Ang Biblia nagsiling nga ang ‘espirituwal’ nga mga tawo, ukon mga tawo nga nagapabalor sang ila relasyon sa Dios, amo ang nagapabalor sang iya mga pagtamod kag nagakabuhi base sa iya mataas nga mga talaksan. Baliskad ini sa mga tawo nga indi gusto magpagiya sa Dios, nga nagasalig lang sa ila kaugalingon nga mga ginapatihan. Ginapasundan man nila ang ila kaugalingon nga mga handum.—Judas 18, 19; Efeso 5:1.

PRINSIPIO SA BIBLIA: “Kon maluya ang imo buot sa tion sang kabudlayan, magaluya man ang imo kusog.”—Hulubaton 24:10, footnote.

ANO ANG BUOT SILINGON SINI? Kon maluya ang aton buot mahimo madulaan kita sing kusog nga maatubang ang mga problema sa kabuhi. Sa pihak nga bahin, ang paglaum magahatag sa aton sing kabakod nga magpadayon. Maumpawan ka gid kon mahibaluan mo nga ang mga problema naton subong temporaryo lamang; ang matuod, mahimo may maayo pa ini nga epekto sa aton.

ANO ANG MAHIMO MO? Mangin positibo sa imo pagtan-aw sa palaabuton. Likawi nga magkabalaka sa basi matabo ukon maghulat sa perpekto gid nga tion. Sa baylo magpanikasog para malab-ot mo ang imo mga tulumuron. Huo, ang “wala ginapaabot nga hitabo” mahimo matabo sa aton. (Manugwali 9:11) Pero sa masami wala man nagakatabo ang aton mga ginakabalak-an. Gani amo sini ang pag-ilustrar sang Biblia: “Isab-ug ang imo binhi sa aga tubtob sa gab-i; kay wala ka makahibalo kon diin ang magatubo, ini ukon ina, ukon pareho ini nga magtubo.”—Manugwali 11:6.

PRINSIPIO SA BIBLIA: “Hatagi ako sing paghangop . . . Ang imo pulong kamatuoran.” —Salmo 119:144, 160.

 ANO ANG BUOT SILINGON SINI? Ang Biblia may sabat sa importante nga mga pamangkot sang mga tawo. Halimbawa, nagasabat ini sa mga pamangkot pareho sang

• Diin kita naghalin?

• Ngaa ari kita diri?

• Ano ang matabo kon mapatay ang tawo?

• Amo lang bala sini ang kabuhi?

Minilyon sa bilog nga kalibutan ang nag-uswag ang kabuhi bangod gin-usisa nila ang mga sabat sang Biblia sa sini kag sa iban pa nga mga pamangkot.

ANO ANG MAHIMO MO? Hibalua kon ano ang ginatudlo sang Biblia. Pangabaya ang isa sa mga Saksi ni Jehova nga buligan ka nga maintiendihan ang Biblia. Kadtui ang amon website, jw.org, ukon tambungi ang isa sa amon miting. Wala ini sing bayad kag bukas sa bisan sin-o nga gusto magkadto.

HUNAHUNAA PIRME ANG IMO RELASYON SA DIOS.

“Malipayon ang mga mahunahunaon sa ila espirituwal nga kinahanglanon.”—MATEO 5:3.

KILALAHA PA GID ANG DIOS SA BIBLIA.

‘Pangitaa ang Dios, kag makita mo sia, indi sia malayo sa tagsa sa aton.’—BINUHATAN 17:27.

BASAHA KAG PAMALANDUNGI ANG MENSAHE SANG BIBLIA.

“Nagakalipay sia sa kasuguan ni Jehova, * kag ginapamalandungan niya ang Iya kasuguan adlaw kag gab-i. . . . Ang tanan nga ginahimo niya magamadinalag-on.”—SALMO 1:2, 3, footnote.