Yayandikwaga na Yowane 20:1-31
20 Olusiku lurhanzi lw’eboso, Mariya we Magdala aja ewa shinda emiseke-miseke ey’omwizimya guchili, abugana bahirikire ebale lyaliri oku shinda.
2 Agenda alibirhira emunda Simoni Petro n’owindi mwanafunzi Yesu agendaga asima bwenene bali, ababwira: “Bakulire Waliha omu shinda, rhurhanamenyere ngahe bajire kumulyamikiza.”
3 Petro n’oyola windi mwanafunzi baja ewa shinda.
4 Bombi bagenda balibirha, aliko oyola windi mwanafunzi alibirha bwenene kulusha Petro amurhanga ewa shinda.
5 Ayinama ahenguza omu shinda abona ebiraka by’echinusi bili omola, aliko arhajagamo.
6 Simoni Petro ayinja amukulikire yewe aja omu shinda. Naye abona ebiraka by’echinusi omola.
7 Echiraka chaliri oku rhwe lya Yesu chirhaliri haguma n’ebindi biraka, si chalizingirwe chahebwa eburhambi.
8 Buzinda olala windi mwanafunzi warhangaga ewa shinda naye ajamo achibonera, aja ayemera ebi bababwiraga.
9 Bulala barhaliza kuyunva bwinja olwandiko luderhere oku alikwanene kufuka.
10 Abola banafunzi bava bagaluka emwababo.
11 Aliko Mariya ayorha ayumangire ahaburhambi bw’eshinda y’ali alaka. Oku anali alaka, ayunama alola omu shinda,
12 abona bamalayika babiri bayambere emyambaro y’omweru bayikere ah’omubiri gwa Yesu gwalilyamikizwe, muguma ewa rhwe n’owindi ewa magulu.
13 Bamubaza: “Mukazi we, bichi oli walakira?” Abashubiza: “Bahekere Waliha intanamenyere ngahe bamulyamikize.”
14 Amalire kuderha ntyo, ahindamuka abona Yesu ayumangire ahola, aliko arhamenyaga oku Yesu.
15 Yesu amubwira: “Mukazi we, bichi oli walakira? Inde oli walonza?” Bulala Mariya aliwazize oku mulanzi w’ebustani, amubwira ntya: “Waliha akaba we wamuhekere ombwire ngahe wamulyamikize naja kumukulaho.”
16 Yesu amubwira ntya: “Mariya!” Mariya ahindamukire amubwira ntya omu Chiebraniya: “Raboni!” (k’okuderha “Mwalimu!”)
17 Yesu amubwira: “Leka okunfarha bulala ntaza kuja emwa Darha. Aliko ogende obwire bene-berhu oku nkala kuzamukira emwa Darha ye na Yisho, emwa Mungu wani ye na Mungu wenyu.”
18 Mariya we Magdala agenda abwira abanafunzi ntya: “Nabwene Waliha!” Naho abalirabo ebi Yesu amubwiraga.
19 Lyabere golo, olusiku lurhanzi lw’eboso ey’emilyango y’enju abanafunzi balirimo echingirwe bulala baliri bayubaha Abayahudi, Yesu ayinja ayumanga ahagarhi kabo ababwira: “Mugwarhe omurhula.”
20 Amalire kuderha ntyo abayereka efune n’olubavu lwage. Abanafunzi basima okubona Waliha.
21 Yesu ashuba kuderha: “Mugwarhe omurhula. Nka kulala Darha antumaga, nani namabarhuma.”
22 Amalire kuderha ntyo ababuhako ababwira: “Muyankirire eroho lichesibwa.
23 Nka mubabalire omuntu ebyaha byage byababalirwa, na nka murhababalire omuntu ebyaha byage birhababalirwa.”
24 Aliko Tomasi muguma mu balala 12, onayirikwa Mahasha arhaliri n’ababo amango Yesu ayinja.
25 Abanafunzi bamubwira ntya: “Rhwabwene Waliha!” Aliko aderha: “Nka ntaza kubona enkovu z’emisumari omu fune zage n’okuheba omudoke gwani mw’ezola nkovu, inkafunda n’efune yani omu lubavu lwage, ntakabiyemera haba n’akatyu.”
26 Enyuma wa siku munane kandi abanafunzi baliri omu nju, eyi lero Tomasi aliho. Chiro akaba oku emilyango yalichingirwe, Yesu ayinja ayumanga ahagarhi kabo ababwira: “Mugwarhe omurhula.”
27 Ava abwira Tomasi: “Heba omudoke gwawe hanola obone efune zani, onalerhe efune yawe ohume omu lubavu lwani, oje waleka engangane ogwarhe obwemere.”
28 Omu kushubiza Tomasi amubwira: “Wahali na Mungu wani!”
29 Yesu amubaza: “Wamagwarha obwemere bulala wambwene? Abagwerhe obusime bali balala bagwerhe obwemere barhanaza kubona.”
30 Kweri, Yesu alijirire bindi bisomerene binene embere z’abanafunzi bage birhayandikwaga mu chinola chitabu ch’omuzingo.
31 Aliko ebila byayandikirwe yi muyemera oku Yesu ye Kristu Mugala wa Mungu, na bulala mwayemerere mupate akalamo k’esiku n’amango kugerera ezino lyage.
