Yayandikwaga na Yowane 11:1-57
11 Mulume muguma oyirikirwe Lazaro alilwere. Aliri we Betaniya, evilaje ya Mariya na mukulu wage Marta.
2 Oyola Mariya ye washesheraga Waliha kw’amarashi n’okumushangula amagulu omu kukolesa enviri zage; Lazaro walilwere aliri musheja wabo.
3 Bali-babo barhumira Yesu obula burhumwa: “Yunva Waliha, olala ozigira bwenene alwere.”
4 Aliko Yesu ayunvirhe ntyo, aderha: “Omuhigo g’obula bulwala kurhali kumuyirha, si kuli kuha Mungu obukuuze, omu kuntu Mugala wa Mungu akuuzwe kugerera obola bulwala.”
5 Yesu agendaga azigira Marta, Mariya na Lazaro.
6 Aliko amango ayunva oku Lazaro alwere, ashuba kumala zindi siku ebiri emunda aliri.
7 Enyuma w’aho, abwira abanafunzi bage ntya: “Rhushube rhuje e Yudeya.”
8 Abanafunzi bamubwira: “Mwalimu, abantu be Yudeya bachizindire kubwira bakuyirha n’amabale, kandi mpu washuba kujayo?”
9 Yesu abashubiza: “Haba sa 12 z’ezuba, arhali ntyo? Nk’omuntu ali alambagira ezuba, nta chintu akasirhalako bulala ali abona omwangaza gw’elila gulu.
10 Aliko nk’omuntu ali alambagira ebudufu, anasirhala, bulala nta mwangaza gumulimo.”
11 Amalire kuderha ebyola binwa, ayongera ntya: “Lazaro mwira werhu ajir’ero, aliko nabalamirayo kumuchula.”
12 Abanafunzi bamubwira: “Waliha, akaba ajir’ero, achiyunva bwinja.”
13 Aliko Yesu aliri aderha oku bilolere olufu lwa Lazaro. Si bawaza okw’ali aderha oku alyamire y’ahumuka.
14 Yesu aja abafasiriya bwinja: “Lazaro afire,
15 inansimire okubona ntaliriyo, omu kuntu ebi nkala kuja kukolayo birhume mwagwarha obwemere. Muleke rhuje kumulola.”
16 Tomasi waliyirikirwe Mahasha abwira ababo banafunzi ntya: “Muleke nerhu rhugende omu kuntu rhufe haguma naye.”
17 Yesu ahikireyo, abugana Lazaro amamala siku ene omu shinda.
18 E Betaniya yaliri hofi ne Yerusalemu, nka ku bilometre bisharhu ntya.
19 Banene omu Bayahudi baliyinjire kurhuliriza Marta na Mariya bulala musheja wabo abaga afire.
20 Marta ayunvirhe oku Yesu ali ayinja, agenda y’abuganana naye; aliko Mariya ayorha ayikere omu nju.
21 Marta abwira Yesu ntya: “Waliha, nka waliri hanola, musheja werhu arhakafire.
22 Aliko chiro na bunola, imenyere oku echintu choshi wahema Mungu, Mungu akuhacho.”
23 Yesu amubwira: “Musheja wenyu afuka.”
24 Marta amubwira: “Imenyere oku nj’afuka oku bufuke bw’amango mayinjire.”
25 Yesu amubwira: “Nye bufuke nye na kalamo. Buli yeshi wayerekana oku agwerhe obwemere mu nyono, chiro afa ashuba kulama;
26 na buli yeshi olamire n’okuyerekana oku agwerhe obwemere mu nyono arhakafa. Oyemerere ntyo si?”
27 Marta amushubiza: “Nechi Waliha, inyemerere oku we Kristu, Mugala wa Mungu, olala walikwanene kuyinja omu gulu.”
28 Amalire kuderha ntyo, aja kuhamagala mudorho wage Mariya, amubohereza ntya: “Mwalimu ayinjire, ali akuhamagala.”
29 Ayunvirhe ntyo, ayumuka juba-juba aja emunda Yesu ali.
30 Yesu arhaliza kuja omu vilaje, aliko alichili emunda babugananaga na Marta.
31 Abayahudi baliri na Mariya omu nju eyi bali bamurhuliriza, babwene ayumuka juba-juba n’okuhuluka, bamukulikira eyi bawazize oku aja kulakira ewa shinda.
