Esdras 8:1-36
8 Artaxerxesen erregealdian zehar, hau da nirekin batera Babiloniatik etorri zirenen familietako buruen erregistro genealogikoa:
2 Finehasen semeetatik*: Gerxom; Itamarren semeetatik: Daniel; Dabiden semeetatik: Hatux;
3 Xekaniasen semeetatik, bai, Paroxen semeetatik: Zakarias, eta berarekin batera erregistratutako 150 gizon;
4 Pahat-Moaben semeetatik: Elieho-Enai —Zerahiasen semea—, eta berarekin batera 200 gizon;
5 Zaturen semeetatik: Xekanias —Jahazielen semea—, eta berarekin batera 300 gizon;
6 Adinen semeetatik: Ebed —Jonatanen semea—, eta berarekin batera 50 gizon;
7 Elamen semeetatik: Jexaia —Ataliaren semea—, eta berarekin batera 70 gizon;
8 Xefatiasen semeetatik: Zebadias —Mikelen semea—, eta berarekin batera 80 gizon;
9 Joaben semeetatik: Abdias —Jehielen semea—, eta berarekin batera 218 gizon;
10 Baniren semeetatik: Xelomit —Josifiasen semea—, eta berarekin batera 160 gizon;
11 Bebairen semeetatik: Zakarias —Bebairen semea—, eta berarekin batera 28 gizon;
12 Azgaden semeetatik: Johanan —Hakatanen semea—, eta berarekin batera 110 gizon;
13 hauek izan ziren Adonikamen semeetatik itzuli ziren azkenak: Elifelet, Jeiel eta Xemaia, eta beraiekin batera 60 gizon;
14 eta Bigbairen semeetatik: Utai eta Zabbud, eta beraiekin batera 70 gizon.
15 Ahabara iristen den ibaiaren ondoan bildu nituen, eta bertan hiru egunez akanpatu genuen. Baina kanpalekua aztertzen nenbilela, herriko jendearen eta apaizen artean ez nuen lebitarrik aurkitu.
16 Orduan, buruzagi hauek bildu nituen: Eliezer, Ariel, Xemaia, Elnatan, Jarib, Elnatan, Natan, Zakarias eta Mexulam. Joiarib eta Elnatan irakasleak ere bildu nituen.
17 Gero, Idorekin —Kasifiako buruzagiarekin— hitz egitera joateko agindu nien, eta Idori eta bere anaiei —Kasifian zeuden tenpluko zerbitzariei*— honakoa eskatzeko esan nien: zerbitzariak bidaltzeko gure Jainkoaren etxerako.
18 Jainkoa gurekin zegoenez, gizon zentzudun bat bidali ziguten: Xerebias, Mahliren semeetakoa —Mahli Lebiren biloba zen eta Lebi Israelen semea—. Berarekin batera bere semeak eta bere anaiak bidali zituzten; guztira 18 gizon.
19 Haxabias ere bidali zuten, eta berarekin batera Jexaia —merariar bat—, bere anaiak eta beraien semeak; guztira 20 gizon.
20 Eta tenpluko zerbitzariak —hain zuzen ere, Dabidek eta printzeek lebitarrei laguntzeko eman zituztenak— 220 izan ziren. Guztien izenak erregistro liburuan idatzi ziren.
21 Orduan, hantxe, Ahaba ibai ondoan, barau egiteko agindu nuen, gure Jainkoaren aurrean geure burua apaltzeko eta bidaiarako bere gida eskatzeko eta gu, geure seme-alabak eta geure ondasun guztiak babesteko.
22 Izan ere, lotsa ematen zidan erregeari soldaduak eta zaldunak eskatzeak bidean aurkituko genituen etsaiengandik babesteko, zeren erregeari esan genion: «Gure Jainkoa* bere bila dabiltzanen ondoan dago, baina bere indarra eta haserrea bera abandonatzen dutenen kontra dago».
