Yayandikwaga na Yowane 21:1-25
21 Enyuma w’ahola Yesu ashuba kuchiyerekana oku banafunzi bage oku nyanja ye Tiberiya. Intya ku achiyerekanaga:
2 Simoni Petro, Tomasi (oyirikwa Mahasha), Natanaeli we Kana ye Galilaya, bagala ba Zebedayo na bandi banafunzi babiri, boshi baliri haguma.
3 Simoni Petro ababwira: “Nyono naja kurhega.” Bamubwira: “Leka rhugende nawe.” Bagenda baja omu bwarho, aliko m’obola budufu ntacho bayirhire.
4 Bwabere buli hofi kucha, Yesu ayumanga eshi, aliko abanafunzi barharhegeraga oku yewe.
5 Yesu ababwira: “Bana we, nta fi muherhe y’okulya si?” Bamushubiza: “Ntayo!”
6 Ababwira: “Murhoze omulaga oku lunda lw’ekulyo l’obwarho, mwayirha.” Bava bagurhoza, aliko barhagalaga kugukulula eju y’efi zinene zajagamo.
7 Omwanafunzi Yesu agendaga azigira bwenene abwira Petro: “Waliha olira!” Petro ayunvirhe oku Waliha, ayambala omwambaro gwage bulala aliri butambara, achikabula omu menji.
8 Aliko abandi banafunzi bayinja omu bwarho bugeke eyi bali bakulula omulaga guyunjwire efi, bulala barhaliri hale n’eshi si baliri ku hofi metre 90 zonyine.
9 Bagerere eshi, babona omuliro gw’amakala guli kw’efi n’omugati.
10 Yesu ababwira: “Mulerhe oku fi mwayirhire.”
11 Simoni Petro ava aja omu bwarho akululira omulaga eshi eyi guyunjwire efi zizibuzibu 153. Aliko chiro akaba oku zalilugire bwenene, omulaga gurhaberekaga.
12 Yesu ababwira: “Muyinje muyukule.” Inta mwanafunzi n’omuguma wagwarhire obushiru b’okumubaza: “Woyo nde?” bulala balimenyere oku Waliha.
13 Yesu arhola omugati abahago, abaha n’efi.
14 Obola bobwaliri bwakasharhu Yesu arhengerera abanafunzi bage kurhenga afuka.
15 Bamalire kuyukula, Yesu abaza Simoni Petro: “Simoni mugala wa Yowane, onansima kulusha ezila fi si?” Petro amushubiza: “Nechi Waliha, oyinji oku nankusima.” Yesu amubwira: “Olise entama zani zidorho.”
16 Ashuba kumubwira obwakabiri: “Simoni mugala wa Yowane, onansima si?” Amushubiza: “Nechi Waliha, oyinji oku nankusima.” Yesu amubwira: “Oyabule entama zani zidorho.”
17 Amubaza obwakasharhu: “Simoni mugala wa Yowane, onansima si?” Petro ava agaya bulala amubazize obwakasharhu: “Onansima si?” Ava amubwira: “Waliha, oyinji ebintu byoshi; onamenyere oku nankusima.” Yesu amubwira: “Olise entama zani zidorho.
18 Kweri inkubwirire, amango walichiherhe entege, wagendaga wachiyambisa n’okuja ah’olonzeze. Aliko amango washaja nji warhega amaboko owindi muntu anakuyambisa n’okukuheka emunda orhalonzeze.”
19 Aderhaga ntyo omu kuyerekana lufu nyabachi Petro alikwanene kukuuza mu Mungu. Amalire kuderha ntyo, amubwira: “Ogenderere kunkulikira.”
20 Petro ahindamukire abona omwanafunzi Yesu agendaga azigira bwenene abakulikire, olala wayigamiraga Yesu omu chifuba amango m’ebilyo by’egolo n’okumubaza: “Waliha, inde wakulenganya?”
21 Petro amubwene, abaza Yesu: “Waliha, oyula mulume naye bichi nji byamuhikira?”
22 Yesu amushubiza: “Akaba indonzeze agenderere kubaho kugera amango nayinja, ebyola bikulolere si? Woyo genderera kunkulikira.”
23 Engani yayenera ku bene-berhu ok’oyola mwanafunzi arhakafa. Aliko, Yesu arhalimubwirire oku arhakafa, s’aliderhere: “Akaba indonzeze agenderere kubaho kugera amango nayinja, ebyola bikulolere si?”
24 Oyola mwanafunzi y’eli wahaana obula buhamirizi oku bilolere eyila myazi, ye wanayiyandikaga, rhunamenyere oku obuhamirizi bwage buli b’okuli.
25 Omu bukweri, hali bindi binene Yesu alijirire, omu kuntu nka byoshi byayandikwaga chiguma oku chindi, imbwazize oku egulu lyonyine lirhakayenere kw’ebitabu by’emizingo byakayandikirwe.
