Yayandikwaga na Yowane 7:1-52
7 Enyuma w’ebyola, Yesu agenderera kulambagira eyi n’eyi omu Galilaya. Arhalilonzeze kujira ntyo omu Yudeya bulala Abayahudi baliri balonza kumuyirha.
2 Aliko Esiku Zikulu z’Amahema* z’Abayahudi zaliri hofi kuba.
3 Bobola bene-babo bamubwira: “Orhenge hanola oje e Yudeya, omu kuntu abanafunzi bawe nabo babone eby’oli wajira.
4 Bulala omuntu olonzeze kumenyikana arhakola ebintu omu bwibisho. Obola oli wakola ebila bintu, ochiyerekane omu gulu.”
5 Omu bukweri bene-babo barhalimugwerhe m’obwemere.
6 Yesu ava ababwira: “Akasanzi kani karhaza kuhika, aliko mwabo mwakagenda amango man’amango.
7 Egulu lirhagwerhe empanvu y’okubashomba, aliko nyono lyanshombere bulala indi nahana obuhamirizi oku ebijiro byalyo bili bibi.
8 Mwabo mube mwazamuka mugende oku lusiku lukulu; nyono ntagenda bonabuno k’olola lusiku lukulu, bulala akasanzi kani karhaza kuhika bwinja-bwinja.”
9 Amalire kubabwira ebyola, ayorha e Galilaya.
10 Aliko bene-babo bamalire kuzamukira e Yerusalemu oku lusiku lukulu, naye azamukirayo aliko arhali oku mugaragaro s’omu bwibisho.
11 Abayahudi barhondera kumulonza oku lusiku lukulu eyi bali baderha: “Ngahe ola muntu ali?”
12 Abantu baliri baboherezana binene oku bimulolere. Baguma banaderha: “Aba muntu mwinja.” N’abandi banaderha: “Nanga. Ali ahabusa abantu.”
13 Kweri nta muntu waliri waderha oku mugaragaro oku bimulolere eju y’okuyubaha Abayahudi.
14 Esiku zikulu zabere zamagabwa kabiri, Yesu aja omu hekalu arhondera kuyigiriza.
15 Abayahudi baliri basomerwa n’okuderha: “Gurhe oyula muntu akamenya amandiko ntya nobo arhajaga oku masomo?”
16 Yesu abashubiza ababwira: “Ebindi nayigiriza birhali byani, si bili by’olala wantumaga.
17 Akaba omuntu yeshi-yeshi alonzeze kujira obulonza bwage, amenya akaba ebindi nayigiriza birhengere emwa Mungu changwa akaba bili bintu indi nachitungira nyenyine.
18 Onaderha eby’achitungiraga anaba eyi ali alonza obukuze bwage yewe yenyine; aliko onalonza obukuze b’olala wamurhumaga, oyola y’eli w’okuli na ntabyo birhakwanene bimubamo.
19 Musa arhalibahere Amarhegeko si? Aliko ntaye n’omuguma mu mwewe onakenga Amarhegeko. Bulagurhe yimwalonza kunyirha?
20 Abantu bamushubiza: “Oli m’omuzimu. Inde oli walonza kukuyirha?”
21 Omu kubashubiza Yesu ababwira: “Najirire chintu chiguma mweshi mwamasomerwa.
22 Echola che charhumaga Musa abaha erhegeko ly’okukata;* arhali mpu lyarhengaga emwa Musa, aliko emwa bashokuliza...nenyu munakata omuntu olusiku lwe sabato.
23 Obola banakata omuntu olusiku lwe sabato mpu yi barhavuna Amarhegeko ma Musa, gurhe mwakaja mwakaliha bwenene eju yani okwenge nafumizye omuntu bwinja-bwinja olusiku lwe sabato?
24 Muleke okucha olubanja omu kulola oku shusho, si muche olubanja omu njira y’okunali.”
25 Naho bantu baguma omu bantu be Yerusalemu barhondera kuderha ntya: “Arhali oyula muntu yi bali balonza kuyirha si?
26 Aliko mulole, ali aderha oku mugaragaro na nta chintu bamubwirire. Abarhambo bayinjire kurhegera bwinja-bwinja oku ye Kristu si?
