Magdiretso sa kaundan

Magdiretso sa listahan sang kaundan

Panglawas

Panglawas

Ang Biblia indi libro parte sa medisina. Pero may mga laygay ini kon paano mangin mas maayo ang panglawas. Binagbinaga ang pila ka prinsipio sa Biblia nga makabulig sa imo.

HALUNGI ANG IMO LAWAS

PRINSIPIO SA BIBLIA: “Wala sing tawo nga nagadumot sa iya kaugalingon nga lawas, kundi ginapakaon kag ginapalangga niya ini.”—Efeso 5:29.

ANO ANG BUOT SILINGON SINI? Ini nga prinsipio sa Biblia nagapalig-on sa aton nga halungan ang aton panglawas. Ginapakita sang isa ka pagtuon nga madamo sang problema sa panglawas ang resulta sang indi maayo nga estilo sang pagkabuhi. Gani kon maayo ang aton paagi sa pagkabuhi mangin maayo man ang aton panglawas.

ANO ANG MAHIMO MO?

  • Pagkaon. Magkaon sing masustansia nga pagkaon kag mag-inom sing bastante nga tubig.

  • Ehersisyo. Makabulig sa imo ang ehersisyo bisan ano man ang imo edad, bisan dis-ebol ukon may balatian ka man. Makabulig ang imo mga pinalangga kag ang mga doktor sa imo programa sang pag-ehersisyo, pero dapat may himuon ka para mangin madinalag-on ini!

  • Tulog. Ang sigesige nga kakulang sing tulog mahimo magresulta sa malala nga mga balatian. Bangod sa indi maayo nga paggamit sing tion, madamo ang kulang sing tulog. Pero kon bastante ang imo tulog, mangin mas maayo ang imo kabuhi.

UNTATI ANG INDI MAAYO NGA BATASAN

PRINSIPIO SA BIBLIA: “Tinluan naton ang aton kaugalingon sa tanan nga nagapahigko sang lawas kag tagipusuon.”—2 Corinto 7:1.

ANO ANG BUOT SILINGON SINI? Makabenepisyo kita kon wala naton ginahalitan ang aton lawas sang makahalalit nga mga butang pareho sang tabako, nga sa masami nagaresulta sa malala nga mga balatian kag kamatayon.

 ANO ANG MAHIMO MO? Magdesisyon kon san-o mo untatan ang imo bisyo kag markahi ini sa imo kalendaryo. Isa ka adlaw antes sini nga petsa, ihaboy ang mga sigarilyo, ashtray, lighter, kag iban pa nga gamit nga naangot sa sining makahalalit nga bisyo. Likawi ang mga lugar nga madamo ang nagapanigarilyo. Sugiri ang imo mga abyan nga makabulig sa imo plano.

IBAN PA NGA PRINSIPIO SA BIBLIA

Mahimo ka makapangayo sing naimprinta nga kopya sang Biblia sa mga Saksi ni Jehova sa inyo lugar

MANGIN MAHALUNGON.

“Kon magpatindog kamo sing bag-o nga balay, himuan ninyo sing barandilya ang inyo atop agod wala sing mahulog kag indi makasala sa dugo ang inyo panimalay.”—DEUTERONOMIO 22:8.

KONTROLA ANG IMO KAAKIG.

“Ang indi dali maakig nagapakita sing masangkad nga paghangop, apang ang indi mapinasensiahon nagapakita sang iya kabuangan.”—HULUBATON 14:29.

INDI MANGIN SOBRA KA PALAKAON.

“Indi ka . . . mangin palakaon.”—HULUBATON 23:20.