Magdiretso sa kaundan

Magdiretso sa listahan sang kaundan

Armagedon Inaway sang Dios nga Magadula sang Tanan nga Inaway

Armagedon Inaway sang Dios nga Magadula sang Tanan nga Inaway

 Armagedon​—Inaway sang Dios nga Magadula sang Tanan nga Inaway

“Sa ila pagtamod, tuman kalain ang pagpatay sa ila isigkatawo; gani ang inaway ila ginakangil-aran kag wala nila ginahunahuna, amo nga wala sila sing tinaga para sa sini.”​—ANG PAGLARAGWAY SANG TAGA-NORWAY NGA MANUGLAGULAD NGA SI FRIDTJOF NANSEN SA TUMANDOK NGA MGA INUIT SA GREENLAND SANG 1888.

SIN-O ang indi luyag magkabuhi sa komunidad nga ang inaway ‘ginakangil-aran kag wala ginahunahuna’? Sin-o ang indi maghandum sang kalibutan nga bisan ang tinaga nga inaway wala ginahambal kay wala man sing nagailinaway? Daw imposible ini matabo, labi na gid kon saligan lang naton ang mga tawo.

Apang, sa tagna ni Isaias, ang Dios nagsaad nga pahanabuon niya ini nga kahimtangan: “Ang ila mga espada salsalon nila nga mga punta sang arado, kag ang ila mga bangkaw nga mga galab nga inughagbas; ang pungsud indi magbayaw sing espada batok sa pungsud, kag indi na sila magtoon sing inaway.”​—Isaias 2:4.

Agod matuman ini nga saad, maathag nga daku ang kinahanglan bag-uhon sa kalibutan karon nga may 20 milyones ka soldado kag mga 20 ka inaway nga nagakatabo. Gani, indi na kita matingala kon ngaa ang labing gamhanan nga Dios, si Jehova, magapasilabot sa mga ginahimo sang tawo. Ini nga pagpasilabot ni Jehova magadangat sa ginasiling sang Biblia nga Armagedon.​—Bugna 16:14, 16.

Sining karon lang nga mga tinuig, ang tinaga nga “Armagedon” ginahangop subong bug-os kalibutan nga kalaglagan paagi sa nuklear nga mga bomba. Apang, ginlaragway sang isa ka diksionaryo ang panguna nga kahulugan sini nga tinaga: “Ang lugar sang daku kag katapusan nga inaway sang mga puersa sang maayo kag malain.” Malutos ayhan sang maayo ang malain? Ukon ini bala nga inaway isa ka sugilanon nga ginhimuhimo lang?

Ang Biblia sulitsulit nga nagsambit tuhoy sa katapusan sang kalautan, kag malugpayan kita kon binagbinagon naton ini. Ang salmista nagtagna: “Mapapas sa duta ang mga makasasala, kag mawala ang mga malauton!” (Salmo 104:35) “Ang matadlong magapuyo sa duta, kag ang himpit magapabilin sa sini,” siling sang tulun-an sang Hulubaton. “Apang ang malauton utdon gikan sa duta, kag ang maluib gabuton sa sini.”​—Hulubaton 2:21, 22.

Maathag man suno sa Biblia nga ang mga malauton indi mangampo sing mahidaiton, gani kinahanglan ang katapusan nga inaway nga magagikan sa Dios agod madula ang tanan nga kalautan, lakip ang inaway. (Salmo 2:2) Ining pinasahi nga inaway nga gintawag sang Biblia nga Armagedon talalupangdon gid.

 Mga Inaway Sadto sa Megido

Ang tinaga nga “Armagedon” nagakahulugan sing “Bukid sang Megido.” Ang dumaan nga Megido lakip ang Kapatagan sang Jezreel nga yara sa palibot sini may malawig nga maragtas sang mga inaway. “Sa bug-os nga maragtas, natabo sa Megido kag sa Nalupyakan sang Jezreel ang mga inaway nga nagbag-o sa kahimtangan sang mga pungsod nga nag-inaway,” sulat sang istoryador nga Eric H. Cline sa libro nga The Battles of Armageddon.

Subong sang ginsiling ni Cline, nagbag-o ang kahimtangan sang mga pungsod nga nag-inaway sa Megido. Halimbawa, ang mga Mongol nga nagsakop sa madamo nga lugar sa Asia sang ika-13 nga siglo nalutos sa una nga tion sa sini nga nalupyakan. Sang Bug-os Kalibutan nga Inaway I, ginlutos sang puersa militar sang Britanya sa pagpanguna ni Heneral Edmund Allenby ang mga Turko malapit sa Megido. Ginlaragway sang isa ka soldado nga istoryador ang pagdaug ni Allenby subong “isa sa pinakamadasig nga pagsalakay kag pinakamadinalag-on nga inaway sa bug-os nga maragtas.”

