Yayandikwaga na Yowane 4:1-54
4 Enyuma waho bamenyesa Abafarisayo oku Waliha Yesu ali ajira abanafunzi n’okubatiza bantu banene kulusha Yowane. Yesu abere amenya oku ntyo ku byabere—
2 chiro akaba oku arhali ye waliri abatiza si abanafunzi bage babaliri babatiza—
3 arhenga e Yudeya agaluka e Galilaya.
4 Aliko byalimuhemere agere e Samariya.
5 Ahika omu vile ye Samariya enayirikwa Sikari hofi n’eshwa Yakobo ahaga omugala Yosefu.
6 Ahola h’echisima cha Yakobo chaliri. Bobola Yesu abere aluhire n’olugenzi ayikala hofi n’echisima. Yaliri hofi midi.
7 Omukazi w’Omusamariya ayinja kudoma. Yesu amubwira: “Mpaga amenji nanywa.”
8 (Bulala abanafunzi bage babaga bajire omu vile kugula ebilyo.)
9 Oyola mukazi w’Omusamariya amubwira ntya: “Gurhe wakampema amenji m’okunywa nobo oli Muyahudi nani indi mukazi w’Omusamariya?” (Bulala Abayahudi barhayunvikanaga n’Abasamariya.)
10 Omu kumushubiza Yesu amubwira: “Nka waliyinji oluhembo lwa busha lunarhenga emwa Mungu na nde oli wakubwira mpu ‘Mpaga amenji m’okunywa’ we wakamuhemere; akanakuhere emenji m’akalamo.”
11 Oyola mukazi amubwira: “Waliha orhaherhe chiro embegeti y’okudomesa n’echisima chilehere, ngahe waja wakula amola menji m’akalamo?
12 We mukulu kulusha shokuliza werhu Yakobo warhuhaga echila chisima, na yewe yenyine, abagala n’engamiya zage baliri banywa amenji ma mw’echila chisima?”
13 Yesu amubwira: “Buli yeshi wanywere amenji ma mw’echila chisima ashuba kuyunva enyorha.
14 Aliko buli yeshi wanywa amenji namuha, arhakachiyunva enyorha haba n’akatyu, s’amenji namuha mahinduka shoko y’amenji mali mahulula muye yi mamuha akalamo k’esiku n’amango.”
15 Oyola mukazi amubwira: “Waliha, ompage agola menji yi nji ntachiyunva enyorha intanachihira nkagaluka hanola kudoma.”
16 Yesu amubwira: “Genda ohamagale balo oyinje naye hanola.”
17 Oyola mukazi aderha: “Intajira mulume.” Yesu amubwira: “Waderhere obukweri okuderha mpu orhajira mulume.
18 Bulala wamaja ku balume barhano, n’ey’oli naye zene arhali balo. Che chirhumire eby’oderhere buli bukweri.”
19 Oyola mukazi aderha: “Waliha, namabona oku oli mulebi.”
20 Bashokuliza berhu baliri baharamya Mungu k’ogula musozi, aliko mwabo munaderha oku e Yerusalemu ye fasi abantu bakwanene kuharamiza.”
21 Yesu amubwira: “Ochizere ebinakubwira, akasanzi kayinjire mwaharamiza Darha arhali k’ogula musozi arhanali chiro e Yerusalemu.
22 Mwabo munaharamya eyi murhenji, rhwabo rhunaharamya eyi rhuyinji bulala obuchunguke burhangirire oku Bayahudi.
23 Bulala akasanzi kayinjire, kanakanola; amango abakozi b’okuli ba Mungu baharamya Darha omu roho n’omu kuli. Bulala kweri Darha ali alonza abantu bali nk’abola yi bamuharamya.
24 Mungu aba roho, na balala banamuharamya bakwanene kumuharamya omu roho n’omu kuli.
25 Oyola mukazi aderha: “Inyinji oku Masiya oyirikwa Kristu ayinja. N’amango ayinja arhubishulira bwinja-bwinja ebintu byoshi.”
26 Yesu amubwira: “Nyono nye yewe, oli waganira nawe.”
27 Ahola han’aho abanafunzi bahika aliko basomerwa okubona ali aganira n’omukazi. Chiro akaba ntyo ntaye wabazize chiro mpu “Bichi oli walonza?” Changwa “Bulagurhe oli waganira n’oyola mukazi?”
