Magdiretso sa kaundan

Magdiretso sa listahan sang kaundan

Diin Matabo ang Inaway sang Armagedon?

Diin Matabo ang Inaway sang Armagedon?

 Pamangkot sang Amon Bumalasa

Diin Matabo ang Inaway sang Armagedon?

Ang inaway sang Armagedon indi matabo sa isa ka partikular nga duog. Sa baylo, ang bug-os nga kalibutan amo ang mangin patag-awayan sini. Ngaa? Bangod ang magakontrahanay tuman kadamo kag indi sila makaigo sa isa lang ka duog.

Ang Armagedon, ukon Har–Magedon, ginatawag man nga “inaway sang daku nga adlaw sang Dios nga Labing Gamhanan.” Gamiton ni Jehova nga Dios ang iya Anak nga si Cristo Jesus, agod tipunon ang iya mga anghel batok sa nagtingob nga mga puersa sang malaut nga mga gumalahom sang duta.​—Bugna 16:14; 19:11-16.

Ang mga pungsod mahimo nga impluwensiahan sang mga puersa ni Satanas nga mag-entra sa sini nga inaway. Ginsambit sang Biblia ‘ang pinamulong sang mga demonyo’ nga nagakadto “sa mga hari [gumalahom] sang bug-os napuy-an nga duta, agod tipunon sila sa . . . duog nga ginatawag sa Hebreo Har–Magedon.”​—Bugna 16:14-16.

Ang tulun-an lamang sang Bugna sa Biblia ang nagpukaw sang interes sang madamo nga bumalasa tuhoy sa Armagedon, kag luyag gid nila hibaluon ang kahulugan sini. Madamo ang naghangop sini sing literal. Amo nga ginabantayan nila ang mga hitabo sa duog nga ila ginapatihan nga didto matabo ang inaway. Ang pagpati nga ang Armagedon isa ka partikular nga duog, masapwan sa pinakadaan apang nagaluntad pa tubtob karon nga Griego nga komentaryo tuhoy sa Bugna. Ginsulat ini ni Oecumenius sang ikan-om nga siglo C.E.

Si John F. Walvoord, nga presidente anay sang Dallas Theological Seminary nagaugyon sa pagtamod sang Pundamentalista nga mga klero. Nagsiling sia nga ang Armagedon amo “ang katapusan kag desperado nga inaway sang kalibutan nga matabo sa Natung-an nga Sidlangan.” Suno kay Walvoord, ining daku nga inaway sa palaabuton matabo sa “‘Bukid sang Megido,’ nga isa ka diutay nga bukid nga nahamtang sa dulunan sang isa ka malapad nga nalupyakan, sa naaminhan nga Palestina.”

Apang, wala ginatudlo sang tulun-an sang Bugna nga may literal nga duog nga ginatawag nga Armagedon. Suno sa nagabukas nga mga tinaga sini, ini nga rekord ginapahayag “paagi sa mga tanda.” (Bugna 1:1) Halin pa sang una, nagsiling na ang mga Saksi ni Jehova sa ila libro nga Studies in the Scriptures, Tomo IV: “Wala naton ginapaabot nga literal nga matipon ang mga tawo sa Bukid sang Megido.”

Ginpakita sang mga inaway sang una sa Megido nga wala gid nakapalagyo ang mga kaaway sang Dios. Gani, sa Armagedon, pat-uron gid sang Dios nga madula ang tanan nga kagarukan kag kalautan sa bug-os nga kalibutan.​—Bugna 21:8.

Ang mga nagahigugma kay Jehova nga Dios kag sa iya Anak nga si Jesucristo, indi dapat mahadlok sa Armagedon. Magapakig-away lamang ang Dios sa mga di-mahinulsulon nga mga malaut. Ang mga malauton lamang ang iya laglagon. “Nahibaluan ni Jehova kon paano luwason ang mga tawo nga may diosnon nga debosyon,” siling sang Biblia. (2 Pedro 2:9) Ang Salmo 37:34 may makalilipay nga saad: “Hulata ang GINOO, kag bantayi ang iya dalanon, kag sia magapataas sa imo sa pagpanubli sang duta; kon ang malauton utdon makita mo ini.”