27 Olekere nantyo, rhumenyere oyula muntu ali wa ngahe; aliko amango Kristu ayinja, ntaye nji wamenya ali wa ngahe.”
28 Yesu abere ali ayigiriza omu hekalu aderha ntya n’omulenge gunene: “Mwabo munyinji munamenyere imba wa ngahe. Ntayinjaga omu kuchirhumiriza, aliko owantumaga ali w’okuli na mwabo murhamuyinji.
29 Nyono imuyinji bulala indi murhumwa orhengere emwage, ye wanantumaga.”
30 Barhondera kulonza gurhe bakamufarha, aliko ntaye wamuhebere kw’efune bulala akasanzi kage karhaliza kuhika.
31 Bantu banene bagwarha obwemere muye, baliri baderha ntya: “Berhu wee, amango Kristu ayinja, nj’ajira bisomerene binene kulusha eby’oyula muntu ali ajira si?”
32 Abafarisayo bayunva abantu yibachiderhesa kubuyabuya oku bilolere ebyola bintu, n’abakulu b’abadahwa n’Abafarisayo barhuma abasoda baje kumufarha.
33 Yesu ababwira: “Nagenderera kuba nenyu kandi kasanzi kageke embere ingaluke emw’owantumaga.
34 Nji mwandonza aliko eyi murhambona, eyi n’emunda indi murhakagerayo.”
35 Abayahudi barhondera kubwirana: “Ngahe oyula muntu alonzeze kuja, omu kuntu rhurhakachimubona? Arhanaba ey’alonzeze kuja omu Bayahudi bashandere eyi n’eyi omu Bagiriki n’okuyigiriza Abagiriki?
36 Bichi alonzeze kuderha omu kuderha mpu, ‘Nji mwandonza aliko eyi murhambona, n’emunda ndi murhakagerayo’?”
37 Olusiku l’obuzinda, k’okuderha, olusiku lukulu bwenene lwa mw’ezola siku zikulu, Yesu ayumanga aderha ntya n’omulenge gunene: “Akaba hali omuntu yeshi-yeshi oyunvirhe enyorha, ayinje emunda ndi anywe.
38 Buli muntu ogwerhe obwemere mu nyono, ‘enyinji z’amenji m’akalamo zamurhengamo zanasuka’ nk’oku amandiko manaderhere.”
39 Aliko, aderhaga ntyo eju y’eroho abaligwerhe obwemere muye baliri hofi kupata; agola mango lirhaliza kubaho, bulala Yesu arhaliza kukuuzwa.
40 Baguma omu bantu bayunvaga ebyola binwa barhondera kuderha: “Kweri, oyula yolala Mulebi.”
41 Abandi baliri baderha: “Oyula ye Kristu.” Aliko abandi banaderha: “E Galilaya yi Kristu nj’arhengerera si oku nanga?
42 Amandiko marhaderhere oku Kristu nj’arhengerera omu luburho lwa Daudi, e Betlehemu, omu vilaje Daudi alirimo si?”
43 Harhengerera okurhayunvikana omu bantu oku bimulolere.
44 Baguma mubo baliri balonza bamufarhe, aliko ntaye n’omuguma mubo wamuhebere kw’efune zage.
45 Abasoda bagalukire emunda abakulu b’abadahwa n’Abafarisayo bali, abola bakulu bababaza: “Bulagurhe murhamulerhere?”
46 Abasoda bashubiza: “Nta muntu wachigerere aderha kuguma n’oyula muntu.”
47 Abafarisayo babashubiza: “Nenyu murhabaga eyi mwarhebekerwe?
48 Hali omurhambo n’omuguma changwa Omufarisayo wamugwarhire m’obwemere si? Ntaye chiro.
49 Aliko abala bantu barhamenyere Amarhegeko, bali bantu bavumirwe.”*
50 Nikodemu wajaga kulola Yesu mango maguma, aliri muguma mw’abola Bafarisayo, ababwira ntya:
51 “Amarhegeko merhu marhachira omuntu olubanja buzira kurhanga kumuyunviriza n’okumenya eby’ali ajira, arhali ntyo?”
52 Bamushubiza: “Nawe oba we Galilaya si? Osuzume Amandiko bwinja wabona oku nta mulebi okwanene kurhenga e Galilaya.”*
