Yayandikwaga na Yowane 16:1-33
16 “Nababwirire ebila byoshi yi murhagoma.
2 Abantu nji babafukuza n’okubacha omu sinagogi. Omu bukweri esa yayinjire amango buli muntu nji w’abayirha nj’awaza mpu ali akolera Mungu akasi kachesibwa.
3 Aliko nji bajira ebyola byoshi bulala barhahikiraga kumenya Darha changwa nyono.
4 Chiro akaba ntyo, nababwirire ebyola byoshi omu kuntu hanola nji birhengerera muyibuke oku nabaga nababwirirebyo.
“Intababwiraga ebila byoshi oku murhondero bulala naliri haguma nenyu.
5 Aliko lero naja em’olala wantumaga; na nta muntu n’omuguma mu mwabo wambaza, ‘Ngahe waja?’
6 Aliko emirhima yenyu eyunjwire m’omugayo bulala nababwirire ebila byoshi.
7 Chiro akaba ntyo, indi nababwira okuli, nagenda oku nyungu yenyu. Nka ntagendere, omugwasi nj’arhayinja emunda muli, si nkagenda nji nabarhumiraye.
8 N’amango nj’ayinja, nj’aha egulu echemezo ch’okuli oku bilolere echaha, okunali n’oku bilolere olusiku l’okucha olubanja:
9 ech’oburhanzi oku bilolere echaha bulala barhayerekanaga obwemere mu nyono;
10 naho oku bilolere okunali, bulala naja emwa Darha murhakanachimbona;
11 na buzinda oku bilolere olusiku l’okucha olubanja, bulala omurhegesi wa linola gulu achirirwe olubanja.
12 “Inchigwerhe bindi binene nababwira, aliko murhakagala kubiyunva bunola.
13 Chiro akaba ntyo, amango omurhabazi nj’ayinja, eroho ly’okuli, nj’abayerekeza yi muyunva bwinja okuli, bulala nj’arhaderha omu kuchirhumiriza, si nj’aderha eby’ali ayunva n’okubamenyesa ebyayinja.
14 Nj’ankuuza bulala nj’ahaabwa ebinwa birhengere emwani n’okubamenyesabyo.
15 Ebintu byoshi Darha agwerhe bili byani. Che chirhumire indi nababwira k’oyola mugwasi nj’abamenyesa ebi namubwirire.
16 Enyuma wa kasanzi kageke murhachimbona, n’enyuma wakasanzi kageke mwambona.”
17 Baguma omu banafunzi bage barhondera kubwirana: “Bichi alonzeze kuderha omu kurhubwira, mpu ‘Enyuma wa kasanzi kageke murhachimbona, n’enyuma wakasanzi kageke mwambona,’ n’okuderha ‘Bulala naja emwa Darha’?
18 Bobola baliri baderha ntya: “Bichi alonzeze kuderha omu kurhubwira, ‘Kasanzi kageke?’ Rhurhenji eby’ali alonza kuderha.”
19 Yesu alimenyere oku bakala mubaza, ava ababwira ntya: “Muli mwabazana ntyo bulala naderhere: ‘Enyuma wa kasanzi kageke murhachimbona, n’enyuma wakasanzi kageke mwambona’?
20 Kweri imbabwirire, mwalaka n’okuchiganya, aliko egulu lyasima. Mwayunva omugayo aliko omugayo gwenyu gwahinduka busime.
21 Amango omukazi ali aburha, anayunva omugayo bulala akasanzi kage kahikire, aliko ey’amala kuburha omwana, arhakachiyibuka amalumwa bulala agwerhe obusime ok’omwana aburhirwe omu gulu.
22 Bobola nenyu mugwerhe omugayo, aliko nji nashuba kubabona eyi mugwerhe obusime na nta muntu nji wabanyega obusime bwenyu.
23 Agola mango nta chibazo n’echiguma nji mwambaza. Kweri imbabwirire, echintu choshi-choshi mwahema Darha, abahacho omu zino lyani.
24 Kugera bunola nta chintu muza kuhema omu zino lyani. Muheme mwahaabwa, y’obusime bwenyu buba bunene bwenene.
25 Nababwirire ebila byoshi omu kukolesa emifano. Aliko akasanzi kayinjire amango nta chikolesa emifano omu kuganira nenyu, si nji nababwira bwinja-bwinja oku bilolere Darha.
26 Agola mango nji mwahema Darha ebintu omu zino lyani. Omu kuderha ntyo, ntalonzeze kuderha oku nye nagenda nabahemera ebintu emwa Darha.
27 Bulala Darha naye anabazigira okubona mwanzigiire mwanayemera oku nayinjaga nka murhumwa wa Mungu.
28 Nayinjaga nka murhumwa wa Darha, naja omu gulu. Lero bunola nkala kurhenga omu gulu n’okugaluka emwa Darha.
29 Abanafunzi bage bamubwira: “Obwene! Ahola wamaja waderha bwinja-bwinja, buzira kukolesa emifano.
30 Rhwamaja rhwamenya ok’oyinji ebintu byoshi orhanakenere omuntu yeshi-yeshi wajira echakubaza. Eju y’echola rhwamayemera oku warhengaga emwa Mungu.”
31 Yesu abashubiza: “Yimwaja mwayemera?
32 Mumenyere! Akasanzi kayinjire, okuderha okuli kahikire, amango mwashandala eyi n’eyi, buli muguma wenyu anaja emwage mwanandeka nyenyine. Aliko ntali nyenyine bulala Darha ali haguma nani.
33 Nababwirire ebila byoshi yi mupata omurhula kungererako. Mwahurana bibazo binene omu gulu, aliko muchihe omurhima! Nahimire egulu.”