28 Oyola mukazi ava aleka endaha yage ahola agenda omu vile abwira abantu ntya:
29 “Muyinje mulole omuntu wambwirire byoshi najirire, arhaba nkabaga eyi ye Kristu?”
30 Barhenga omu vile bayinja emunda Yesu ali.
31 Mw’akola kasanzi kan’akola abanafunzi baliri bamubwira ntya: “Mwalimu ebilyo binola olye.”
32 Aliko ababwira: “Ingwerhe ebilyo mwabo murhenji.”
33 Abanafunzi bava barhondera kubazana: “Hali owamulerhere ebilyo si?
34 Yesu ababwira: “Ebilyo byani kuli kujira obulonza b’olala wantumaga n’okumala akasi kage.
35 Muli mwaderha oku hachili myezi ene embere esiku z’okushalula zihike. Arhali ntyo? Aliko imbabwirire, muyinamule amasu mulole amashwa mwabona oku mayerere* mali tayari kushalulwa.
36 Omushaluzi akala ali apata omushahara gwage anali agusha amatunda eju y’akalamo k’esiku n’amango, omu kuntu omuhinzi n’omushaluzi boshi basime haguma.
37 Eju y’echola, ebila binwa byaderhwaga bili by’okuli: Muguma ali muhinzi owindi ali mushaluzi.
38 Nabarhumire kushalula ebi murhaluhiraga. Abandi babichokere aliko mwabo mwayungukire oku muchoko gwabo.”
39 Basamariya banene barhengaga mw’eyola vile bagwarha obwemere muye, eju y’ebinwa oyola mukazi ahamirizaga omu kuderha: “Ambwirire byoshi najirire.”
40 Bobola amango Abasamariya bayinja emunda ali, bamuhema ayorhe nabo; ava ayorha nabo siku ebiri.
41 Echola charhuma bandi banene bamuyemera eju y’ebyaliri aderha.
42 Babwira olala mukazi: “Arhachili ebi nji waderhaga bye byarhumire rhwagwarha obwemere, bulala rhwenyine rhwachiyunvirhire rhwanamenyere ok’oyula muntu kweri, ye muchunguzi w’egulu.”
43 Enyuma w’ezola siku ebiri, Yesu arhengayo aja e Galilaya.
44 Aliko yewe yenyine aliyemezeze ok’omulebi arhakengwa emwabo.
45 Bobola amango ahika e Galilaya, abantu be Galilaya bamukaribisa, bulala balibwene ebintu akolaga e Yerusalemu amango m’esiku zikulu bulala nabo balijire oku siku zikulu.
46 Yesu ava ashuba kuja e Kana ye Galilaya emunda ahindulaga amenji maba divayi. E Kapernaumu haliri omukozi w’oku bwami waliherhe omugala olwere.
47 Oyola mulume ayunvirhe oku Yesu arhengere e Yudeya aja e Galilaya, amushimba amuhema ayinje afumye omugala bulala aliri hofi kufa.
48 Yesu amubwira: “Mwabo bantu nka murhabwene ebisomerene n’ebintu bisomeze bwenene murhayemera.”
49 Oyola mukozi w’oku bwami amubwira: “Waliha, rhanga oyinje omwana wani arhaza kufa.”
50 Yesu amubwira: “Ochigendere; mugala wawe afumire.” Oyola mulume ayemera ebi Yesu amubwirire agenda.
51 Aliko abere ali omu njira abakozi bage bamubugana bamubwira ok’omugala afumire.
52 Ababaza sa zinga afumaga, bamubwira: “Ehoma nji lyachikaga mulagolo hofi sasaba.”
53 Eshe w’oyola mwana ayibuka oku eyola sa y’en’eyo yi Yesu nj’amubwiraga mpu “Mugala wawe afumire.” Eju y’echola yewe na b’omu mwage boshi bagwarha obwemere mu Yesu.
54 Echola chaba chisomerene chakabiri Yesu akolaga e Galilaya amala kurhenga e Yudeya.
Mahugulo m'efo
^ Chinwa oku chinwa “mali mweru.”
