Yayandikwaga na Yowane 14:1-31
14 “Emirhima yenyu emenye yalaga bwenene, muyerekane obwemere mu Mungu munayerekane obwemere mu nyono.
2 Omu nju ya Darha muli fasi zinene z’okulamamo. Nk’arhali ntyo ku byaliri nakababwirire, bulala naja kubarheganyiza efasi.
3 Echindi, bunola nagenda kubarhenganyiza efasi, nji nashuba kugaluka nanabakaribisa omu mwani, omu kuntu ahanaba indi nenyu mubeho.
4 Munayinji enjira eganire emunda naja.”
5 Tomasi amubwira: “Waliha, rhurhenji emunda waja. Gurhe rhwakaja rhwamenya enjira?”
6 Yesu amubwira: “Nyono nye njira, nye kuli, kandi nye na kalamo. Ntaye wakaja emunda Darha ali buzira kungererako.
7 Nka mwalinyinji mwakamenyere na Darha. Kurhangirira bunola mwamumenyere mwanamubwene.”
8 Filipo amubwira: “Waliha, orhuyereke Darha, echola chaba eyi chirhutosheze.”
9 Yesu amubwira: “Filipo, ezila siku zoshi namamala haguma nenyu orhasaga kumenya? Owambwene ey’abwene na Darha. Gurhe wakaja waderha, mpu ‘Orhuyereke Darha’?
10 Orhayemerere oku ndi omu buguma na Darha, na Darha ali omu buguma nani? Ebindi nababwira birhali bintu indi nachitungira, si Darha oli omu buguma nani y’eli akola akasi kage.
11 Munyemere amango namababwira oku ndi omu buguma na Darha, na Darha ali omu buguma nani; akaba murhalonzeze kuyemera, muyemere eju y’ebila indi nakola.
12 Okuli kweri imbabwirire, buli yeshi wayerekana obwemere mu nyono, akola eb’indi nakola; akola na binene kulusha eb’indi nakola bulala naja emwa Darha.
13 Echindi, buli chintu nji mwahema omu zino lyani nji nachijira, omu kuntu Darha akuuzwe kugerera Omugala.
14 Nka muhemere echintu choshi-choshi omu zino lyani, nji nachijira.
15 “Akaba munzigiire, mwakenga amarhegeko mani.
16 Nji nahema Darha, anabaha owindi mugwasi waba haguma nenyu esiku n’amango,
17 eroho ly’okuli, ely’egulu lirhakapata lirhanaliyinji, bulala lirhalibona lirhanaliyinji. Mwabo muliyinji bulala linabera haguma nenyu linabalimo.
18 Ntabaleka nka fubi. Nji nashuba kugaluka emunda muli.
19 Mu kasanzi kageke egulu lirhachimbona, aliko mwabo nji mwambona, bulala ndamire, nenyu nji mwalama.
20 Agola mango nji mwamenya oku ndi omu buguma na Darha nenyu muli omu buguma nani, nani indi omu buguma nenyu.
21 Ogwerhe amarhegeko mani n’okumakenga, oyola yenzigiire. Na buli yeshi onzigiire Darha amuzigira, nani namuzigira nanachiyerekaye bwinja-bwinja.”
22 Owindi Yuda orhali Iskariyote, amubaza: “Waliha, gurhe byabere y’olonza kuchiyerekana ku rhwabo s’arhali oku gulu?”
23 Yesu amushubiza: “Omuntu yeshi-yeshi onzigiire, akenga echinwa chani na Darha amuzigira, rhwanayinja kulama haguma naye.
24 Buli muntu orhanzigiire arhakenga ebinwa byani. Ebi muli mwayunva indi nababwira birhali byemwani si bya Darha wantumaga.
25 “Namababwira ebila binwa ey’inchili haguma nenyu.
26 Aliko eroho lichesibwa, omugwasi Darha arhuma omu zino lyani, abayigiriza ebintu byoshi n’okubayibusa byoshi nababwirire.
27 Namabalekera omurhula; namabaha omurhula gwani. Ntabaherego kuguma n’okuntu egulu linaguhaana. Murhayemeraga emirhima yenyu yalaga bwenene murhanayubahaga.
28 Mwaliyunvirhe naderha, mpu ‘Nagenda, kandi nashuba kugaluka emunda muli.’ Nka mwalinzigiire, mwakasimire okubona naja emwa Darha, bulala Darha ali mukulu kundusha.
29 Bobola namaba nababwira birhaza kurhengerera, omu kuntu mugwarhe obwemere hanola birhengerera.
30 Intachiganira nenyu binene, bulala omurhegesi w’elila gulu ayinjire na nta buhashe angwerheko.
31 Aliko y’egulu limenya oku mba nzigiire Darha, indi najira nk’oku Darha anantegekaga njire. Muyumange rhurhenge hanola.