Ang talalupangdon nga mga inaway nga nasulat sa Biblia natabo man malapit sa Megido. Diri ginlutos ni Hukom Barak ang Canaanhon nga hangaway ni Sisera. (Hukom 4:14-16; 5:19-21) Subong man, ginlutos ni Gideon kag sang iya 300 lang ka tinawo ang tuman kadamo nga hangaway sang mga Midianhon sa sini nga lugar. (Hukom 7:19-22) Sang ginlutos sang hangaway sang mga Filistinhon ang hangaway sang mga Israelinhon, si Hari Saul kag ang iya anak nga si Jonatan napatay sa Bukid Gilboa nga malapit lang sa Megido.​—1 Samuel 31:1-7.

Ang Megido maayo nga lokasyon agod mahimo sang mga hangaway ang ila estratehiya. Gani sang nagligad nga mga 4,000 ka tuig, nangin lugar ini sang tuman kadamo nga inaway. Suno sa pag-isip sang isa ka istoryador, natabo diri ang di-magkubos 34 ka inaway!

Ang kasaysayan sang Megido kag ang lokasyon sini pat-od gid nga naangot sa malaragwayon nga paggamit sang tinaga nga “Armagedon.” Bisan makaisa lang ginsambit sa Biblia ini nga tinaga, ang impormasyon tuhoy sini sa tulun-an sang Bugna nagapakita gid nga magaapektar ang Armagedon sa kabuhi sang tanan nga tawo sa kalibutan.

 Ang Armagedon Suno sa Biblia

Bisan madamo nga inaway ang natabo malapit sa Megido, wala sini madula ang kalautan. Wala pa madula sing bug-os sang puersa sang maayo ang puersa sang malain. Si Jesus nagsiling anay nga “wala sing isa nga maayo, kundi ang Dios lamang.” (Lucas 18:19) Gani, dapat lang nga magagikan sa Dios ini nga inaway. Dugang pa, maathag nga ginpatuhuyan sang Biblia ang Armagedon subong inaway sang Dios.

Sa Biblia, ang tulun-an sang Bugna nagsiling nga ang “mga hari sang bug-os napuy-an nga duta” pagatipunon “sa inaway sang daku nga adlaw sang Dios nga Labing Gamhanan.” (Bugna 16:14) Nagsiling dayon ini nga tagna: “Kag gintipon sini sila sa duog nga ginatawag sa Hebreo Har–Magedon,” ukon Armagedon. * (Bugna 16:16) Pagkatapos sini, ang Bugna nagpaathag nga ‘ang mga hari sang duta kag ang ila mga kasuldadusan magatipon agod magpakig-away sa isa nga nagasakay sa kabayo kag sa iya kasuldadusan.’ (Bugna 19:19) Ining nagasakay sa kabayo wala sing liwan kundi si Jesucristo.​—1 Timoteo 6:14, 15; Bugna 19:11, 12, 16.

Gani, may matun-an kita sa sini nga mga bersikulo. Matun-an naton nga ang Armagedon amo ang inaway sang Dios kag sang mga puersa sang malinapason nga katawhan. Ngaa makig-away si Jehova kag ang iya Anak nga si Jesucristo sa sini nga inaway? Una, ‘laglagon sa Armagedon ang mga nagalaglag sang duta.’ (Bugna 11:18) Dugang pa, paluntaron sang Armagedon ang paghidait sa kalibutan, “ang bag-ong duta nga ginahulat naton suno sa . . . saad [sang Dios],” diin “magapuyo ang pagkamatarong.”​—2 Pedro 3:13.

Ngaa Importante ang Armagedon?

Mahimo nga indi mo mahangpan kon ngaa si Jehova, nga “Dios sang gugma,” magasugo sa iya  Anak, nga “Principe sang Paghidait,” sa pagpakig-away. (2 Corinto 13:11; Isaias 9:6) Agod mahangpan mo ang rason, kinahanglan nga usisaon mo ang ila katuyuan. Ang tulun-an sang Salmo nagalaragway kay Jesus subong hangaway nga handa sa pagpakig-away. Ngaa makig-away sia? Ang salmista nagpaathag nga si Cristo magapakig-away “bangud sang kamatooran kag sang pagkamapainubuson kag pagkamatarung.” Magapakig-away sia bangod ginahigugma niya ang pagkamatarong kag ginakaugtan niya ang kalautan.​—Salmo 45:4, 7.

