Yayandikwaga na Yowane 17:1-26
17 Yesu amalire kuderha ebyola binwa alola embingu aderha ntya: “Darha, esa yagerereho. Okuuze mugala wawe omu kuntu mugala wawe akukuuze,
2 nka kulala wamuhaga oburhwali oku bantu boshi, y’ahaana akalamo k’esiku n’amango ku balala boshi wamuhere.
3 Kanola k’akalamo k’esiku n’amango: bahikire aha bakumenya, woyo Mungu muguma w’okuli n’olala warhumaga, Yesu Kristu.
4 Nakukuuzize omu gulu, bulala namalire akasi wampaga inkole.
5 Bobola Darha, ompe obukuuze ahaburhambi bwawe buli nk’obunaligwerhe ahaburhambi bwawe embere egulu libeho.
6 “Namenyeseze ezino lyawe oku bantu wakulaga omu gulu wabampa. Baliri bawe wabampa, banakengere echinwa chawe.
7 Bunola bakala bamenyere oku ebintu byoshi mperhe we wabimpaga;
8 bulala nabamenyeseze ebinwa wambwiraga, babiyemerere banamenyere oku kweri nayinjaga eyi ndi murhumwa wawe, banayemerere oku we wantumaga.
9 Indi nasalira eju yabo, intali nasalirira egulu si indi nasalirira balala wampaga bulala bemwawe;
10 ebintu byani byoshi bili byawe, n’ebyawe bili byani, nanahaabirwe obukuuze ahagarhi kabo.
11 “Nyono intachili omu gulu aliko bowe bali omu gulu, inkala kuyinja emunda oli. Darha Muchesibwa, obalange eju y’ezino lyawe wampere, omu kuntu babe omu buguma nk’oku rhwembi rhuba omu buguma.
12 Amango naliri nabo naliri nabalanga eju y’ezino lyawe wampere. Nabalangire na ntaye n’omuguma mubo waharabisizwe olekere mugala w’okuharabiswa, y’ebyayandikirwe biyenera.
13 Aliko lero nayinjire emunda oli, inandi naderha ebila binwa omu gulu y’obusime bwani bubayunjulamo.
14 Nabamenyeseze echinwa chawe aliko egulu lyabashombere bulala barhali chigabi ch’egulu, nk’oku nani ntali chigabi ch’egulu.
15 Intakuhemere oku obakule omu gulu aliko ogenderere kubalanga k’olala mubi.
16 Barhali chigabi ch’egulu nk’oku nani intali chigabi ch’egulu.
17 Obachese kugerera obukweri, echinwa chawe buli bukweri.
18 Nka kulala wantumaga omu gulu, nani nabarhumire omu gulu.
19 Inandi nachichesa eju yabo, yi nabo bacheswa kugerera obukweri.
20 “Intali nasalira eju y’abala bonyine, si n’eju ya buli yeshi nji wagwarha obwemere mu nyono enyuma y’okuyunviriza enyigirizo z’abala,
21 yi boshi baba muguma nk’oku woyo Darha oli omu buguma nani, nani indi omu buguma nawe, nabo babe omu buguma nerhu y’egulu liyemera oku we wantumaga.
22 Nabahere obukuuze wampaga, yi baba omu buguma nk’oku rhwembi rhuba omu buguma.
23 Nyono omu buguma nabo, nawe omu buguma nani, omu kuntu babe omu buguma bwinja-bwinja y’egulu limenya oku we wantumaga n’oku obazigiire kuguma n’oku oba onzigiire.
24 Darha indonzeze aba wampere babe haguma nani ahanaba indi, yi babona obukuuze bwani wampere bulala walinzigiire embere abantu babe oku gulu.
25 Darha Munyakunali, kweri egulu lirhaza kukumenya, aliko nyono inkuyinji n’abala bakala bamenyere oku we wantumaga.
26 Nabamenyeseze ezino lyawe nanashuba kulimenyesa, omu kuntu obuzigire wanzigiire buba mubo nani imbe omu buguma nabo.”
