1 Timoteo 4:1-16
4 Nupay kasta, ti naipaltiing a sasao kunaenna a silalawag a kadagiti maud-udi a periodo ti tiempo+ umikayto ti sumagmamano+ manipud iti pammati, nga ipangagda dagiti makayaw-awan a naipaltiing a sasao+ ken sursuro dagiti sairo,+
2 babaen ti panaginsisingpet dagiti tattao nga agsasao kadagiti ulbod,+ namarkaanda kadagiti konsiensiada+ a kasla babaen ti pangtanda a landok;
3 nga iparitda ti pannakiasawa,+ ibilinda ti iyaadayo kadagiti taraon+ a pinarsua ti Dios+ tapno pagririnnanudan buyogen ti panagyaman dagidiay addaan pammati+ ken siuumiso a makaammo iti kinapudno.
4 Ti rason a maipaay itoy ket tunggal parsua ti Dios nasayaat,+ ket awan ti mailaksid+ no awaten dayta buyogen ti panagyaman,+
5 ta nasantipikar dayta babaen iti sao ti Dios ken iti kararag maipaay iti dayta.
6 Babaen ti panangipaaymo kadagitoy a balakad kadagiti kakabsat agbalinkanto a nasayaat a ministro ni Kristo Jesus, maysa a nataraonan iti sasao ti pammati ken iti nasayaat a sursuro+ a sinurotmo a sisisinged.+
7 Ngem laksidem ti ulbod a sarsarita+ a sumalungasing iti nasantuan ken isarsarita dagiti babbaket. Iti sabali a bangir, sanayem ta bagim buyogen ti nadiosan a debosion kas kalatmo.+
8 Ta ti panagsanay iti bagi bassit ti maigunggonana; ngem ti nadiosan a debosion+ makagunggona iti amin a bambanag,+ ta addaan kari a biag itan ken daydiay nga umay.+
9 Dayta a sao matalek ken maikari iti naan-anay a panangawat.+
10 Ta iti daytoy a panggep agtartrabahotayo a sipipinget ken umag-agawatayo,+ agsipud ta insadagtayo ti namnamatayo+ iti sibibiag a Dios, a Manangisalakan+ iti amin a kita ti tattao,+ nangnangruna kadagidiay matalek.+
11 Itultuloymo nga ipaay dagitoy a bilin+ ken isuro ida.+
12 Awan koma a pulos ti asinoman a tao a mangumsi iti kinaagtutubom.+ Iti kasupadina, kadagidiay matalek+ agbalinka a pagulidanan+ iti panagsao, iti kababalin, iti ayat, iti pammati, iti kinadalus.+
13 Bayat nga um-umayak, itultuloymo nga igaed ti bagim iti panagbasa+ iti publiko,+ iti panangbagbaga, iti panangisuro.
14 Dika liwliwayan ti sagut+ nga adda kenka a naited kenka babaen iti maysa a padles+ ken idi a ti bagi dagiti lallakay impatayda kenka dagiti imada.+
15 Utobem dagitoy a banag;+ maipamaysaka kadakuada, tapno ti panagrang-aymo+ maiparangarang iti amin a tattao.
16 Itultuloymo nga asikasuen ti bagim+ ken ti isursurom.+ Agtalinaedka kadagitoy a banag, ta babaen ti panangaramidmo iti daytoy maisalakanmonto agpadpada ti bagim ken dagidiay agimdeng kenka.+
