Yayandikwaga na Yowane 9:1-41
9 Yesu abere ali agera, abona omulume waliri mpumi kurhenga aburhwa.
2 Abanafunzi bage bamubaza: “Mwalimu, inde walijirire echaha, oyula muntu changwa abazere bage omu kuntu aburhwe ey’ali mpumi?”
3 Yesu ashubiza: “Arhali oyula mulume yiwajirire echaha changwa abazere bage, aliko byabere ntyo y’ebijiro bya Mungu biyerekanwa kugerera ehali yage.
4 Rhukwanene kukola akasi k’olala wantumaga burhaza kuyira; obudufu bwayinjire amango nta muntu wachigala kukola.
5 Amango moshi indi omu gulu indi mwangaza gw’egulu.
6 Amalire kuderha ntyo, achira ahashi akola ebyondo n’amachanira mage abishiga oku masu m’oyola mulume.
7 Amubwira ntya: “Genda okalabe amasu omu chisima che Silowamu,” (Amango chamatafsiribwa k’okuderha “Amenji Marhumirwe”). Ava agenda, aja kukalaba, agaluka eyi ali abona.
8 Abaturanyi n’abandi bantu bagendaga bazigana kubona oyola muntu ali ahema barhondera kuderha: “Arhali olala muntu oyula wagendaga ayikala ey’ali ahemuza si?”
9 Baguma baliri baderha: “Nechi yewe.” Abandi banaderha: “Nanga ashushire naye konyine.” Aliko oyola muntu aliri aderha: “Nechi nyono.”
10 Bava bamubaza: “Bobola si, gurhe amasu mawe mafungukaga?”
11 Ashubiza: “Omulume onayirikwa Yesu alikolere ebyondo amabishiga oku masu mani, amambwira, ‘Genda e Silowamu okalabe amasu.’ Namava najayo namakalaba, namarhondera kubona.”
12 Eju y’echola bamubaza: “Ngahe oyola muntu ali? Ashubiza: “Intenji.”
13 Baheka oyola muntu orhagendaga abona burhanzi emunda Abafarisayo bali.
14 Olusiku Yesu akolaga ebyola bintu n’okufungula amasu mage lwaliri lusiku lwe Sabato.
15 Agola mango Abafarisayo nabo barhondera kumubaza gurhe amasu mage marhonderaga kubona. Ababwira ntya: “Alihebere ebyondo oku masu mani, namakalaba amasu inandi nabona.”
16 Bafarisayo baguma barhondera kuderha: “Oyula muntu arharhengerere emwa Mungu, bulala arhali akenga e Sabato. Abandi baderha: “Gurhe omunyabyaha akakola ebisomerene bili nk’ebila?” Hava haba okurhayunvikana ahakagarhi kabo.
17 Bashuba kubaza oyola mulume waliri mpumi ntya: “Woyo bichi oderhere oku bilolere oyola muntu? Bulala woyo w’afungwire amasu.” Oyola mulume aderha: “Ali mulebi.”
18 Aliko Abayuhudi barhaliyemerere oku arhulaga aba mpumi, kugera aha bahamagaliraga abazere b’oyola mulume walikala ali abona.
19 Babaza abazere bage: “Oyula ye mugala wenyu muli mwaderha oku aburhwaga ey’ali mpumi? Bobunola gurhe akala ali abona?”
20 Abazera bage bashubiza: “Rhumenyere oku ali mugala werhu n’oku aburhwaga y’ali mpumi.
21 Aliko oku bilolere okuntu byabere y’aba eyi akala ali abona, rhurhamenyere; n’oku bilolere owafungula amasu mage, rhurhamuyinji. Mumubaze, akala muntu mukulu, achiderhere.”
22 Abazere bage baderhaga ntyo okwenge baliyubahire Abayahudi, bulala babaga bayunvikene k’omuntu yeshi-yeshi wakayemera oku Yesu ye Kristu bamufukuza n’okumucha omu sinagogi.
23 Echola che charhumaga abazere bage baderha: “Ali muntu mukulu mumubaze.”
24 Bashuba kuhamagala eturu ya kabiri oyola mulume waliri mpumi bamubwira ntya: “Ohe Mungu obukuuze bulala rhuyinji k’oyula muntu ali munyabyaha.”
25 Abashubiza: “Akaba ali munyabyaha nyono ntenji. Chintu chiguma chonyine nyinji, naliri mpumi aliko bunola nkala ndi nabona.”
26 Bava bamubaza: “Bichi alikujirire? Gurhe afungulaga amasu mawe?”
27 Abashubiza: “Nababwirire aliko murhanyunvirize. Bulagurhe mulonzeze inshube mbabwire? Nenyu mulonzeze mube banafunzi bage si?”
28 Eju y’echola bamubwira ntya n’akasuzaguro: “Woyo oli mwanafunzi w’oyola muntu, aliko rhwabo rhuli banafunzi ba Musa.
29 Rhumenyere oku Mungu aliri aderhesa Musa, aliko oyula muntu rhurhenji ngahe arhengerere.”
30 Oyola mulume abashubiza ntya: “Kweri ebila bisomeze okuyunva ku murhenji ngahe oyula muntu arhengere nobo afungwire amasu mani.
31 Rhumenyere oku Mungu arhayunviriza abanyabyaha, aliko anayunviriza omuntu yeshi-yeshi onamuyubaha n’okujira obulonza bwage.
32 Kurhenga mira nta mango byayunvikene oku hali owafungwire amasu m’omuntu waburhwaga ey’ali mpumi.
33 Nk’oyula muntu arhalirhengerere emwa Mungu, arhakagalire kujira echintu choshi-choshi.”
34 Omu kumushubiza bamubwira ntya: “Nawe weshi waburhwaga omu chaha, woyo warhondera kurhuyigiriza?” Bamukabula embuga!*
35 Yesu ayunva oku bamukabwire embuga. Abere abuganana naye, amubaza: “Ogwerhe obwemere mu Mwen’omuntu si?
36 Oyola mulume ashubiza ntya: “Ye nde omu kuntu ingwarhe obwemere muye?”
37 Yesu amubwira: “Wamubwene, n’omu bukweri, yeli waganira nawe.”
38 Aderha: “Ingwerhe obwemere muye Waliha.” Amuyunamira.
39 Yesu ava aderha ntya: “Nayinjaga oku gulu y’abantu bachirwa olubanja, omu kuntu abarhabona babone n’abali babona babe mpumi.”
40 Baguma omu Bafarisayo baliri naye bayunvaga ebyola binwa bamubaza ntya: “Nerhu rhuli mpumi si?”
41 Yesu abashubiza: “Nka mwaliri mpumi mwakabere buzira chaha. Aliko bulala mwaderhere mpu ‘Rhuli rhwabona,’ echaha chenyu chabayorhako.”
Mahugulo m'efo
^ Bibonekene oku balimuchire omu sinagogi.
