Yayandikwaga na Yowane 1:1-51
1 Oku murhondero Mwazi aliriho, na Mwazi aliri haguma na Mungu, na mwazi aliri mungu.
2 Oyola aliri haguma na Mungu oku murhondero.
3 Ebintu byoshi byabagaho kumugererako, na nta chintu n’echiguma chiro chabereho buzira yewe.
Echabereho
4 kumugererako kaliri kalamo, n’akalamo gwaliri mwangaza gw’abantu.
5 Omwangaza guli gwakoleza omu mwizimya, aliko omwizimya gurhahimaga omwangaza.
6 Harhengerera omuntu warhumwaga nka murhumwa wa Mungu; ezino lyage aliri Yowane.
7 Oyola muntu ayinjaga nka muhamirizi, y’ahaana obuhamirizi oku bilolere omwangaza omu kuntu abantu ba buli buko bagwarhe obwemere kugerera yewe.
8 Arhali ye waliri ogola mwangaza, s’alikwanene kuhaana obuhamirizi oku bilolere ogola mwangaza.
9 Omwangaza g’okuli gunakolezeza abantu ba buli buko gwaliri hofi kuyinja omu gulu.
10 Aliri omu gulu, n’egulu lyabagaho kumugererako, aliko egulu lirhamurhegeraga.
11 Ayinjaga emwabo aliko abantu b’emwabo barhamuyemeraga.
12 Chiro akaba ntyo, boshi bamukaribisaga abaha obuhashe b’okuba bana ba Mungu, bulala baligwarhire obwemere omu zino lyage.
13 Barhaburhwaga kugerera eshagama, changwa kugerera obulonza b’omubiri, changwa kugerera obulonza b’omuntu si kugerera obulonza bwa Mungu.
14 Bobola Mwazi ahinduka mubiri, alama haguma nerhu, rhwabona obukuze bwage, obukuze buli nka b’omwana w’echinege warhenga emw’eshe. Analiyunjulirene olukogo n’okuli.
15 (Yowane alihanire obuhamirizi oku bimulolere, aderha ntya n’omulenge gunene: “Oyula yinaliri naderha ntya oku bimulolere, ‘Owayinjire enyuma zani yi wantangaga bulala arhulagaho embere imbeho.’”)
16 Rhweshi rhwapatire lukogo lunene rhurhalikwanene kurhenga emunda ali bulala ayunjulirene olukogo.
17 Mungu ahaaga abantu Amarhegeko kugerera Musa; aliko olukogo rhurhalikwanene n’okuli byayinjaga kugerera Yesu Kristu.
18 Nta muntu wachigerere kubona Mungu haba n’eliguma; omwana w’echinege oli nka mungu oli ahaburhambi bwa Darha, yenyine ye wafasiriye Mungu ali nde.
19 Obula b’obuhamirizi Yowane ahaanaga amango Abayahudi barhuma abadahwa n’Abalawi kurhenga e Yerusalemu bamubaze: “Oli nde?”
20 Arhajaga buhaka abashubiza buzira ngangane, aderha: “Arhali nye Kristu.”
21 Bamubaza: “Bobola si oli nde? Oli Eliya si?” Abashubiza: “Nanga intali yewe.” “Oli olala Mulebi si?” Ashubiza: “Nanga!”
22 Bashuba kumubaza: “Oli nde? Orhubwire yi rhumenya ebi rhwashubiza abarhurhumaga. Bichi ojire waderha oku bikulolere?”
23 Aderha: “Nyono indi mulenge g’omuntu oli wahamagaza omu rungu, ‘Mulambule enjira ya Yehova,’ nka kulala omulebi Isaya anaderhaga.”
24 Abafarisayo ba barhumaga abola bantu.
25 Bava bamubaza echibazo baderha: “Bobola si akaba orhali Kristu, orhali Eliya, orhanali olala Mulebi, gurhe yi waja wabatiza?”
26 Yowane abashubiza: “Nyono indi nabatiza omu menji. Aliko hali omuntu oyimangire ahagarhi kenyu murhamenyere,
27 owayinjire enyuma zani, intakwanene chiro kushwekula orhwamba rhw’ebirato byage.”
