Magdiretso sa kaundan

Magdiretso sa listahan sang kaundan

Dapat Bala Ako Mag-entra sa Isa Ka Relihion?

Dapat Bala Ako Mag-entra sa Isa Ka Relihion?

 Pamangkot sang mga Bumalasa . . .

Dapat Bala Ako Mag-entra sa Isa Ka Relihion?

▪ Wala ka bala nagaentra sa isa ka relihion kay nakita mo ang pagkaipokrito kag ginamo sang mga miembro kag pati na sang klero? Ang imo ginabatyag pareho gid sa hulubaton sang mga Pranses, “Ang malapit sa simbahan, masami nga malayo sa Dios.”

Mahimo ginarespeto mo ang Biblia kag para sa imo, dapat respetuhon sang mga gobierno kag mga tawo ang kinamatarong sang isa sa pagpili sang relihion. Pero mahimo mamangkot ka, ‘Nagsiling gid bala ang Dios nga dapat may relihion kita para batunon niya ang aton pagsimba?’

Ang simple nga sabat, huo. Ngaa? Kag puede bala ang bisan ano lang nga relihion?

Binagbinaga si Jesus. May relihion bala sia? Sang gamay pa si Jesus, nagaupod sia sa iya Judiyo nga pamilya kag sa iban pa sa pagkadto sa templo sa Jerusalem para sa isa ka organisado nga pagsimba. (Lucas 2:41-43) Sang daku na sia, nagaupod sia sa pareho niya nga mga Judiyo sa pagsimba sa Dios sa sinagoga sa ila lugar. (Lucas 4:14-16) Sang naistorya niya ang babayi nga lain ang relihion, nagsiling sia: “Nagasimba kami sa amon nakilala.” (Juan 4:22) Ginpakita diri ni Jesus nga miembro sia sang relihion sang mga Judiyo.

Sang ulihi, nagsiling si Jesus nga bangod wala sia ginbaton sang mga Judiyo, indi man pagbatunon sang Dios ang ila tiko nga pagsimba. (Mateo 23:33–24:2) Pero, ginpakita ni Jesus nga para batunon sang Dios ang pagsimba sang isa, dapat miembro sia sang isa ka organisado nga grupo. Ginsilingan niya ang iya mga sumulunod: “Paagi sa sini ang tanan makahibalo nga kamo mga disipulo ko, kon nagahigugmaanay kamo.” (Juan 13:35) Indi mapakita sang isa ka disipulo ni Cristo ini nga gugma kon indi sia makig-upod sa iya masigkasumilimba. Maathag man nga nagsiling si Jesus nga may duha lang ka dalan ukon klase sang relihion. Ang isa ka dalan “masangkad kag malapad” nga nagapakadto “sa kalaglagan.” Dayon nagsiling sia: “Makitid ang gawang kag masipot ang dalan nga nagapadulong sa kabuhi, kag pila lamang ang nakatultol sini.”—Mateo 7:13, 14.

Kon amo, indi puede ang bisan ano lang nga relihion. Nagpaandam ang Biblia batok sa mga tawo nga ‘nagapakita-kita nga diosnon pero ginasikway nila ang gahom sang Dios.’ Dayon nagsiling ini, “Likawi ang mga tawo nga pareho sina.” (2 Timoteo 3:5, APD) Sa pihak nga bahin, daku gid ang kaayuhan kon pangitaon naton ang mga ara sa dalan nga nagapadulong sa kabuhi kag makig-upod sa ila. May magapabakod kag magasuporta sa aton subong kag may masanag kita nga paglaum.—Hebreo 10:24, 25.

Kabalo ka bala kon ano nga relihion ang ara sa makitid nga dalan? Ngaa indi mo pagtun-an ang mga sabat sang Biblia nga makita sa kapitulo 15 sang libro nga Ano Gid ang Ginatudlo Sang Biblia? * Ang mga impormasyon sa sini makabulig sa imo sa pagpili sang relihion nga imo entrahan.

[Nota]

^ par. 9 Ginhimo sang mga Saksi ni Jehova.