Yayandikwaga na Yowane 18:1-40
-
Yuda amalenganya Yesu (1-9)
-
Petro amakolesa engorho (10, 11)
-
Yesu amahekwa emwa Anasi (12-14)
-
Petro amahakana Yesu ob’oburhanzi (15-18)
-
Yesu ali embere za Anasi (19-24)
-
Petro amahakana Yesu obwakabiri n’obwakasharhu (25-27)
-
Yesu ali embere za Pilato (28-40)
-
“Obwami bwani burhali chigabi ch’elila gulu” (36)
-
18 Yesu amalire kuderha ebyola binwa, ayambuka n’abanafunzi bage olubanda lwe Kidroni. Ahola haliri ebustani ajamo yewe n’abanafunzi bage.
2 Omulenganyi wage Yuda aliyinji eyola fasi, bulala Yesu agendaga azigana kubuganana n’abanafunzi bage ahola.
3 Yuda ava ayinja n’echigusho ch’abasoda n’abapolisi b’oku hekalu barhumirwe n’abakulu b’abadahwa n’Abafarisayo, bayinja omola bustani n’ebimole, amatara n’entwaro.
4 Bulala Yesu alimenyere ebintu byoshi byaliri hofi kumuhikira, ashegera embere ababaza: “Inde muli mwalonza?”
5 Bamushubiza: “Yesu we Nazareti.” Naye ababwira: “Ye nyono.” Yuda omulenganyi wage naye aliyumangire ahola haguma nabo.
6 Aliko Yesu abere ababwira mpu “Ye nyono,” baba nk’abagaluka enyuma bagwa ahashi.
7 Bobola ashuba kubazabo: “Inde muli mwalonza?” Baderha: “Yesu we Nazareti.”
8 Yesu abashubiza: “Nababwirire oku ye nyono. Akaba nyi muli mwalonza muleke abala bantu bagende.”
9 Aderhaga ntyo omu kuyeneza ebila binwa aderhaga: “Mu boshi wampaga ntaye n’omuguma nahezeze.”
10 Petro aligwerhe engorho, ayichomola ayishurha omukozi w’omudahwa mukulu amucha okurhwiri kw’ekulyo. Ezino lyage aliri ye Malkusi.
11 Aliko Yesu abwira Petro: “Galula engorho omu luba lwayo. Intakwanene kunywa echikombe Darha ampere si?”
12 Abasoda, omukulu wabo n’abapolisi b’Abayahudi, bafarha Yesu bamushweka.
13 Barhanga kumuheka emwa Anasi bulala aliri eshezala wa Kayafa, waliri mudahwa mukulu ogola mwaka.
14 Kayafa ye wahanulaga Abayahudi oku eli nyungu yabo muntu muguma afire bantu banene.
15 Simoni Petro n’owindi mwanafunzi bakulikira Yesu. Oyola mwanafunzi alimenyikene n’omudahwa mukulu, agenda na Yesu kugera oku mbuga y’omudahwa mukulu,
16 aliko Petro ayorha ayumangire embuga. Oyola mwanafunzi walimenyikene n’omudahwa mukulu, agenda embuga aganira n’omulanzi w’omulyango, achingulira Petro.
17 Omujakazi waliri mulanzi w’omulyango abwira Petro ntya: “Nawe oli muguma omu banafunzi b’oyula muntu, arhali woyo? Petro aderha: “Intali mwanafunzi wage.”
18 Abakozi n’abapolisi balizungulukire omuliro gw’amakala babaga bachanire. Baliri bakaluka bulala haliri emboho. Petro naye aliyumangire haguma nabo ey’ali akaluka.
19 Omudahwa mukulu abaza Yesu oku bilolere abanafunzi bage n’oku bilolere enyingirizo zage.
20 Yesu amushubiza: “Naliri naderha ebinwa byani oku mugaragaro. Naliri nazigana kuyigiriza omu sinagogi, omu hekalu aha Abayahudi boshi banabuganana, ntacho naderhere omu bwibisho.
