Yayandikwaga na Yowane 19:1-42
19 Pilato ava afarha Yesu n’okumushurha enkoni.
2 Abasoda baluka echishema ch’emishaki bamuyambisacho omu rhwe, bamuyambisa n’akanzu k’erangi ly’omushonga,
3 bayinja bamuyegera n’okumubwira ntya: “Rhwalamusize, Mwami w’Abayahudi!” Banaliri bamulagasha ebigalo omu masu.
4 Pilato ashuba kuhuluka, ababwira: “Muyunve! Inkala kubalerheraye yi mumenya oku nta gosa nabwene agwerhe.”
5 Yesu ava ahuluka eyi bamuyambisize echishema ch’emishaki n’akanzu k’erangi ly’omushonga. Pilato ababwira: “Berhu we! Mulume oyula!”
6 Aliko, abakulu b’abadahwa n’abapolisi bamubwene ntya, barhondera kuderha n’omulenge gunene: “Amanikwe oku murhi! Amanikwe oku murhi!” Pilato ababwira: “Mumurhole mumumanike mwenyine bulala nyono nta gosa nabwene agwerhe.”
7 Abayahudi bamushubiza: “Rhugwerhe amarhegeko, n’omu kukulikiza amarhegeko akwanene afe bulala achijirire mugala wa Mungu.”
8 Pilato ayunvirhe ebi bali baderha ayubaha bwenene,
9 ashuba kuja omu nju abwira Yesu: “Oli wa ngahe?” Aliko ntacho Yesu amushubize.
10 Pilato amubwira: “Oli walahira kuganira nani, orhenji oku mperhe obuhashe b’okukulikula, imperhe n’obuhashe b’okukumanika oku murhi?”
11 Yesu amushubiza: “Nta buhashe wakangwarhireko chiro nk’orhabuhabwaga kurhenga enyanya. Che chirhumire omuntu wampiraga omu fune zawe ye gwerhe echaha chinene kulusha.”
12 Eju y’echola Pilato agenderera kulola okuntu akamulikula, aliko Abayahudi baderha ntya n’omulenge gunene: “Okalikula oyula muntu ey’orhali mwira wa Kayizari. Omuntu yeshi-yeshi wachijira mwami anaba ey’apingire Kayizari.”
13 Pilato amalire kuyunva ebyola binwa ahulusa Yesu, ayikala oku chichumbi ch’okuchira kw’emanja chaliri ahantu hanayirikwa Sima y’Ebale, aliko omu Chiebraniya banahayirika Gabata.
14 Lwaliri lusiku lw’amarheganyo me Pasaka; yanalikala eli hofi midi. Ava abwira Abayahudi: “Omwami wenyu oyula!”
15 Baderha ntya n’omulenge gunene: “Omuyirhe! Omuyirhe! Omumanike oku murhi!” Pilato ababwira: “Imanike omwami wenyu?” Abakulu b’abadahwa bamushubiza: “Intawindi mwami rhujira olekere Kayizari.”
16 Ava abahaye baje kumumanika oku murhi.
Bobola barhola Yesu bamuheka.
17 Yesu agenda ahekere omurhi gwage gw’amateso yenyine, bagana efasi eyirikwa Chihangasi, omu Chiebraniya k’okuderha: Golgota.
18 Bahikireyo bamumanika oku murhi, bamanika na bindi bishambo bibiri oku mirhi haguma naye; muguma ekulyo, owindi ekulembe na Yesu ahagarhi.
19 Pilato ayandika etangazo alihira k’ogola murhi gw’amateso. Lyaliderhere ntya: “Yesu we Nazareti Mwami w’Abayahudi.”
20 Bayahudi banene basoma elyola tangazo, bulala ahabalimanikire Yesu oku murhi haliri hofi n’omu vile, n’elyola tangazo lyaliyandikirwe omu Chiebraniya, omu Chilatini, n’omu Chigiriki.
21 Abakulu b’abadahwa b’Abayahudi babwira Pilato ntya: “Orhayandikaga ‘Mwami w’Abayahudi,’ s’oyandike oku aliderhere, ‘Indi Mwami w’Abayahudi.”