Subong man, ginalaragway sang Biblia kon ano ang ginabatyag ni Jehova sa wala sing katarungan nga kalibutan karon. “Ang GINOO nakakita sini, kag nagalain ang iya buot nga wala nagaluntad ang katarungan,” sulat sang manalagna nga si Isaias. “Isuksok niya ang pagkamatarong kaangay sang bayu nga indi madutlan sang hinganiban, kag ang pagdaog kaangay sang isa ka helmet. Pabayuan niya ang iya kaugalingon sang daku nga handom sa pagtadlong sang tanan nga mga butang, sa pagsilot kag pagbalos sang mga sala nga ginaantos sang mga tawo.”​—Isaias 59:15, 17, Maayong Balita nga Biblia.

Mientras nagagahom pa ang malauton nga mga tawo, ang paghidait kag kalig-unan indi maeksperiensiahan sang mga tawo nga matarong. (Hulubaton 29:2; Manugwali 8:9) Sa pagkamatuod, indi naton makuha ang kagarukan kag kalautan sa mga tawo nga nagahimo sini. Gani, ang matuod nga paghidait kag katarungan maeksperiensiahan lamang kon madula na ang mga malauton. “Ang malauton gawad tungud sa matarung,” sulat ni Hari Solomon.​—Hulubaton 21:18.

Ang Dios amo ang Hukom, gani mapat-od naton nga nagakabagay gid ang paghukom sa mga malauton. “Indi bala maghimo sing matarung ang Hukom sang bug-os nga duta?” pamangkot ni Abraham. Bilang sabat, natun-an ni Abraham nga matarong si Jehova sa tanan nga tion! (Genesis 18:25) Dugang pa, ginapasalig kita sang Biblia nga wala nahamuot si Jehova sa paglaglag sa malauton; ginahimo lang niya ini kon wala na sing iban nga paagi.​—Ezequiel 18:32; 2 Pedro 3:9.

Talupangda sing Serioso ang Armagedon

Sa diin kita dampig sa sining inaway? Ang kalabanan sa aton magasiling dayon nga dampig kita sa puersa sang maayo. Apang paano naton ini mapat-od? Ang manalagna nga si Sofonias naglaygay: “Pangitaa ang pagkamatarung, pangitaa ang pagkamapainubuson.” (Sofonias 2:3) Si apostol Pablo nagsiling nga kabubut-on sang Dios nga “ang tanan nga sahi sang mga tawo maluwas kag makadangat sa sibu nga ihibalo tuhoy sa kamatuoran.”​—1 Timoteo 2:4.

Ang pagtuon sing kamatuoran tuhoy kay Jehova kag sa iya katuyuan nga dulaon sa duta ang kalautan amo ang una nga paagi agod maluwas. Ang ikaduha amo ang paghimo sing pagkamatarong, agod kahamut-an kita kag amligan sang Dios.

Sa pagkamatuod, kon ginahimo naton ining importante nga mga paagi, kalangkagan gid naton ang pag-abot sang Armagedon, ang inaway nga magadula sang pag-ilinaway sang tawo. Pagkatapos sang Armagedon, ang inaway kangil-aran kag indi na paghunahunaon sang mga tawo sa bug-os nga duta. “Indi na sila magtoon sing inaway.”​—Isaias 2:4.

[Footnote]

^ par. 17 Para sa pagbinagbinag kon bala ang Armagedon literal nga lugar, tan-awa ang artikulo nga “Pamangkot sang Amon Bumalasa,” sa pahina 31.

[Blurb sa pahina 5]

Ang pagpasilabot sang Dios sa mga ginahimo sang tawo ginatawag nga Armagedon

[Piktyur sa pahina 6]

Megido

[Piktyur sa pahina 6]

Si Gideon kag ang iya mga tinawo nagdaug sa inaway malapit sa Megido

[Piktyur sa pahina 6, 7]

Pagkatapos sang Armagedon, ang inaway kangil-aran kag indi na paghunahunaon sang mga tawo sa bug-os nga duta

[Piktyur sa pahina 8]

Ang pagtuon sing kamatuoran tuhoy kay Jehova kag sa iya katuyuan amo ang una nga paagi agod maluwas