Yayandikwaga na Yowane 13:1-38
13 Bulala alimenyere embere w’olusiku lukulu lwe Pasaka oku akasanzi kage k’okurhenga mw’elila gulu n’okugaluka emw’Eshe kali hofi, Yesu abaga azigiire abali bage bali omu gulu, abazigira kugera oku buzinda.
2 Oku banali bagenderera kulya ebilyo by’egolo, Ibilisi abaga ajire omu murhima gwa Yuda Iskariyote mugala wa Simoni y’alenganya Yesu.
3 Bulala Yesu alimenyere oku Eshe ahirire ebintu byoshi omu fune zage, n’oku emwa Mungu y’arhengaga, n’emwa Mungu y’akala kugaluka,
4 oku banali balya ebilyo by’egolo, ayumanga ahira emyambaro yage y’enyanya eburhambi. Arhola esume achishwekerayo omu mankinya.
5 Enyuma w’aho, ahira amenji omu base arhondera kushuka abanafunzi bage amagulu, n’okumakaza n’esume abaga achishwekere omu mankinya.
6 Ahikire ku Simoni Petro, Petro amubaza: “Waliha, okala kunshuka amagulu si?”
7 Yesu amushubiza: “Eb’indi najira orhabiyunvirhe kw’enola sa, aliko wabiyunva buzinda.”
8 Petro amubwira: “Kweri orhakanshuka amagulu haba n’akatyu.” Yesu amushubiza: “Akaba ntakushukire amagulu, eyi ntacho rhuchishangirire nyono nawe.”
9 Simoni Petro amubwira: “Waliha, orhachinshukaga amagulu monyine, si onshuke n’amaboko n’erhwe.”
10 Yesu aderha: “Buli yeshi wayogere arhachikenere echindi olekere okushuka amagulu, bulala yeshi achere. Nenyu muchere, aliko arhali mweshi.”
11 Alimenyere omuntu walikala kumulenganya. Echola che charhumaga aderha: “Arhali mweshi mwe muchere.”
12 Amalire kubashuka amagulu, ayambala emyambaro yage y’enyanya, ashuba kuyikala oku meza, ababwira: “Aliko si, munayunvirhe bwinja ebi namabakolera?
13 Munampamagala ‘Mwalimu’ na ‘Waliha’ munaba eyi mwaderhere okuli bulala indi yewe.
14 Bobola, akaba nyono Waliha na Mwalimu nabashukire amagulu, nenyu mukwanene kushukana amagulu.
15 Bulala nabalekere olwiganyo, omu kuntu nenyu mujirirane nk’oku nabajirire.
16 Okuli kweri imbabwirire, omuja arhaba mukulu kulusha nahamwabo, n’eyi barhumaga arhaba mukulu kulusha owa murhumaga.
17 Bunola mwamaja mwayunva bwinja ebinabakolere. Aliko mwagwarha obusime mukabikola.
18 Intaderhere oku bibalolere mweshi; imenyere abanachishogere. Aliko byabere ntyo y’olula lwandiko luderhere ntya luyenera: ‘Owagendaga alya omugati gwani ampindamukire amaba mushombanyi wani.’
19 Kurhangirira bunola, namaba nababwira embere bibe, omu kuntu hanola biba mugwarhe obwemere oku nyono indi olala naderhere oku nye yewe.
20 Okuli kweri imbabwirire, buli yeshi wakaribisa eyinarhumire, eyi nani ankaribisize; na buli yeshi wankaribisa ey’akaribisize n’olala wantumaga.”
21 Amalire kuderha ebyola binwa, Yesu ayunva mulago gunene omu murhima, ahaana obula buhamirizi: “Okuli kweri imbabwirire, muguma mu mwabo andenganya.”
22 Abanafunzi barhondera kulolanako eyi bali bachibaza inde muguma ali aderha.
23 Muguma omu banafunzi, eyi Yesu agendaga asima bwenene, aliyikere haguma naye.
24 Bobola, Simoni Petro amusimira* amubwira: “Rhubwira inde ali aderha.”
25 Oyola mwanafunzi ayigamira omu chifuba cha Yesu n’okumubaza: “Waliha, inde oyola?”
26 Yesu ashubiza: “Eyi naha echichira ch’omugati indi navuvuliza omu bakuli.” Amalire kuvuvuliza echola chichira ch’omugati, achiha Yuda, mugala wa Simoni Iskariyote.
27 Yuda amalire kurhola echola chichira ch’omugati, Shetani ava aja omu murhima gwage. Naho Yesu amubwira: “Eby’oli walonza kujira obijire juba-juba.”
28 Aliko ntaye n’omuguma omu baliyikere oku meza walimenyere bulagurhe amubwirire ntyo.
29 Kweri, baguma baliwazize oku bulala Yuda ye wagendaga abika akasanduku k’efuranga, Yesu aliri amubwira agule ebi bakenere bakolesa oku lusiku lukulu, changwa oku ahe abakene chintu chilebe.
30 Bobola amalire kurhola echola chichira ch’omugati, ahuluka ahola han’aho. Bwalikala budufu.
31 Yuda amalire kugenda, Yesu aderha: “Bunola Mwen’omuntu amakuuzwa, na Mungu amakuuzwa kumugererako.
32 Mungu yenyine amukuuza, anamukuuza buzira kulegama.
33 Bana badorho, inchili haguma nenyu mu kasanzi kageke. Mwandonza; aliko nka kulala nabwiraga Abayahudi, nenyu ku namanababwira: ‘Emunda naja murhakagerayo.’
34 Namabaha erhegeko lihyahya, oku muzigirane; nka kulala nabazigiire nenyu muzigirane intyo kon’oko.
35 Ahola abantu boshi bamenya oku muli banafunzi bani; akaba muherhene k’obuzigire.”
36 Simoni Petro amubaza: “Waliha, ngahe waja?” Yesu amushubiza: “Emunda naja, orhakankulikirayo mu binola bisanzi, aliko nji wankulikira buzinda.”
37 Petro amubwira: “Waliha, bulagurhe intakakukulikira mu binola bisanzi? Indi tayari kufa eju yawe.”
38 Yesu amushubiza: “Oli tayari kufa eju yani? Okuli kweri inkubwirire, oluhazi lurhabika orhanaza kumpakana kasharhu.”
Mahugulo m'efo
^ Ao “amukema.”
