Yayandikwaga na Yowane 10:1-42
10 Okuli kweri imbabwirire, omuntu orhagerere omu mulyango y’aja omu lugurhu lw’entama, s’anashona n’okurhogeramo kugerera eyindi-yindi njira, ey’ali mwizi anali chishambo.
2 Aliko olala onagerera omu mulyango ye mungeri w’entama.
3 Omulanzi w’omulyango anamuchingulira, n’entama zanayunva omulenge gwage. Anahamagala entama zage omu zino n’okuziheka embuga.
4 Amango amahulusa entama zoshi, anaja embere wazo, n’entama zanamukulikira bulala ziyinji omulenge gwage.
5 Zirhakakulikira omwinjiira haba n’akatyu, si zanamuyaka bulala zirhenji omulenge gw’abenjiira.
6 Yesu abaha ogola mufano, aliko barhayunvaga ebyalonzaga kubabwira.
7 Yesu ashuba kuderha: “Okuli kweri imbabwirire, nyono nye mulyango gw’entama.”
8 Boshi bayinjire embere nyinje bachihala oku bali bangeri b’okuli, bali bezi binali bishambo; aliko entama zirhabayunvirizaga.
9 Nyono nye mulyango; buli yeshi wangererako n’okuja omu lugurhu lw’entama nj’achunguka. Nj’ajamo n’okurhengamo, anapata n’eby’okulya.
10 Omwizi anayinja kuyiba, okuyirha n’okuharabisa konyine. Aliko nyono nayinjire y’entama zipata akalamo, akalamo k’esiku n’amango.
11 Nyono nye mungeri mwinja, omungeri mwinja anahaana akalamo kage eju y’entama.
12 Omukozi banalipa, orhali mungeri arhanali nyina entama, ey’abona embwa y’elubala yayinjire, analibirha analeka entama—embwa y’elubala yanazifarha n’okuzishandaza—
13 bulala, ali mukozi banalipa, arhanalagire oku ntama.
14 Nyono nye mungeri mwinja. Inyinji entama zani, n’entama zani zinyinji,
15 nka kulala Darha anyinji nani inyinji Darha; nahaana n’akalamo kani eju y’entama.
16 “Imperhe n’ezindi ntama zirhali za mu lunola lugurhu. Nazo bihemere inzilerhemo, nji zayunviriza omulenge gwani, zoshi zanaba chishumba chiguma, zanagwarha na mungeri muguma.
17 Che chirhuma Darha anansima bulala nahaana akalamo kani, omu kuntu nji nshube inkapate.
18 Inta muntu wakakanyega si nakahaana oku bulonza bwani nyenyine. Imperhe obuhashe b’okukahaana, inamperhe obuhashe b’okushuba kukapata. Elila lili rhegeko Darha ampaga.”
19 Kandi haba okurhayunvikana omu Bayahudi eju y’ebyola binwa aderhaga.
20 Banene mubo baliri baderha: “Ali m’omuzimu anasirehere. Bulagurhe yimwamuyunviriza?”
21 Abandi baderha: “Arhali by’ebinwa ebila omuntu oli m’omuzimu anaderha. Omuzimu akagala kufungula amasu m’empumi si?”
22 Agola mango haba Olusiku Lukulu l’Okuhaana e Hekalu emwa Mungu. Chaliri chihe ch’emboho nene,
23 na Yesu aliri alambagira omu hekalu omu veranda ya Sulemani.
24 Abayahudi bava bamuzunguluka bamubwira: “Wagenderera kurhuleka mw’engangane kugera mangochi? Akaba woyo we Kristu orhubwire bwinja-bwinja.”
25 Yesu abashubiza: “Nababwirire, aliko murhaza kuyemera. Ebindi nakola omu zino lya Darha, bili byahaana obuhamirizi eju yani.
26 Aliko murhayemerere bulala murhali ntama zani.
27 Entama zani zinayunviriza omulenge gwani, inziyinji nazo zinankulikira.
28 Naziha akalamo k’esiku n’amango, zirhakaharabiswa haba n’akatyu, na nta muntu wakazishamula omu fune yani.
29 Ebi Darha ampere biherhe akachiro kulusha ebindi bintu byoshi, na nta muntu wakabishamula omu fune ya Darha.
30 Nyono na Darha rhuli muguma.”*
31 Kandi Abayahudi barhalagula amabale yi bamubandamo.
32 Yesu abashubiza: “Nabakolere bintu binene binja birhengere emwa Darha. Chintu chihe chiguma mu byoshi charhuma mwambanda amabale?”
33 Abayahudi bamushubiza: “Rhwakubanda amabale arhali mpu bulala wakolere echintu chinja, si bulala wadukangire Mungu; chiro akaba k’oli muntu, oli wachijira mungu.”
34 Yesu abashubiza: “Birhayandikirwe ntya omu Marhegeko menyu, ‘Naderhere: “Muli bamungu”’?*
35 Akaba Mungu ayirikire balala echinwa chage chachirire olubanja oku bali ‘bamungu;’ n’obola amandiko marhakahindamulwa,
36 nye muntu Darha acheseze anantuma omu gulu, gurhe mwakambwira mpu ‘Wadukangire Mungu,’ okwenge naderhere oku ndi Mugala wa Mungu?
37 Akaba ntali nakola ebi Darha alonzeze inkole, murhanyemeraga.
38 Aliko akaba indi nabikola, chiro akaba murhali mwanyemera, muyemere eju y’ebindi nakola, yi muhikira aha mwamenya munagenderere kumenya oku Darha ali omu buguma nani; nani indi omu buguma na Darha.”
39 Echola charhuma kandi balonza oku bamufarhe, aliko abatoroka.
40 Ashuba kugenda ayambukira oku lwindi lunda lwe Yordani emunda Yowane aliri abatiziza burhanzi, aberayo.
41 Bantu banene bayinja emunda ali barhondera kuderha: “Inta chisomerene n’echiguma Yowane akolere, aliko ebintu byoshi aderhaga oku bilolere oyula muntu byaliri by’okuli.”
42 Bantu banene bagwarha obwemere muye eyola munda.
