Yayandikwaga na Yowane 2:1-25
2 Olusiku lwa kasharhu haliri efete y’obuhya omu Kana ye Galilaya na nyina wa Yesu aliriyo.
2 Yesu n’abanafunzi bage nabo balihamagerwe kw’eyola fete y’obuhya.
3 Edivayi yabere eli hofi kuhwa, nyina wa Yesu amubwira: “Nta divayi bachiherhe.”
4 Aliko Yesu amushubiza: “Ebyola birhulolere nyono nawe si? Esa yani erhaza kuhika.”
5 Nyina abwira abaliri bayuhulira abantu: “Mujire buli choshi akababwira.”
6 Ahola haliri rhubindi ndarhu rhw’amenji rhukolerwe n’amabale nk’oku amarhegeko m’Abayahudi malolere okuchichesa malihemere. Buli kabindi kakajire mu bipimo* bibiri changwa bisharhu by’amenji.
7 Yesu ababwira: “Muyunjuze orhula rhubindi mw’amenji.” Bava bayunjuzarho kugera oku bunu.
8 Ava ababwira ntya: “Murhole mageke muhekere oyumangire efete.” Bamuhekera kumo.
9 Omwimangizi w’efete abere ahonja oku menji mahindukire divayi, aliko ey’arhamenyere ngahe eyola divayi yarhenga (abaliri bayuhulira abantu bowe balinji bulala babadomaga amola menji), omwimangizi w’efete ahamagala omuhya mulume
10 amubwira: “Abandi bantu abanarhanga kuhana edivayi nyinja, ey’abantu baba bamalaluka anaja alerha erhalokere. Aliko woyo walichibikire edivayi nyinja kugera bunola.”
11 Yesu ajiraga ebyola omu Kana ye Galilaya. Gwaba murhondero gw’ebisomerene byage, ayerekana obukuze bwage n’abanafunzi bage bagwarha obwemere muye.
12 Enyuma waho, Yesu, nyina, bene-babo n’abanafunzi bage bayandagalira e Kapernaumu, aliko barhamalaga siku zinene eyola munda.
13 E Pasaka y’Abayahudi yaliri hofi kuba, Yesu azamukira e Yerusalemu.
14 Abugana omu hekalu abantu bali baguza enka, entama, epijo* n’abali bakaba efuranga bayikere oku bichumbi.
15 Amalire kuluka enkoni y’enkoba, afukuza abantu baliherhe entama n’enka omu hekalu, ashesha efuranga z’ebicheri z’abaliri bakaba n’okukumbagaza ameza mabo.
16 Abwira n’abaliri baguza epijo* ntya: “Mukule ebila bintu hanola! Muleke okujira enju ya Darha nju y’obuchuruzi!”
17 Abanafunzi bage bayibuka oku Amandiko maderhere ntya: “Obushiru eju y’enju yawe nji bwangulumiramo.”
18 Abayahudi bava bamubaza ntya: “Chimenyeso chihe warhuha charhuyemeza ok’ogwerhe oruhusa l’okujira ebila bintu?”
19 Yesu abashubiza: “Mushande elila hekalu naliyumbaka mu siku esharhu.”
20 Abayahudi bamubwira: “Elila hekalu lyayumbakwaga mu myaka 46, gurhe woyo wakaliyumbaka mu siku esharhu?”
21 Aliko ehekalu aliri aderha gwaliri mubiri gwage.
22 Amango afuka, abanafunzi bage bayibuka oku agendaga azigana kuderha ntyo; bagwarha obwemere omu Mandiko n’omu binwa Yesu aderhaga.
23 Aliko abere ali e Yerusalemu oku lusiku lukulu lwe Pasaka, bantu banene bagwarha obwemere omu zino lyage amango babonaga ebisomerene aliri akola.
24 Yesu arhabanihiraga bulala alibayinji boshi
25 arhanalikenere omuntu yeshi-yeshi w’okumufasiriya oku bilolere omuntu, bulala alimenyere ebyaliri omu murhima g’omuntu.
