1 Timoteo 6:1-21
6 Amin dagiti adipen nga adda iti sidong ti sangol itultuloyda koma nga ibilang dagiti makinkukua kadakuada a maikari iti naan-anay a dayaw,+ tapno ti nagan ti Dios ken ti sursuro saan a pulos mapagsawan iti makadangran.+
2 Mainayon pay, dagidiay addaan kadagiti mamati a makinkukua+ saanda koma nga umsien ida,+ agsipud ta kakabsat ida.+ Iti kasupadina, ad-adda a sisasaganada pay koma nga agpaadipen, agsipud ta dagidiay umaw-awat iti pagimbagan ti nasayaat a panagserbida ket manamati ken dungdungnguen.
Itultuloymo nga isuro dagitoy a banag+ ken ipaay dagitoy a pammagbaga.
3 No ti asinoman a tao mangisuro iti sabali a doktrina+ ket saan nga umannugot iti makapasalun-at+ a sasao, ti sasao ni Apotayo a Jesu-Kristo, wenno uray iti sursuro a maitunos iti nadiosan a debosion,+
4 isu agtangsit buyogen ti panagpannakkel,+ a saanna a maaw-awatan ti aniaman,+ no di ket adda sakitna iti isip+ gapu kadagiti panagus-usisa ken panagdedebate maipapan iti sasao.+ Manipud kadagitoy a banag tumaud ti apal,+ ringgor, dagiti nabassawang+ a panagsasao, dagiti nadangkes a panagatap,
5 dagiti nadawel a panagsusupiat maipapan iti babassit a bambanag iti biang dagiti tattao a rinuker ti panunotda+ ken naawanan iti kinapudno,+ a pagpagarupenda a ti nadiosan a debosion ket panggun-od iti gunggona.+
6 Iti kinaagpaysuanna, dayta ket panggun-od iti dakkel a gunggona,+ daytoy nadiosan a debosion+ agraman iti pannakapnek.+
7 Ta awan ti inyegtayo iti lubong, ket saantay met a mabalin ti mangitugot iti aniaman a banag.+
8 Gapuna, no adda pagtaraon ken pagkawestayo, mapnektayon kadagitoy a banag.+
9 Nupay kasta, dagidiay determinado a bumaknang matnagda iti sulisog+ ken iti silo ken iti adu a minamaag ken makapasakit a tartarigagay,+ a mangipalned kadagiti tattao iti pannakadadael ken pannakarba.+
10 Ta ti ayat+ iti kuarta isu ti ramut+ dagiti amin a kita ti makadangran a bambanag,+ ket babaen ti panangragpat iti daytoy nga ayat nayaw-awan ti sumagmamano manipud iti pammati ket sinalputda ti intero a bagbagida iti adu nga ut-ot.+
11 Nupay kasta, sika, O tao ti Dios, umadayoka kadagitoy a banag.+ Ngem surotem ti kinalinteg, nadiosan a debosion, pammati, ayat, panagibtur, kinaalumamay ti kababalin.+
12 Makirupakka iti nasayaat a dangadang iti pammati,+ petpetam a sititibker ti agnanayon a biag a maipaay iti dayta naayabanka ken indiayam ti nasayaat a publiko a panangideklara+ iti sanguanan ti adu a saksi.
13 Iti imatang ti Dios, a mangtaginayon a sibibiag iti amin a bambanag, ken ni Kristo Jesus, a kas maysa a saksi+ inaramidna ti nasayaat a publiko a panangideklara+ iti sanguanan ni Poncio Pilato,+ ibilinko kenka+
14 a tungpalem ti pammilin iti pamay-an a di namulitan ken awan pakababalawanna agingga iti pannakaiparangarang+ ni Apotayo a Jesu-Kristo.
15 Daytoy a pannakaiparangarang ipakitanto ti naragsak ken maymaysa a Mannakabalin nga Agturay+ kadagiti bukodna a naituding a tiempo,+ yantangay isu ti Ari+ dagidiay agturay kas ar-ari ken Apo+ dagidiay agturay kas ap-appo,
16 daydiay kakaisuna nga agik-ikut iti imortalidad,+ nga agnanaed iti di maasitgan a lawag,+ nga awan maysa kadagiti tattao ti nakakita wenno mabalin a makakita kenkuana.+ Maadda koma kenkuana ti dayaw+ ken pannakabalin iti agnanayon. Amen.
17 Ibilinmo kadagidiay babaknang+ itoy agdama a sistema ti bambanag a saanda koma a napalangguad,+ ken isadagda ti namnamada, saan nga iti pagduaduaan a kinabaknang,+ no di ket iti Dios, a sibabaknang a mangipaay kadatayo iti amin a bambanag a pagragsakantayo;+
18 nga agaramidda iti naimbag,+ nga agbalinda a nabaknang iti nasayaat nga ar-aramid,+ nga agbalinda a naparabur, sisasagana a mangiranud,+
19 a sitatalged nga agurnongda+ maipaay iti bagbagida iti nasayaat a pamuon+ maipaay iti masanguanan, tapno mapetpetanda a sititibker ti pudpudno a biag.+
20 O Timoteo, saluadam ti naitalek kenka,+ nga adaywam dagiti ubbaw a panagsasao a sumalungasing iti nasantuan ken dagiti di panagtutunos ti barengbareng pannakaawagna kas “pannakaammo.”+
21 Ta iti panangiparammagda iti kasta a pannakaammo sumagmamano ti simiasi iti pammati.+
Maadda koma kadakayo ti di kaikarian a kinamanangngaasi.
