Yayandikwaga na Yowane 12:1-50
12 Siku ndarhu embere e Pasaka ebe, Yesu ahika e Betaniya emunda Lazaro afulaga aliri.
2 Bamurheganyiza ebilyo by’egolo eyola munda. Marta ye waliri abakolera ebi bakenere, aliko Lazaro yewe aliri omu bantu baliri basangira na Yesu.
3 Mariya ava arhola enusu y’elitre y’amarashi m’ebirhi by’enardo marhachangirwe, mahumwire bwinja, maliri ma beyi linene. Amasheshera oku magulu ma Yesu, amakaza n’enviri zage. Enju yoshi yayunjula mw’empumulo y’amola marashi.
4 Aliko Yuda Iskariyote muguma omu banafunzi bage waliri hofi kumulenganya aderha ntya:
5 “Charhumire amala marashi marhaguzwa dinari 300 n’efuranga zikarhabala abakene?”
6 Arhaderhaga ntyo mpu bulala alilagire oku bakene si bulala aliri mwizi. Yiwagendaga abika akasanduku k’efuranga, anagendaga azigana kuzimba efuranga zilimo.
7 Naho Yesu aderha: “Mumuleke n’omurhula, ajire ogula mugenzo omu kurheganya okuhambwa kwani.
8 Bulala esiku zoshi muba n’abakene, aliko nyono murhaba nani esiku zoshi.”
9 Mw’agola mango gan’ago, Abayahudi kamama bamenya oku Yesu ali eyola munda, bayinja arhali mpu yi bamubona konyine, s’aliko yi babona na Lazaro Yesu abaga afulire.
10 Abadahwa bakulu bava bapanga kuyirha Lazaro naye,
11 bulala eju yage, Bayahudi banene baliri baja eyola munda banagwarha obwemere mu Yesu.
12 Olusiku lwakulikiragaho, abantu kamama bayinjaga oku lusiku lukulu, bayunva oku Yesu ali ayinja e Yerusalemu.
13 Barhola emirhaanda baja kubuganana naye, barhondera kuderha ntya n’omulenge gunene: “Mungu, rhukuhemere omuchungule! Ogishirwe ali olala oyinjire omu zino lya Yehova, Omwami we Izraeli!”
14 Yesu abere abona omwana gw’epunda, aguyikalako nka kulala biyandikirwe:
15 “Orhayubahaga munyere we Sayuni. Tala! Mwami wawe ayinjire, ayikere oku mwana gw’epunda.”
16 Oku murhondero abanafunzi bage barhaliri bayunva ebyola binwa, aliko amango Yesu akuuzwa bayibuka ku byabaga byayandikirwe eju yage n’oku balimukolerebyo.
17 Abantu kamama baliri naye amango ahamagala Lazaro arhenge omu shinda n’okumufula, bagenderera kuhaana obuhamirizi.
18 Echola che charhumaga kandi bantu banene baja kubuganana naye, bulala baliyunvirhe oku akolere echola chisomerene.
19 Abafarisayo babwirana ntya: “Mubwene oku ntacho mwagalire kujira. Mujage mwalola! Egulu lyoshi lyamukulikire.”
20 Haliri Bagiriki baguma omu bantu babaga bayinjire kuharamya oku lusiku lukulu.
21 Bava bayegera Filipo waliri we Betsaida ye Galilaya, barhondera kumubwira ntya: “Waliha, rhulonzeze rhubone Yesu.”
22 Filipo aja kubwira Andreya. Nantyo, Andreya na Filipo baja kubwira Yesu.
23 Aliko Yesu abashubiza: “Esa Mwen’omuntu akuuzwa yayinjire.
24 Okuli kweri imbabwirire nk’emburho y’engano erharhogere ahashi n’okufa enayorha yonyine, aliko nk’efire enaburha zindi burho zinene.
25 Buli yeshi onasima akalamo kage anakaharabisa, aliko buli yeshi onashomba akalamo kage mu linola gulu, akachungula anagwarha akalamo k’esiku n’amango.
26 Omuntu yeshi-yeshi olonzeze kunkolera, ankulikire; na hoshi naba ha n’omukozi wani naye aba. Nk’omuntu yeshi-yeshi alonzeze kunkolera, Darha nj’amuha olukengo.
