Yayandikwaga na Yowane 6:1-71
6 Enyuma waho, Yesu ayambukira oku lwindi lunda lw’enyanja ye Galilaya changwa ye Tiberiya.
2 Abantu kamama bagenderera kumukulikira bulala baliri babona ebisomerene aliri ajira omu kufumya abalwala.
3 Bobola Yesu azamukira oku musozi ayikalako haguma n’abanafunzi bage.
4 E Pasaka k’okuderha olusiku lukulu lw’Abayahudi lwaliri hofi kuba.
5 Yesu abere ayinamula amasu abona abantu kamama bayinjire emunda ali, abaza Filipo: “Ngahe rhwagulira emigati abala bantu boshi balya?”
6 Aliko Yesu aderhaga ntyo omu kumupima bulala aliyinji ebi yewe akala kujira.
7 Filipo amushubiza: “Chiro n’emigati ya dinari 200 erhakatosha yi buli muguma apata chiro ehichira.”
8 Muguma omu banafunzi bage oyirikwa Andreya mwene-wabo Simoni Petro, aderha ntya:
9 “Hanola hali ehyana hy’obusole higwerhe migati erhano y’eshayiri* na rhufi rhubiri. Aliko si, bichi byakamala kw’abala bantu boshi?”
10 Yesu aderha: “Mubwire abantu bayikale.” Bulala halimerere birhi binene, balume hofi 5 000 bayikala ahola.
11 Yesu arhola elala migati, amalire kusalira esala ly’okubwira Mungu koko, ayigabira abaliyikere ahola, ajira ntyo kon’okola kunarhulala rhufi, boshi balya nk’oku banalonzeze.
12 Bamalire kulya bayugurha, Yesu abwira abanafunzi bage ntya: “Mugushe ebichirachira byayorhere omu kuntu ntacho chifage busha.”
13 Babigusha haguma bayunjuza rhurhanda 12 rhwe bichirachira abalyaga elala migati erhano y’eshayiri basigazaga.
14 Abantu babere babona echola chisomerene ajiraga, barhondera kuderha: “Kweri oyula ye Mulebi walikwanene kuyinja omu gulu.”
15 Yesu abere amenya oku bali hofi kuyinja kumufarha yi bamujira mwami, arhenga ahola ashubira oku musozi yenyine.
16 Lyabere golo, abanafunzi bage bayandagalira oku mashinji,
17 baja omu bwarho bayerekeza e Kapernaumu. Bwabaga eyi bwayirire eyi na Yesu arhaza kubabugana.
18 N’enyanja yaliri m’omulaba eju y’echihusi chaliri chahusa.
19 Aliko babere bamavugama kugera nka ku bilometre birhano changwa ndarhu, babona Yesu ali alambagira oku menji yayegera obwarho, bayubaha bwenene.
20 Ababwira: “Nyono; murhayubahaga!”
21 Balilonzeze bamurhole aje omu bwarho haguma nabo, aliko obwarho bwava bwahika eshi emunda baliri baja.
22 Olusiku lwakulikiragaho, abantu bayorhaga oku lwindi lunda lw’enyanja babona oku ahola haliyorhere hyarho higuma hyonyine. Na Yesu arhalijire omu bwarho haguma n’abanafunzi bage si baligendere bonyine.
23 Chiro akaba ntyo, amarho marhengereraga e Tiberiya mahika hofi n’ahola baliraga emigati Yesu amala kujira esala ly’okuderha koko.
24 Abantu babere balangira oku Yesu n’abanafunzi bage barhachili ahola, bashubira omu marho mabo bayinja e Kapernaumu kulonza Yesu.
25 Babere bamubugana oku lwindi lunda lw’enyanja bamubaza: “Mwalimu, mangochi wahikaga hanola?”
26 Yesu abashubiza: “Okuli kweri imbabwirire, murhali mwandonza mpu bulala mwabwene ebisomerene, si bulala nji mwalyaga emigati mwayugurha.
27 Mukole akasi arhali yi mupata ebilyo byakaharibika, si mukole yi mupata ebilyo byayorhaho eju y’akalamo k’esiku n’amango, ebilyo Mwen’omuntu abaha bulala oyola yi Darha, Mungu yenyine ahebere kw’akashe kayerekene oku amuyemerere.”
28 Bamubaza: “Bichi rhukwanene kujira yi rhuyeneza ebi Mungu ahemere?”
29 Omu kubashubiza Yesu ababwira: “Ebi Mungu alonzeze mukole, kuli kugwarha obwemere omu muntu arhumaga.”
30 Nabo bamubwira: “Chisomerene chihe wajira, rhuchibone yi rhukuyemera? Kasi kahe wajira?
31 Bashokuliza berhu balilire amana mw’elila rungu nka kulala binayandikirwe: ‘Alibahere omugati g’okulya gurhengere embingu.”
32 Naho Yesu ababwira: “Okuli kweri mbabwirire, Musa arhabahaga omugati gurhengere embingu, aliko Darha ali abaha omugati g’okuli gurhengere embingu.
33 Bulala omugati gwa Mungu ali olala wayandagere kurhenga embingu n’okuha egulu akalamo.”
34 Bava bamubwira: “Waliha, ogenderere kurhuha ogola mugati.”
35 Yesu ababwira: “Nyono nye mugati gw’akalamo. Buli yeshi wayinja emunda ndi, arhakachiyunva enzara haba n’akatyu na buli yeshi wayerekana obwemere mu nyono arhakachiyunva enyorha haba n’akatyu.