28 Ebyola byaberaga e Betaniya oku lwindi lunda lwe Yordani emunda Yowane aliri abatiziza.
29 Olusiku lwakulikiragaho abona Yesu ali ayinja emunda ali, aderha: “Tala Omwana gw’entama* gwa Mungu gwakula echaha ch’egulu!
30 Oyula yinaderhaga ntya oku bimulolere: ‘Omuntu wayinjire enyuma zani yi wantangaga, bulala arhulagaho embere mbeho.’
31 Chiro nani intalimuyinji, aliko nayinjaga kubatiza omu menji yi Izraeli azinda ey’amumenyere.”
32 Yowane ashuba kuhana obwindi buhamirizi aderha ntya: “Nalibwene eroho lyayandagala kurhenga embingu nka pijo,* lyamuyorhako.
33 Chiro nani ntalimuyinji s’owantumaga imbatize omu menji yi wanambwiraga ntya: ‘Omuntu wabona eroho lyayandagalirako n’okumuyorhako, oyola yi wabatiza kugerera eroho lichesibwa.’
34 Nalichibwenere ebyola, nanahaana obuhamirizi oku oyola ye Mugala wa Mungu.”
35 Kandi olusiku lwakulikiragaho, Yowane abere ayimangire na banafunzi bage babiri,
36 alolere abona Yesu agera, aderha: “Tala Omwana gw’entama* gwa Mungu!”
37 Abola banafunzi babiri bayunvirhe aderha ntyo bava bakulikira Yesu.
38 Yesu ahindamukire, abona bamukulikire abazabo: “Bichi muli mwalonza?” Bamubwira: “Rabi (amango echola chinwa chamatafsiribwa k’okuderha, “Mwalimu”), ngahe olamire?
39 Ababwira: “Muyinje mwahabona.” Bava bagenda naye babona ahalilamire, bayorha naye olola lusiku; zaliri hofi sakumi z’egolo.
40 Andreya mwene-wabo Simoni Petro aliri muguma mw’abola bayunvaga ebi Yowane aderhaga, bakulikira Yesu.
41 Arhanga kuja kulonza Simoni mwene-wabo, amubwira: “Rhwabwene Masiya” (amango echola chinwa chamatafsiribwa k’okuderha, “Kristu”)
42 amuheka emunda Yesu ali. Yesu amulolereza, amubwira: “Woyo we Simoni, mugala wa Yowane; wayirikwa Kefa” (amango lyamatafsiribwa k’okuderha, “Petro”).
43 Olusiku lwakulikiragaho, Yesu aliri alonza kuja e Galilaya. Abugana Filipo amubwira: “Yinja obe mwanafunzi wani.”
44 Filipo aliri we Betsaida omu vile ya Andreya na Petro.
45 Filipo abugana Natanaeli amubwira: “Rhwabwene eyi Musa, Esheriya, n’Abalebi bayandikaga oku bimulolere. Ye Yesu, mugala wa Yosefu we Nazareti.”
46 Aliko Natanaeli aderha: “Hali echintu chinja chakarhenga e Nazareti si? Filipo amushubiza: “Yinja, ochilolere.”
47 Yesu abwene Natanaeli ali ayinja emunda ali, aderha ntya oku bimulolere: “Tala kweri Omuizraeli orhali mu bulyalya.”
48 Natanaeli amubwira: “Gurhe wagalire kumenya?” Yesu amubwira: “Embere Filipo akuhamagale, nalikubwene ey’oli omu shi w’omurhi gw’etini.”
49 Natanaeli amushubiza: “Mwalimu, oli Mugala wa Mungu, oli Mwami we Izraeli.”
50 Yesu amushubiza: “Wamayemera bulala nakubwirire oku nalikubwene ey’oli omu shi w’omurhi gw’etini si? Wabona bintu binene bisomeze kulusha ebila.”
51 Ashuba kumubwira: “Kweri imbabwirire okuli, mwabona embingu echingwirwe na bamalayika ba Mungu bali bazamuka n’okuyandagalira emunda Mwen’omuntu ali.”