23 Beraz, barau egin genuen eta Jainkoari laguntza eskatu genion, eta berak gure erreguak entzun zituen.
24 Gero, apaizen buruzagietatik 12 aukeratu nituen: Xerebias, Haxabias eta beraien anaietako hamar.
25 Ondoren, beraien aurrean, gure Jainkoaren etxerako dohaintzan emandako urrea, zilarra eta tresnak pisatu nituen, hain zuzen ere, erregeak, bere aholkulariek, bere printzeek eta bertan zeuden israeldar guztiek emandakoak.
26 Pisatu ondoren, hau izan zen beraien esku utzi nuena: 22.230 kilo* zilar, guztira 68 kilo* pisatzen zituzten zilarrezko 100 tresna, 3.420 kilo* urre,
27 urrezko 20 ontzi txiki —1.000 urrezko txanpon* balio zituztenak—, eta kalitate oneko kobrez —kobre gorri distiratsuz— egindako 2 tresna, urrea bezain baliotsuak.
28 Orduan, esan nien: «Zuek santuak zarete Jehobarentzat, eta tresna hauek santuak dira, eta urrea eta zilarra eskaintza boluntarioak dira Jehobarentzat, zuen arbasoen Jainkoarentzat.
29 Beraz, gorde itzazue ondo Jerusalemera iritsi arte. Bertan, Jehobaren etxeko geletan*, hauen aurrean pisatu behar dituzue: apaizen eta lebitarren buruzagien aurrean, eta Israelgo familietako printzeen aurrean».
30 Eta apaizek eta lebitarrek hartu egin zituzten pisatutako urrea, zilarra eta tresnak Jerusalemera, gure Jainkoaren etxera, eramateko.
31 Azkenik, lehen hilabeteko 12. egunean, Ahaba ibaitik Jerusalemera abiatu ginen. Jainkoa gurekin zegoen, eta etsaiengandik eta bidelapurrengandik babestu gintuen.
32 Beraz, Jerusalemera iritsi ginen, eta hiru egun pasa genituen han.
33 Eta laugarren egunean, urrea, zilarra eta tresnak pisatu genituen gure Jainkoaren etxean, eta Meremot apaizaren —Uriaren semearen— esku utzi genituen. Berarekin batera zeuden Eleazar —Finehasen semea—, Jozabad lebitarra —Jexuaren semea— eta Noadias lebitarra —Binuiren semea—.
34 Dena zenbatu eta pisatu zuten, eta pisu guztia erregistratu egin zuten.
35 Desterrutik etorri zirenak, hau da, gatibu izan zirenak, erre sakrifizioak egin zizkioten Israelgo Jainkoari: 12 zezen Israel osoaren alde, 96 ahari, 77 bildots eta, bekatu eskaintza bezala, 12 aker. Hau guztia eskaini zitzaion Jehobari erre eskaintza bezala.
36 Orduan, erregearen aginduak eman genizkien erregearen satrapei* eta Eufrates ibaiaren mendebaldeko* lurraldeko gobernariei, eta beraiek herriari lagundu zioten eta benetako Jainkoaren etxerako behar zena eman zuten.
Oharra
^ Kapitulu honetan «seme» hitzak «ondorengo» ere esan nahi dezake.
^ Edo «netineoei». Lit. «emanak zirenei».
^ Lit. «Gure Jainkoaren eskua».
^ Lit. «650 talentu». Ikusi B14 eransk.
^ Lit. «talentuak», seguruenik 2 talentu esan nahi du. Ikusi B14 eransk.
^ Lit. «100 talentu». Ikusi B14 eransk.
^ Lit. «dariko». Darikoa urrezko txanpon persiarra zen. Ikusi B14 eransk.
^ Edo «jantokietan».
^ Titulu honek «erreinuaren babesle» esan nahi du. Hemen Persiako Inperioaren probintzietako gobernariei egiten die erreferentzia.
^ Edo «eta Eufrates ibaiaren bestaldeko», «eta Ibaiaren Haratagoko».