27 Bunola nyunvirhe mpwererwe. Bichi nderhage? Darha onyokole mu chinola chihe chikomere. Chiro akaba ntyo, chinola chihe chikomere chikwanene kumpikira, bulala che charhumaga nayinja.
28 Darha okuuze ezino lyawe.” Omulenge gwava gwarhenga embingu gwaderha: “Nalikuuzize, nanashuba kulikuuza.”
29 Abantu kamama baliyumangire ahola bayunva ogola mulenge baderha mpu mukungulo gogwamagera. Abandi baderha: “Malayika amuderheseze.
30 Yesu abashubiza: “Ogula mulenge gurharhengerere eju yani s’eju yenyu.
31 Bunola, elila gulu lyamachirwa olubanja. Omurhegesi wa linola gulu akabulwa embuga.
32 Nani inkamanikwa, nalerha abantu ba buli buko emunda indi.”
33 Aderhaga ntyo omu kuyerekana lufu nyabachi aliri hofi kufa.
34 Abola bantu kamama bava bashubiza: “Rhwaliyunvirhe omu Rhegeko lya Musa oku Kristu ayorhaho esiku n’amango. Gurhe wakaja waderha oku Mwen’omuntu amanikwa? Oyola Mwen’omuntu ali nde?”
35 Yesu ava ababwira: “Omwangaza guchili haguma nenyu mu kasanzi kageke, mulambagire amango muchiherhe omwangaza omu kuntu omwizimya gurhabahubya. Buli yeshi oli walambagira omu mwizimya arhenji emunda ali aja.
36 Amango mugwerhe omwangaza, muyerekane oku mugwerhe obwemere omu mwangaza yi muba bana b’omwangaza.”
Yesu amalire kuderha ebyola binwa, arhenga ahola aja kuchibisha hale nabo.
37 Chiro akaba oku alijirire bisomerene binene embere zabo, barhagwarhaga obwemere muye,
38 omu kuntu ebila binwa by’omulebi Isaya biyenere waderhaga ntya: “Yehova, inde wagwarhire obwemere omu byayunvirhe kurhenga emwerhu? N’okuboko kwa Yehova kwayerekenwe emwa nde?”
39 Empanvu yarhumire barhagala kugwarha obwemere y’eyila Isaya ashubaga kuderha:
40 “Ahumize amasu mabo n’okukomeza emirhima yabo, yi barhabona n’amasu mabo n’okuyunva n’emirhima yabo, nantyo barhahindamuka bakayinja emunda ndi imbafumye.”
41 Isaya aderhaga ebyola bulala abaga abwene obukuuze bwa Kristu, aderha n’oku bimulolere.
42 Chiro akaba ntyo, banene omu barhambo baligwarhire obwemere muye; aliko eju y’Abafarisayo barhalonzaga kuyerekana oku bamuyemerere yi barhafukuzwa omu Sinagogi,
43 bulala balisimire obukuuze bw’abantu kulusha chiro obukuuze bwa Mungu.
44 Yesu aderha ntya n’omulenge gunene: “Owagwarhire obwemere mu nyono ey’arhangwarhire m’obwemere nyenyine si ey’agwarhire obwemere na m’olala wantumaga.
45 N’olala wambwene ey’abwene n’olala wantumaga.
46 Nayinjaga nka mwangaza omu gulu, omu kuntu buli yeshi wagwarha obwemere mu nyono arhayorhaga omu mwizimya.
47 Aliko buli yeshi wayunva ebinwa byani akafunda kubikenga, intamuchirire olubanja, bulala ntayinjaga kuchira egulu olubanja, si nayinja kuchungula egulu.
48 Owansuzagura akafunda kuyemera ebinwa byani, agwerhe owemuchire olubanja. Ebinwa naderhaga byonyine b’inji byamuchira olubanja oku lusiku luzinda.
49 Bulala intaderhaga eby’okuchirhumiriza, si Darha wantumaga yenyine alimpere erhegeko oku bilolere ebi naderha na gurhe nabiderha.
50 Inamenyere oku erhegeko lyage k’akalamo k’esiku n’amango. Bobola byoshi yinaderha indi nabiderha nk’oku Darha anambwiraga.”