32 Mariya agerere aha Yesu ali, amubwene achikabula oku magulu mage amubwira: “Waliha, nka waliri hanola, musheja werhu arhakafire.”
33 Yesu abwene okuntu Mariya ali alaka n’Abayahudi bayinjaga haguma naye nabo bali balaka, ayunva akahinda kanene n’akababaro.
34 Abazabo: “Ngahe mwamulyamikize?” Bamushubiza: “Waliha, yinja olole.”
35 Yesu arhoza emiziga.
36 Abayahudi barhondera kuderha: “Mulole kangana gurhe alimuzigire!”
37 Aliko baguma mubo baderha: “Oyula muntu wafungulaga amasu m’omuntu walihumire, arhakagalire kujira okuntu Lazaro arhafaga si?”
38 Yesu ashuba kuyunva kahinda kanene, enyuma w’aho aja ewa shinda. Omu bukweri lwaliri lukunda luchingirwe n’ebale.
39 Yesu aderha: “Mukule elila bale.” Marta, mwali-wabo oyola nyakufa aderha: “Waliha, akwanene kuba eyi akala ali abaya, bulala hamagera siku ene.”
40 Yesu amubwira: “Intalikubwirire oku okagwarha obwemere wabona obukuuze bwa Mungu?”
41 Bava bakula ebale. Yesu alola embingu aderha: “Darha, koko okubona wanyunvirize.
42 Kweri, imenyere oku amango moshi onanyunviriza; aliko naderhere ntyo y’abala bantu boshi banzungulukire bayemera oku we wantumaga.”
43 Amalire kuderha ebyola binwa, ahamagala n’omulenge gunene: “Lazaro, huluka!”
44 Omuntu wabaga afire ahuluka eyi amagulu n’amaboko mage marhubirwe n’ebiraka, eyi n’amasu mage marhubirwe n’echindi chiraka. Yesu ababwira: “Mumushwekule mumuleke agende.”
45 Nantyo, banene omu Bayahudi bayinjaga kulola Mariya, babonaga n’ebi Yesu ajiraga, bagwarha obwemere muye,
46 aliko baguma mubo baja kulola Abafarisayo, bababwira ebi Yesu ajirire.
47 Abakulu b’abadahwa, n’Abafarisayo bajira embuganano ye Sanendrini yoshi, baderha: “Gurhe rhujirage baza!” Bulala oyula muntu ali ajira bisomerene binene!
48 Rhukamuleka agenderere, abantu boshi bagwarha obwemere muye, n’Abaroma bayinja banarhunyaga ehekalu lyerhu n’eshanja lyerhu.”
49 Aliko muguma mubo oyirikirwe Kayafa, waliri mudahwa mukulu ogola mwaka ababwira: “Ntacho mumenyere chiro,
50 murhanabwene oku eli nyungu yenyu muntu muguma afe eju y’abantu ahali eshanja lyoshi liharabiswe.”
51 Arhaderhaga ntyo oku bulonza bwage yenyine, si bulala aliri mudahwa mukulu ogola mwaka, aliri ahana obulebi oku Yesu alikwanene kufa eju y’abantu,
52 arhanali eju y’abantu bonyine, si n’okugusha abana ba Mungu babaga bashandere eyi n’eyi, babe omu buguma.
53 Kurhangira agola mango, bamujiira enama y’okumuyirha.
54 Echola charhuma Yesu arhachigenda alambagira oku mugaragaro emw’Abayahudi, arhenga eyola munda aja omu teritware eli hofi n’erungu, omu vile enayirikwa Efraimu, ayorha n’abanafunzi bage eyola munda.
55 Bulala e Pasaka y’Abayahudi yaliri hofi kuba, bantu banene barhenga omu mavilaje bazamukira e Yerusalemu embere e Pasaka ebe, yi bachichesa omu kukulikiza emigenzo y’okuchichesa.
56 Barhondera kulonza Yesu n’okubwirana ntya eyi bayumangire omu hekalu: “Gurhe muwazize? Arhayinja oku lusiku lukulu si?”
57 Aliko abakulu b’abadahwa n’Abafarisayo babaga bahaanire erhegeko oku buli yeshi wakamenya aha Yesu ali anaja kubabwira, yi bamufarha.