21 Bulagurhe oli wambaza? Obaze abaliyunvirhe ebi nababwiraga. Tala! Bayinji ebinaliri naderha.”
22 Yesu amalire kuderha ntyo, muguma omu bapolisi baliyumangire ahola amulagasha echigalo omu masu, amubwira: “Intyo k’oli washubiza omudahwa mukulu?”
23 Yesu amushubiza: “Akaba naderhere obubeshi, lerha obuhamirizi buyerekene oku nabeshere, aliko akaba naderhere obukweri bichi wamanshurhira?”
24 Anasi ava amurhuma em’omudahwa mukulu Kayafa ey’anashwekerwe.
25 Simoni Petro aliyumangire ahola ey’ali akaluka, bamubwira: “Si nawe oli muguma omu banafunzi bage, arhali ntyo?” Petro ahakana aderha: “Nanga ntali mwanafunzi wage.”
26 Muguma omu bakozi b’omudahwa mukulu waliri w’omu buko b’olala Petro achaga okurhwiri, aderha: “Arhali woyo wunabonaga haguma naye omu bustani?”
27 Aliko Petro ashuba kuhakana, ahola han’aho oluhazi lwabika.
28 Bakula Yesu emwa Kayafa bamuheka emwa guvernere. Yaliri miseke-miseke. Aliko, bowe barhajaga omu mwa guvernere yi barhazinga bakafunda kulya e Pasaka.
29 Pilato ahuluka ababaza: “Bichi musidakire oyula muntu mwamanderhera?”
30 Bamushubiza: “Nk’oyula muntu arhaliri nyankolamaligo rhurhakamulerhere emwawe.”
31 Bobola Pilato ababwira: “Mumurhole mumuchire olubanja omu kukulikiza amarhegeko menyu.” Abayahudi bamushubiza: “Amarhegeko marharhuyemerere okuyirha omuntu.”
32 Byabaga ntyo omu kuyeneza ebinwa Yesu abaga aderhere, biyerekene lufu luli gurhe aliri hofi kufa.
33 Pilato agaluka omu nju, ahamagala Yesu amubaza: “Woyo we Mwami w’Abayahudi si?”
34 Yesu amushubiza: “Oli wambaza ebikurhengere oku murhima changwa hali abandi bakushambalire oku bindolere?”
35 Pilato amushubiza: “Orhenji oku nyono ntali Muyahudi si? Abantu b’eshanja lwawe n’abakulu b’abadahwa babakulerhere emwani. Bichi wajirire?”
36 Yesu ashubiza: “Obwami bwani burhali chigabi ch’elila gulu. Nk’Obwami bwani bwaliri chigabi ch’elila gulu, abakozi bani bakandwirire yi ntahirwa omu fune z’Abayahudi. Aliko oku bili, Obwami bwani burharhengerere kunola gulu.”
37 Pilato aderha: “K’okuderha oku oli mwami?” Yesu amushubiza: “Wenyine waderhere oku ndi mwami. Echarhumaga naburhwa n’echarhumaga nayinja oku gulu, kuli kuhaana obuhamirizi oku bilolere obukweri. Buli muntu oli oku lunda l’obukweri, anayunviriza omulenge gwani.”
38 Pilato amubaza: “Obukweri che chichi?”
Amalire kuderha ntyo, ashuba kugaluka emunda Abayahudi bali, ababwira: “Intagosa nabwene oyula muntu agwerhe.”
39 Echindi, muba mukomeere oku nkwanene kubashwekulira muntu muguma olusiku lwe Pasaka. Bobola si, mulonzeze imbashwekulire Omwami w’Abayahudi?”
40 Bashuba kuderha ntya n’omulenge gunene: “Ahali h’okushwekula oyula muntu, oshwekule Baraba!” Oyola Baraba chaliri chishambo.
