Yayandikwaga na Yowane 8:12-59
8 12 Yesu ashuba kuganira nabo ababwira: “Indi mwangaza gw’egulu. Owankulikira arhalambagira omu mwizimya, s’agwarha omwangaza gw’akalamo.”
13 Abafarisayo bamubwira: “Oli wahana obuhamirizi eju yawe wenyine; obuhamirizi bwawe burhali b’okuli.”
14 Omu kubashubiza Yesu aderha: “Chiro akaba oku ndi nahana obuhamirizi eju yani nyenyine, obuhamirizi bwani buli b’okuli, bulala inyinji emunda narhengaga n’emunda indi naja. Aliko mwabo murhenji ngahe narhengaga na ngahe indi naja.
15 Eyi mwacha olubanja oku mubiri mulola, aliko nyono ntaye nachirire olubanja chiro.
16 Na chiro nacha olubanja, olubanja lwani luli l’okuli, bulala ntali nyenyine, si Darha wantumaga ali haguma nani.
17 N’echindi, na chiro omu Marhegeko menyu hayandikirwe: ‘Obuhamirizi bwa bantu babiri buba b’okuli.’
18 Nyono indi nahana obuhamirizi oku bindolere, na Darha wantumaga ali ahana obuhamirizi oku bindolere.”
19 Naho bamubaza: “Ngahe Yisho ali?” Yesu abashubiza: “Murhanyinji murhanayinji na Darha chiro. Nka mwalinyinji, mwakamenyere na Darha.”
20 Aliri ayigiriza omu hekalu amango aderhaga ebyola binwa, ey’ali aha banabika entulo. Aliko nta muntu wamufarhire bulala akasanzi kage karhaliza kuhika.
21 Yesu ashuba kubabwira: “Inkala kuchigendera, mwandonza aliko mwafa omu chaha chenyu. Emunda naja murhakagerayo.”
22 Abayahudi barhondera kuderha: “Akala kuchiniga si? Bulala aderhere mpu, ‘Emunda naja murhakagerayo’”
23 Agenderera kubabwira: “Mwabo mwarhengaga oku gulu; aliko nyono narhengaga embingu. Mwabo muli ba mw’elila gulu; aliko nyono intali wa mw’elila gulu.
24 Echola che charhumaga nababwira oku mwafa omu byaha byenyu. Bulala akaba murhayemerere oku nyono nye yewe, mwafa omu byaha byenyu.”
25 Barhondera kumubaza: “Oli nde?” Yesu abashubiza: “Na bichi birhumire indi nashiba naderha nenyu?
26 Ingwerhe binene by’okuderha eju yenyu n’okubachira olubanja kubyo. Kweri, owantumaga ali w’okuli, na byoshi nayunvaga emunda ali indi nabiderha omu gulu.”
27 Barhamenyaga chiro oku aliri ababwira oku bilolere Eshe w’omu mbingu.
28 Yesu ababwira: “Hanola nji mumala kumanika Mwen’omuntu, nji mwamenya oku nyono nye yewe n’oku nta chintu n’echiguma inanjira omu kuchirhumiriza; si nk’oku Darha ananyigirizaga ku nandi naderha ebila bintu.
29 N’olala wantumaga ali haguma nani; arhandekaga nyenyine, bulala amango moshi inanjira ebimusimisize.”
30 Abere ali aderha ebyola byoshi, banene bagwarha obwemere muye.
31 Naho Yesu agenderera kubwira Abayahudi babaga bagwarhire obwemere muye: “Mukagenderera kuyorha omu chinwa chani, kweri eyi muli banafunzi bani,
32 mwamenya okuli, n’okuli kwabakula omu buja.”
33 Bamushubiza: “Rhuli luburho lwa Abrahamu, rhurhanasaga kuba baja b’omuntu haba n’eliguma. Gurhe wakaja waderha mpu, ‘Mwarhenga omu buja’?”
34 Yesu abashubiza: “Kweri imbabwirire, buli muntu onajira echaha ali muja w’echaha.
35 Echindi, omuja arhagenderera kubera omu nju emyaka n’emyaka; si mugala wa nyin’enju anaberamo esiku n’amango.
36 Che chirhumire, nka Mugala wa Mungu amabakula omu buja, mwanarhenga omu buja bwinja-bwinja.
37 Imenyere oku muli luburho lwa Abrahamu. Aliko muli mwalonza kunyirha bulala echinwa chani chirhajirire amajambere omu mirhima yenyu.
