Magdiretso sa kaundan

Magdiretso sa listahan sang kaundan

Magpakita Pirme sang Apresasyon

Magpakita Pirme sang Apresasyon

 Sekreto 3

Magpakita Pirme sang Apresasyon

ANO ANG GINATUDLO SANG BIBLIA? “May kaangtanan sa tanan nga butang magpasalamat kamo.”—1 Tesalonica 5:18.

NGAA MABUDLAY INI HIMUON? Ang kalabanan nga tawo subong bugalon kag wala nagapasalamat, kag puede kita malatnan sini nga mga batasan. (2 Timoteo 3:1, 2) Magluwas sini, bisan pa masako na kita, ginadugangan pa gid naton ang aton obra. Mahimo nga kadamo gid sang aton problema ukon mga ginahandum. Gani indi na naton maapresyar ang ara sa aton ukon indi na mapasalamatan ang ginahimo sang iban para sa aton.

ANO ANG PUEDE MO HIMUON? Pamensara pirme ang maayo nga mga butang nga ara sa imo. Ibutang ta nga kabug-at gid sang imo mga problema. Pero dumduma si Hari David. May mga tion nga daw indi na niya masarangan ang mga kabudlayan. Bisan pa sini, nangamuyo sia sa Dios: “Nagapamalandong ako sang tanan mong hinimoan; nagapanghunahuna ako sang binuhatan sang imo mga kamut.” (Salmo 143:3-5) Ginpakita gihapon ni David ang apresasyon kag pagkakontento sa pihak sang iya mga problema.

Dumduma ang nabulig sang iban sa imo, kag pasalamati sila. Isa gid ka maayo nga halimbawa si Jesus sa sini nga bahin. Sang ginbubo sang iya abyan nga si Maria ang malahalon nga lana sa iya ulo kag mga tiil, ang iban namangkot: “Ngaa gin-uyangan ang mahumot nga lana?” * Para sa ila, mas maayo nga ibaligya na lang ang lana kag ihatag ang kuarta sa mga imol. Si Jesus nagsabat: “Pabay-i ninyo sia. Ngaa ginagamo ninyo sia?” Dayon, sia nagsiling: “Ginhimo niya ang iya masarangan.” (Marcos 14:3-8; Juan 12:3) Imbes nga munuhon ang wala mahimo ni Maria, gin-apresyar ni Jesus ang iya nahimo.

Naapresyar lamang sang iban ang ila pamilya, mga abyan, ukon ang iban pa nga butang sang wala na ini. Malikawan mo ini kon pamensaron mo ang maayo nga mga butang nga ara sa imo subong. Dumduma pirme ukon ilista ang mga butang nga ginapasalamatan mo gid.

Ang “tagsa ka maayong dulot” nagahalin sa Dios, gani dapat gid naton sia pasalamatan paagi sa pangamuyo. (Santiago 1:17) Kon padayon naton ini nga ginahimo, mapakita naton pirme ang apresasyon kag mangin kontento kita.—Filipos 4:6, 7.

[Nota]

^ par. 6 Sang unang siglo, ang pagbubo sing lana sa ulo sang bisita tanda sang pagkamaabiabihon; kon sa tiil naman tanda sang pagkamapainubuson.

[Retrato sa pahina 6]

Ginapasalamatan mo bala ang ginahimo sang iban para sa imo?