Yayandikwaga na Yowane 3:1-36
3 Haliri Mufarisayo muguma waliyirikirwe Nikodemu, aliri murhambo w’Abayahudi.
2 Ayinja emunda Yesu ali ebudufu amubwira: “Rabi, rhumenyere oku oli mwalimu orhengere emwa Mungu, bulala nta muntu wakagala kujira ebila bisomerene byoshi oli wajira nka Mungu arhali naye.”
3 Omu kumushubiza Yesu amubwira: “Okuli kweri inkubwirire, nk’omuntu arhashubire kuburhwa arhakaja omu Bwami bwa Mungu.”
4 Nikodemu amubaza: “Gurhe omuntu akashuba kuburhwa n’obo akala ashajire? Akachija omu nda ya nyina obwakabiri y’ashuba kuburhwa si?”
5 Yesu amushubiza: “Okuli kweri inkubwirire, nk’omuntu arhaburhirwe n’amenji n’eroho, arhakaja omu Bwami bwa Mungu.
6 Omubiri gunaburha omubiri n’eroho linaburha eroho.
7 Orhasomerwaga okubona nakubwirire oku mukwanene mushube muburhwe.
8 Omuhusi gunaja emunda gulonzeze, wanayunva n’okuntu guli gwahusa, aliko ey’orhenji ngahe gwarhenga na ngahe guli gwaja. Intyo kon’oko ku binaba ku buli yeshi waburhirwe n’eroho.”
9 Nikodemu amubwira ntya: “Gurhe ebyola byakashobokana?”
10 Yesu amushubiza: “Oli mwalimu omu Izraeli aliko orhenji ebila bintu?
11 Okuli kweri inkubwirire, rhuli rhwaderha ebintu rhumenyere n’okuhaana obuhamirizi bw’ebintu rhwachibwenere; aliko murhali mwayemera obuhamirizi rhuli rhwahana.
12 Obola indi nababwira ebintu by’oku gulu eyi murhabiyemera, nk’ajire nababwira eby’omu mbingu, mwakabiyemera?
13 Echindi, nta muntu wazamukire aja embingu olekere olala warhengagayo; k’okuderha, Mwen’omuntu.
14 Nka kulala Musa amanikaga enjoka omu rungu, intyo kon’oko Mwen’omuntu naye akwanene amanikwe,
15 yi buli muntu wagwarha obwemere muye apata akalamo k’esiku n’amango.
16 “Bulala Mungu alizigiire egulu bwenene ahaana Omugala w’echinege, yi buli muntu wayerekana obwemere muye arhaharabiswaga, s’aliko apate akalamo k’esiku n’amango.
17 Bulala Mungu arharhumaga Omugala omu gulu y’alichira olubanja, s’amurhumaga y’egulu lichunguka kumugererako.
18 Buli muntu wayerekana obwemere muye arhachirwa olubanja. Aliko orhayerekana obwemere muye, mira achirwaga olubanja, bulala arhayerekanaga obwemere omu zino lya Mugala wa Mungu w’echinege.
19 Omwangaza gwayinjire omu gulu, aliko abantu basima omwizimya kulusha omwangaza bulala ebijiro byabo byaliri bibi. Echola chi nji charhuma bachirwa olubanja.
20 Bulala omuntu onasima ebintu bibi arhasima omwangaza arhanayinja omu mwangaza y’ebijiro byage birhamenyikana.
21 Aliko buli muntu onajira ebijiro bikwanene anayinja omu mwangaza y’ebijiro byage bimenyikana oku bili bijiro bipatene n’obulonza bwa Mungu.”
22 Enyuma z’aho, Yesu n’abanafunzi bage baja ewa mavilaje me Yudeya, ageza y’akasanzi haguma nabo, analiri abatiza.
23 Aliko Yowane naye aliri abatiziza e Ayinoni hofi ne Salimu, bulala haliri menji manene n’abantu baliri bagenderera kumushimba, anababatiza;
24 bulala Yowane arhaliza kukabulwa omu prizo.
25 Naho abanafunzi ba Yowane barhondera kujira obuhaka n’Omuyahudi oku bilolere okucheswa.
26 Bayinja emunda Yowane ali, bamubwira: “Mwalimu, omenyere si, olala muntu waliri haguma nawe oku lwindi lunda lwe Yordani, eyi wahanaga obuhamirizi oku bimulolere, y’abatiza n’abantu boshi yibaja emunda ali.”
27 Naho Yowane abashubiza: “Ntacho n’echiguma omuntu akapata nk’arhachihabirwe kurhenga embingu.
28 Mwenyine muli bahamirizi oku naliderhere, ‘Arhali nye Kristu, si narhumwaga imbe namurhanga.’
29 Ogwerhe omuhya-mukazi ye muhya-mulume. Aliko omwira w’omuhya-mulume, amango ayumangire hofi naye ey’ali amuyunviriza, anagwarha busime bunene bulala ayunvirhe omulenge g’omuhya-mulume. Bobola, nani obusime bwani bwayenere.
30 Yewe akwanene kugenderera, aliko nyono nanagaluka enyuma.”
31 Orhengere enyanya ali elugulu za boshi. Orhengerere oku gulu ey’anali w’oku gulu n’ebi ali aderha binali by’oku gulu. Orhengere embingu ali elugulu za boshi.
32 Ali ahana obuhamirizi bw’ebyabonaga n’okuyunva, aliko nta muntu oli wayemera obuhamirizi bwage.
33 Buli yeshi wayemerere obuhamirizi bwage naye ayemezeze oku Mungu ali w’okuli.
34 Eyi Mungu arhumire ali aderha ebinwa bya Mungu, bulala Mungu anahaana bwenene eroho lyage.*
35 Darha anazigira Omugala, n’ebintu byoshi abihebere omu fune zage.
36 Owayerekana obwemere omu Mugala apata akalamo k’esiku n’amango. Orhakenga Omugala arhakapata akalamo, n’oburhe bwa Mungu burhakafa bwamurhengereko.
Mahugulo m'efo
^ Ao “arhapima eroho ahana.”