36 Aliko nk’okunanababwiraga, chiro akaba oku mwambwene murhaza kungwarha m’obwemere.
37 Boshi Darha ampere bayinja emunda ndi, intakanafa nafukwize owayinjire emunda ndi,
38 bulala narhengaga embingu arhali yi nkola obulonza bwani si yi nkola obulonza b’olala wantumaga.
39 Bulala obula b’obulonza b’olala wantumaga; oku ntakwanene kuheza chiro n’omuguma mu balala ampere s’inkwanene kubafula oku lusiku luzinda.
40 Bulala obula b’obulonza bwa Darha, oku buli yeshi warhegera Omugala n’okuyerekana obwemere muye, apate akalamo k’esiku n’amango n’oku lusiku luzinda nji namufula.”
41 Abayahudi bava barhondera kumulundumira bulala aderhere: “Nyono nye mugati gwayandagalaga kurhenga embingu.”
42 Barhondera kuderha: “Oyula arhali Yesu mugala wa Yosefu rhumenyere eshe na nyina? Gurhe akaja aderha mpu ‘Nayandagalaga kurhenga embingu’?”
43 Yesu abashubiza ntya: “Muleke okulunduma.
44 Inta muntu wakayinja emunda indi nka Darha wantumaga arhamulerhere n’oku lusiku luzinda, nji namufula.
45 Biyandikirwe ntya omu Balebi: ‘Boshi nji bayigirizwa na Yehova.’ Buli yeshi wayunvirize Darha n’okuyiga, anayinja emunda ndi.
46 Inta muntu wachigerere kubona Darha olekere owarhengaga emwa Mungu, y’oyola yiwabwene Darha.
47 Okuli kweri mbabwirire, buli yeshi ogwerhe obwemere agwerhe akalamo k’esiku n’amango.
48 “Nyono nye mugati gw’akalamo.
49 Bashokuliza benyu balilire amana omu rungu aliko bafire.
50 Gunola g’omugati gurhengere embingu omu kuntu buli yeshi wagulyako arhafaga.
51 Nyono nye mugati gulamire gwayandagalaga kurhenga embingu. Nk’omuntu yeshi-yeshi alire k’ogula mugati alama esiku n’amango. Kweri omugati nahana, guli mubiri gwani y’egulu lipata akalamo.”
52 Abayahudi barhondera kujira obuhaka bonyine ku bonyine eyi bali baderha: “Gurhe oyula muntu akarhuha omubiri gwage oku rhugulye?”
53 Yesu ava ababwira: “Okuli kweri imbabwirire, nka murhalire omubiri gwa Mwen’omuntu n’okunywa eshagama yage nta kalamo mugwerhe.
54 Buli muntu walya omubiri gwani n’okunywa eshagama yani, agwerhe akalamo k’esiku n’amango n’oku lusiku luzinda nji namufula;
55 bulala omubiri gwani bili bilyo by’okuli n’eshagama yani chiri chintu ch’okunywa ch’okuli.
56 Buli yeshi walya omubiri gwani n’okunywa eshagama yani ayorha omu buguma nani, nani nayorha omu buguma naye.
57 Nka kulala Darha olamire antumaga nani ndamire eju ya Darha, intyo kon’okola, owandyako alama eju yani.
58 Gunola g’omugati gwayandagalaga kurhenga embingu. Gurhali nka gulala bashokuliza benyu balyaga banafa. Buli yeshi walya ku gunola mugati alama esiku n’amango.”
59 Aderhaga ebyola byoshi ey’ali ayigiriza omu sinagogi e Kapernaumu.
60 Banene omu banafunzi bage bayunvirhe ebyola byoshi baderha ntya: “Eyila myazi elumire oku murhima; inde wakayiyunviriza?”
61 Aliko omu kuba amenyere oku abanafunzi bage baliri balunduma eju y’ebyaderhere, Yesu ababaza: “Ebi naderhere byabakwazize si?
62 Akaba ntyo ku bili, gurhe byakaja byaba mukala mwabona Mwen’omuntu azamuka n’okugaluka emunda aliri burhanzi?
63 Eroho lye linahaana akalamo, omubiri ntacho gumalire. Ebinwa naderhere bili by’eroho kanali kalamo.
64 Aliko hali baguma mu bwabo barhayemerere ebi naderhere.” Bulala Yesu alimenyere kurhangirira oku murhondero abarhaliyemerere ebyaderhere, alimenyere n’owakamulenganyize.
65 Agenderera kuderha: “Echola che charhumaga nababwira oku nta muntu wakayinja emunda indi nka Darha arhamuhere orozo.”
66 Eju y’echola banene omu banafunzi bage bagaluka enyuma, barhachilonzaga kugenda naye.
67 Bobola Yesu abwira balala 12 ntya: “Nenyu mulonzeze mugende?”
68 Simoni Petro amushubiza: “Waliha, emwa nde rhwakaja? Weherhe ebinwa by’akalamo k’esiku n’amango.
69 Rhwamalire kuchizera rhwanamenyere ok’oli Muchesibwa wa Mungu.”
70 Yesu abashubiza: “Nachishogaga mwabo 12, arhali ntyo? Aliko muguma mu mwabo ali muntu w’okukomerana.”*
71 Omu bukweri, aliri aderha eju ya Yuda mugala wa Simoni Iskariyoti, bulala yi wakamulenganyize chiro akaba oku aliri mu balala 12.
