“HANDA ka na bala?” May nagpamangkot na bala sini sa imo?— Bueno, mahimo nga ang pamangkot nagakahulugan sing: ‘Dala mo bala ang imo mga libro? Nabasa mo bala ang imo leksion?’ Subong sang isugid ko sa imo, handa si Timoteo.

Desidido man si Timoteo. Kabalo ka bala sang buot silingon sini?— Sang ginhagad si Timoteo nga mag-alagad sa Dios, ang iya sabat daw pareho sa sabat sang isa ka alagad sang Dios, nga nagsiling: “Yari ako! Ipadala ako.” (Isaias 6:8) Bangod handa kag desidido nga mag-alagad si Timoteo, nangin malipayon ang iya kabuhi. Gusto mo bala nga istoryahan ta ka parte sa iya?—

Natawo si Timoteo sa Listra, nga ginatos ka kilometro ang kalayuon gikan sa Jerusalem. Ang iya lola nga si Loida kag ang iya nanay nga si Eunice, nagatuon sing maayo sa Kasulatan. Amo nga bisan lapsag pa lang si Timoteo, gintudlo na sa iya ang Pulong sang Dios.​—2 Timoteo 1:5; 3:15.

Ayhan mga tin-edyer pa si Timoteo sang nagbisita sanday apostol Pablo kag Bernabe sa Listra, sa ila una nga malawig nga paglakbay agod magbantala. Mahimo gid nga sa sini nga tion nangin mga Cristiano ang nanay kag lola ni Timoteo. Gusto mo bala mahibaluan kon ano ang natabo kanday Pablo kag Bernabe?— Abi mo, may mga tawo nga akig sa mga Cristiano. Gani, ginbato nila si Pablo. Dason, ginkastigo nila sia kag ginguyod paggua sa siudad. Abi nila patay na sia.

Apang, ginkadtuan si Pablo sang mga nagapati sa iya ginatudlo, kag nagbangon sia. Pagkaaga, naglakat sanday Pablo kag Bernabe, pero wala madugay nagbalik man sila dayon sa Listra. Pagbalik nila, nagpamulongpulong si Pablo kag ginsilingan ang mga disipulo: “Dapat kita magsulod sa ginharian sang Dios paagi sa madamo nga kapipit-an.” (Binuhatan 14:8-22) Naintiendihan mo bala ang buot silingon ni Pablo?— Buot niya silingon nga awayon ukon hingabuton sang iban ang mga nagaalagad sa Dios. Ginsulatan sang ulihi ni Pablo si Timoteo: ‘Ang tanan  nga luyag magkabuhi nga may diosnon nga debosyon pagahingabuton.’​—2 Timoteo 3:12; Juan 15:20.

Halin sa Listra, nagpauli dayon sanday Pablo kag Bernabe. Pagligad sang pila ka bulan, gin-upod ni Pablo si Silas, kag ginbalikan nila ang mga duog nga ginbisitahan anay ni Pablo agod palig-unon ang bag-o nga mga disipulo. Pag-abot nila sa Listra, nalipay gid si Timoteo sang magkitaay sila liwat ni Pablo! Nagdugang pa gid ang kalipay ni Timoteo sang ginhagad sia nga mag-upod sa paglakbay nanday Pablo kag Silas. Nagpasugot si Timoteo. Handa sia kag desidido nga mag-upod.​—Binuhatan 15:40–16:5.

Naglakat sila nga tatlo sing tuman ka layo, kag dason nagsakay sila sa barko. Sang makadungka na sila, naglakat sila liwat pakadto sa Tesalonica nga sakop sang Gresya. Sa sini nga duog madamo ang nangin Cristiano. Apang madamo ang naakig kag nagtipon agod sakiton sanday Pablo. Delikado sanday Pablo, Silas, kag Timoteo diri, gani nagkadto na lang sila sa Berea.​—Binuhatan 17:1-10.

Nabalaka gid si Pablo sa bag-o nga mga alagad sang Dios sa Tesalonica, gani ginpabalik niya didto si Timoteo. Kabalo ka bala kon ngaa?— Ang rason ginpaathag sang ulihi ni Pablo sa mga Cristiano sa Tesalonica: ‘Agod palig-unon kamo kag lugpayan kamo agod wala sing maluyahan sing buot.’ Kabalo ka bala kon ngaa ginpakadto ni Pablo ang pamatan-on nga si Timoteo sa sining delikado nga asaynment?— Kay man, indi kilala sang mga kaaway si Timoteo, kag desidido sia nga maglakat. Maisog gid si Timoteo! Ano ang natabo sa iya pagbisita? Sang magbalik si Timoteo, ginsugiran niya si Pablo nga matutom gid sa Dios ang mga taga-Tesalonica. Gani ginsulatan sila ni Pablo: “Nalugpayan kami tungod sa inyo.”​—1 Tesalonica 3:2-7.

Sang madason nga napulo ka tuig, nag-alagad si Timoteo upod kay Pablo. Dason, napriso si Pablo sa Roma. Gin-updan sia didto ni Timoteo, nga bag-o man lang makagua sa prisuhan. Sang yara sia sa prisuhan, ginsulatan ni Pablo ang mga taga-Filipos. Mahimo nga si Timoteo ang iya ginpasulat sini. Si Pablo nagsiling: ‘Nagalaum ako nga mapadala ko si Timoteo sa inyo, kay wala na ako sing iban pa nga matutom kag makaalagad sa inyo sing mas maayo.’​—Filipos 2:19-22; Hebreo 13:23.

Nalipay gid si Timoteo sa ginsiling ni Pablo! Palangga gid ni Pablo si Timoteo bangod handa sia kag desidido nga mag-alagad. Tani, mangin pareho ka man sa iya.