao ni Jehova+ babaen ti ngiwat ni Jeremias,+ ginutugot ni Jehova ti espiritu+ ni Ciro nga ari ti Persia, iti kasta pinaiwaragawagna ti maysa a pukkaw iti intero a pagarianna, ken babaen met iti surat,+ a kunkunana:
23 “Daytoy ti kinuna ni Ciro+ nga ari ti Persia, ‘Amin dagiti pagarian ti daga inted kaniak ni Jehova a Dios ti langlangit,+ ket isu pinarebbengannak nga ibangonak iti balay idiay Jerusalem, nga adda idiay Juda.+ Siasinoman nga adda kadakayo manipud intero nga ilina,+ adda koma kenkuana ni Jehova a Diosna.+ Gapuna sumang-at koma.’”+