22 Pilato abashubiza: “Nayandikire nanayandikire.”
23 Abasoda bamalire kumanika Yesu oku murhi, barhola emyambaro yage y’enyanya bayigabamo kane, buli musoda arhola echage chigabi, barhola n’omwambaro gwage g’omu ndani. Aliko ogola mwambaro g’omu ndani gurhaliherhe musono si goshi gwalilukirwe kurhenga enyanya kugera eshishi.
24 Bava babwirana: “Rhurhaguberaga, si rhuguyeshere esimbi yi rhumenya gwaba gwa nde.” Byabaga ntyo omu kuyeneza olwandiko luderhere: “Bagabene emyambaro yani, n’okuyeshera omwambaro gwani esimbi.” Kweri intyo kon’oko kw’abasoda banalijirire.
25 Aliko Mariya nyina wa Yesu, mwene wabo nyina wa Yesu, Mariya muka Kleopasi na Mariya we Magdala baliyumangire hofi n’omurhi Yesu alimanikirweko.
26 Yesu abere abona nyina n’omwanafunzi agendaga azigira bwenene bayumangire ahola hofi, abwira nyina ntya: “Nyama, Tala mugala wawe!”
27 Abwira n’oyola mwanafunzi: “Tala nyoko!” Kurhangira agola mango, oyola mwanafunzi aheka nyina wa Yesu emwage.
28 Enyuma w’aho, omu kuba amenyere oku ebintu byoshi byayenere, Yesu aderha ntya: “Namayunva enyorha.” Aderhaga ntyo omu kuyeneza ebiderherwe omu mandiko.
29 Ahola haliri akabindi kayunjwire edivayi ekalirire bwenene. Bava barhola eshifo eshomere edivayi ekalirire, bayishwekera oku karhi k’ehisopo, bamuhirayo oku bunu.
30 Yesu amalire kuhonja kw’eyola divayi ekalirire, ayinamisa erhwe, arhenga m’omuka.
31 Bulala lwaliri lusiku lwa Marheganyo, omu kuntu eyola mibiri erhayorhaga oku mirhi y’amateso olusiku lwe Sabato, Abayahudi bahema Pilato bavunangule amagulu m’abola bantu n’okukula emibiri yabo oku murhi. (Bulala olola lwaliri lusiku lwe Sabato nkulu.)
32 Abasoda bava bayinja bavunanga amagulu ma bilala bishambo bibiri byalimanikirwe oku mirhi haguma na Yesu.
33 Aliko bagerere aha Yesu ali babugana mira afaga, barhachishibaga bavunanga amagulu mage.
34 Aliko muguma mw’abola basoda ashinga Yesu echumu omu lubavu, harhenga eshagama n’amenji ahola han’aho.
35 Owachiboneraga ebyola ye haanire obula buhamirizi, n’obuhamirizi bwage buli b’okuli, anamenyere oku eby’ali aderha bili by’okuli yi nenyu mugwarha obwemere.
36 Kweri byabaga ntyo, y’ebila binwa biyandikirwe omu mandiko biyenera: “Nta gufa lyage n’eliguma nji lyavunangwa.”
37 Olwindi lwandiko luderhere: “Nji balola olala bashingaga echumu.”
38 Enyuma w’ebyola byoshi, Yusufu we Arimateya waliri mwanafunzi wa Yesu aliko omu bwibisho eju y’okuyubaha Abayahudi, aja kubaza Pilato akaba akaheka omubiri gwa Yesu, Pilato amuha oruhusa. Ava agenda amanula ogola mubiri aguheka.
39 Nikodemu naye, olala wayinjaga kulola Yesu ebudufu mango maguma ntya, ayinja aherhe bilo hofi 30 by’amanemane machangirwe mw’echigembegembe.*
40 Barhola omubiri gwa Yesu baguzingira omu chiraka chikwirire ch’echinusi, bahira mu n’esyano y’ebirhi bihumwire bwinja omu kukulikiza emigenzo y’okuhamba y’Abayahudi.
41 Ahola bamumanikaga haliri hofi n’ebustani, na mw’eyola bustani mwaliri eshinda mpyahya barhaliza kuhamba m’omuntu.
42 Bulala lwaliri lusiku lwa Marheganyo, n’eshinda yaliri hofi n’ahola, baja kulyamikiza m’omubiri gwa Yesu.
Mahugulo m'efo
^ Yaliri siyano ehumwire bwinja yalikolwere n’ebirhi bayirika manemane na buko buguma bw’ebigembegembe.
