Yayandikwaga na Yowane 5:1-47
5 Enyuma waho haliri olusiku lukulu lw’Abayahudi, na Yesu azamukira e Yerusalemu.
2 Omu Yerusalemu haba echisima chinayirikwa omu Chiebraniya Betzata, chizungulukirwe na veranda erhano zifarhirwe n’enkingi.
3 Mw’ezola veranda mwalilyamire abalwala kamama, empumi n’abahunzize ebirumbu.
4 ——
5 Aliko omola mwaliri mulume muguma wabaga amamala myaka 38 ey’alwere.
6 Yesu abere abona oyola muntu alyamire omola ey’anamenyere oku amamala siku zinene alwere, amubaza ntya: “Wakasima ofume si?”
7 Oyola mulwala amushubiza: “Waliha, nta muntu mperhe w’okumpira omu chisima amango amenji mamabirira; eyi mbwira najamo, owindi muntu anantanga.”
8 Yesu amubwira: “Yimanga! Rhola echishanja chawe ogende.”
9 Oyola muntu afuma ahola han’aho, arhola echishanja chage agenda.
Lwaliri lusiku lwe Sabato.
10 Abayahudi barhondera kubwira oyola muntu wafumire: “Zene Sabato, orhakwanene kuheka echishanja.”
11 Aliko abashubiza: “Owanfumyaga ye wanambwiraga mpu ‘Rhola echishanja chawe ogende.’
12 Bamubaza: “Muntu ohe oyola wakubwiraga mpu ‘Rhola echishanja chawe ogende’?”
13 Aliko oyola mulume wafumaga arhalimenyere owamufumyaga, bulala Yesu abaga aherere omu bantu kamama baliri ahola.
14 Enyuma w’ahola Yesu amubugana omu hekalu amubwira: “Tala, obola wafumire orhachikolaga echaha y’echintu chibi bwenene kulusha chirhakuhikira.”
15 Oyola muntu agenda aja kubwira Abayahudi oku Yesu ye wamufumyaga.
16 Echola che charhumaga Abayahudi bayinja balibuza Yesu bulala aliri akola ebili ntyo olusiku lwe Sabato.
17 Aliko Yesu ababwira: “Darha achigenderere kukola kugera zene, nani indi nagenderera kukola.”
18 Echola charhuma Abayahudi bagenderera kulonza bwenene gurhe bakamuyirha, bulala olekere okuvuna e Sabato aliri ahamagala Mungu oku ali Eshe, nantyo anachihinganya na Mungu.
19 Omu kubashubiza Yesu aderha: “Okuli kweri imbabwirire, inta chintu n’echiguma Omugala akajira omu kuchirhumiriza, aliko eby’abwene Eshe ali akola, byonyine bi naye anakola. Bulala buli chintu Eshe anakola, Omugala naye anachikola okola kon’oko.
20 Bulala Darha anazigira Omugala, anamuyereka ebintu byoshi yewe yenyine anakola, amuyereka na makasi manene kulusha amala omu kuntu musomerwe.
21 Bulala nka kulala Darha anafula abafire n’okubaha akalamo, intyo ku n’Omugala naye anaha buli yeshi alonzeze akalamo.
22 Inta muntu n’omuguma Darha anachira olubanja, aliko eby’okucha emanja byoshi abilekere Omugala,
23 y’abantu boshi bakenga Omugala nka kulala banakenga Darha. Buli yeshi orhakenga Omugala ey’arhakengere na Darha wamurhumaga.
24 Okuli kweri imbabwirire, buli muntu wayunva echinwa chani n’okuyemera olala wantumaga, agwerhe akalamo k’esiku n’amango, arhanachirwa olubanja s’arhengere omu lufu amaja omu kalamo.
25 “Okuli kweri imbabwirire, akasanzi kayinjire, kanakanola, amango abafire bayunva omulenge gwa Mugala wa Mungu, n’aba nji baba bamuyunvirize banalama.
26 Bulala nka kulala Darha agwerhe akalamo mu yewe, kon’okola kw’anahere Omugala naye obuhashe b’okugwarha akalamo mu yewe yenyine.
27 Amuhere n’obuhashe b’okucha emanja bulala yewe ye Mwen’omuntu.
28 Ebila birhabasomezaga, bulala akasanzi kayinjire, amango balala boshi bali omu shinda nji bayunva omulenge gwage
29 banarhengamo, abalikolere ebinja banafuka yi bapata akalamo, na balala balikomere kukola amabi banafuka yi bachirwa olubanja.
30 Inta chintu choshi-choshi nakajira omu kuchirhumiriza. Inancha olubanja omu kukulikiza ebi nayunvirhe, n’olubanja inancha luba lukwanene bulala intalonza kujira obulonza bwani s’obulonza b’olala wantumaga.
31 Akaba nyenyine nye ndi nahana obuhamirizi eju yani, ey’obuhamirizi bwani burhali b’okuli.
32 Hali owindi oli wahana obuhamirizi eju yani, inamenyere k’obuhamirizi ali ahana buli b’okuli.
33 Mwalirhumire abantu emunda Yowane ali, analihanire obuhamirizi oku bilolere okuli.
34 Chiro akaba ntyo, intayemera obuhamirizi b’omuntu, aliko indi naderha ebila bintu yi muchunguka.
35 Oyola muntu aliri tara likolerere lili lyahana omwangaza, n’omu kasanzi kageke mwalilonzeze musimire bwenene omwangaza gwage.
36 Ingwerhe obuhamirizi bulushire obwa Yowane, bulala amakasi Darha ampere inkole, m’amala makasi indi nakola, mahanire obuhamirizi oku Darha ye wantumaga.
37 Na Darha yenyine wantumaga ahanire obuhamirizi eju yani. Mwabo murhasaga kuyunva omulenge gwage, murhanasaga kubona gurhe aba,
38 murhanagwerhe echinwa chage ahakagarhi kenyu bulala murhayemerere ey’arhumaga.
39 “Munasuzuma Amandiko bwenene bulala munawaza oku mamabaha akalamo k’esiku n’amango n’amola Mandiko monyine mamanahaana obuhamirizi oku bindolere.
40 Aliko murhalonzeze kuyinja emunda ndi yi mupata akalamo.
41 Intayemera obukuze burhengere emw’abantu,
42 aliko inyinji oku omu mirhima yenyu murhasima Mungu.
43 Nayinjire omu zino lya Darha, aliko murhankaribisaga, nk’owindi muntu ayinjaga omu zino lyage yenyine, mwakamukaribisize.
44 Gurhe mwakagwarha obwemere n’obo muli mwalonza obukuze burhengere ku buli muguma n’owindi ahali h’okulonza obukuze burhengere emwa Mungu muguma Yenyine?
45 Murhawazaga oku nabakomera ku Darha; haba muntu muguma yenyine wabalegere, yekala Musa, eyi muba muchizerere.
46 Kweri, nka mwayemereraga Musa nani mwakanyemerere bulala aliyandikire oku bindolere.
47 Aliko akaba murhayemerere eby’ayandikaga, gurhe mwakaja mwayemera eb’indi naderha?”