38 Indi naderha ebinabonaga amango naliri na Darha, aliko mwabo muli mwajira ebi mwayunvaga kurhenga emwa yisho.”
39 Bamushubiza: “Darha ali Abrahamu.” Yesu ababwira: “Nka mwaliri bana ba Abrahamu, mwakakolere ebi Abrahamu aliri akola.
40 Aliko yimwalonza kunyirha, nyono muntu wababwirire obukweri nayunvaga emwa Mungu. Abrahamu arhajiraga ebili ntyo.
41 Munakola ebijiro bili nk’ebya yisho.” Bamushubiza: “Rhurhali bana baburhwaga omu bubaraga; rhugwerhe Darha muguma, Mungu.”
42 Yesu ababwira: “Nka Mungu aliri Yisho, mwakanzigire, bulala indi hano okwenge narhengaga emwa Mungu. Ntayinjaga omu kuchirhumiriza, aliko Yewe yenyine yi wantumaga.
43 Bulagurhe murhali mwayunva ebindi naderha? Bulala murhakayemera echinwa chani.
44 Muli bana ba yisho Ibilisi, munagwerhe enyorha y’okujira enyifinjo za yisho. Abaga munizi amango arhonderaga, arhanagendereraga kubera omu kuli, bulala okuli kurhamubamo. Amango ali aderha obubeshi anaderha omu kukulikiza oborhere bwage, bulala aba mubeshi ye n’eshe w’obubeshi.
45 Aliko bulala nyono indi nababwira okuli, murhali mwanyemera.
46 Inde mu mwewe wakayemeza oku ngwerhe echaha? Akaba indi naderha obukweri, bulagurhe murhali mwaja mwanyemera?
47 Orhengerere emwa Mungu anayunviriza ebinwa bya Mungu. Che chirhumire murhali mwanyunviriza bulala murharhengerere emwa Mungu.”
48 Omu kushubiza, Abayahudi baderha: “Orhabwene oku rhwaliderhere obukweri amango rhwaderhaga ok’oli Musamariya onali m’omuzimu?
49 Yesu abashubiza: “Intali m’omuzimu, aliko indi nakengesa Darha, nenyu muli mwansuzagura.
50 Aliko intali nachilonzeza obukuuze, si hali oli wabulonza yenacha n’olubanja.
51 Kweri imbabwirire, buli yeshi wakenga echinwa chani, arhakafa afire haba n’akatyu.”
52 Abayahudi bamubwira: “Ahala harhwamaja rhwamenya oku oli m’omuzimu. Abrahamu afire, n’abalebi bafa aliko woyo wamaderha, ‘Buli yeshi wakenga echinwa chani arhakafa ahonjere oku lufu haba n’ehityu.’
53 Orhali mukulu kulusha Darha Abrahamu wafire, arhali ntyo? Abalebi nabo bafire. Woyo oli wachirhola nka nde?”
54 Yesu abashubiza: “Nka nchihere obukuuze, ey’obukuze bwani buli bwa busha. Darha y’eli ampa obukuuze, eyi muli mwaderha okw’ali Mungu wenyu.
55 Mwabo murhaza kumumenya, aliko nyono imuyinji. Nka nderhere oku ntamuyinji, nanaba mubeshi kuguma nenyu. Aliko nyono imuyinji inankengere echinwa chage.
56 Yisho Abrahamu aligwerhe busime bunene omu kuba anihire okubona olusiku nji nayinja,* analilubwene, asima.”
57 Abayahudi bamubwira: “We muntu orhaza kuyeneza chiro myaka 50, walibwene ku Abrahamu si?”
58 Yesu aderha: “Okuli kweri imbabwirire, embere Abrahamu abeho, nyono narhulagaho.”
59 Bava barhondera kurholagula amabale bamubanda, aliko Yesu achibisha arhenga omu hekalu.
Mahugulo m'efo
^ Ao “okubona olusiku lwani.”
