Setting sa pag-access

Pagpilig pinulongan

Laktaw ngadto sa secondary menu

Laktaw ngadto sa video

Mga Saksi ni Jehova

Cebuano

Gipugos ba sa mga Saksi ni Jehova ang mga Tawo nga Mobalhin ug Relihiyon?

Gipugos ba sa mga Saksi ni Jehova ang mga Tawo nga Mobalhin ug Relihiyon?

Wala. Sumala sa giingon namo diha sa among pangunang magasin nga Ang Bantayanang Torre: “Sayop ang pagpugos sa mga tawo sa pag-usab sa ilang relihiyon.” * Dili mi mamugos sa mga tawo tungod niini nga mga rason:

  • Wala pugsa ni Jesus ang mga tawo nga modawat sa iyang mga gipanudlo. Nahibalo siya nga diyutay lang ang mosanong sa iyang mensahe. (Mateo 7:13, 14) Dihang ang pipila niya ka tinun-an wala makaangay sa iyang gipanulti ug namiya, wala siya mamugos nga sila magpabilin.—Juan 6:60-62, 66-68.

  • Gitudloan ni Jesus ang iyang mga sumusunod nga dili pugson ang uban nga talikdan ang ilang pagtuo. Imbes pugson ang mga tawo sa pagdawat sa maayong balita sa Gingharian, ang iyang mga tinun-an mangitag mga mamiminaw nga madinawaton.—Mateo 10:7, 11-14.

  • Ang pinugos nga pagpakombertir walay kapuslanan, kay dawaton lang sa Diyos ang pagsimba kon kana kinasingkasing.—Deuteronomio 6:4, 5; Mateo 22:37, 38.

Nangabig ba mi?

Tinuod nga among gipahibalo ang mensahe sa Bibliya “hangtod sa kinalay-ang dapit sa yuta,” ug naghimo niana “sa publiko ug sa balay ug balay,” sumala sa gisugo sa Bibliya. (Buhat 1:8; 10:42; 20:20) Ug sama sa unang mga Kristohanon, akusahan mi usahay nga ilegal nga nangabig. (Buhat 18:12, 13) Pero, dili tinuod ang maong mga akusasyon. Wala namo ipamugos kang bisan kinsa ang among pagtuo. Hinunoa, gituohan namo nga ang mga tawo kinahanglang mokuhag kahibalo aron sila makahimog maalamong pagpili.

Dili mi mamugos sa mga tawo nga mobalhin ug relihiyon. Dili pod mi moapil ug politika sa ngalan sa relihiyon, o manghatag ug materyal nga tabang o motanyag ug mga benepisyo para makadanig bag-ong mga membro. Dili mi pareho sa uban nga nangangkong Kristohanon pero nagpasipala kang Kristo kay gihimo nila kining mga butanga. *

Duna bay katungod ang tawo nga mobalhin ug relihiyon?

Gibiyaan sa propeta nga si Abraham ang relihiyon sa iyang mga paryente

Oo, gipakita sa Bibliya nga ang mga tawo dunay katungod nga mobalhin ug relihiyon. Naghisgot nig daghang tawo nga wala mosunod sa relihiyon sa ilang mga paryente, ug kinsa misimba sa matuod nga Diyos sumala sa ilang kaugalingong kagustohan. Ang pipila ka pananglitan mao si Abraham, Ruth, ang ubang mga tawo sa Atenas, ug si apostol Pablo. (Josue 24:2; Ruth 1:14-16; Buhat 17:22, 30-34; Galacia 1:14, 23) Gani, giila sab sa Bibliya bisan ang katungod sa tawo nga mohimog sayop nga desisyon nga mobiya sa pagsimbang giuyonan sa Diyos.—1 Juan 2:19.

Gisuportahan sa Universal Declaration of Human Rights ang katungod sa pagbalhin ug relihiyon, nga gitawag sa United Nations ingong “pundasyon sa tibuok kalibotang balaod sa katungod sa tawo.” Kana nag-ingon nga ang tanan may “kagawasan sa pagbalhin ug relihiyon o tinuohan” ug “sa pagpangita, pagdawat ug pagpaambit ug mga impormasyon ug ideya,” lakip na sa mga pagtulon-an sa relihiyon. * Siyempre, lakip niini nga mga katungod ang obligasyon usab nga tahoron ang mga katungod sa uban nga magpabilin sa ilang mga tinuohan ug isalikway ang mga ideya nga wala nila uyoni.

Ang pagbalhin bag relihiyon nagpakita nga ang usa wala magtahod sa tradisyon o kostumbre sa iyang pamilya?

Dili sa ingon niana. Ang Bibliya nagdasig nga tahoron ang tanan, bisag unsa pay ilang relihiyon. (1 Pedro 2:17) Dugang pa, gisunod sa mga Saksi ni Jehova ang sugo sa Bibliya nga pasidunggan ang ilang ginikanan, bisan pag lahi silag mga tinuohan.—Efeso 6:2, 3.

Pero, dili mouyon ang tanan sa panglantaw sa Bibliya. Matod sa usa ka babaye nga nagdako sa Zambia: “Sa among komunidad, ang pagbalhin ug relihiyon ... giisip nga pagluib sa pamilya ug sa komunidad.” Nasugamak siya niining isyuha dihang nagtuon siyag Bibliya uban sa mga Saksi ni Jehova sa tin-edyer pa siya ug dayon midesidir nga mobalhin ug relihiyon. Siya miingon: “Balikbalik kong giingnan sa akong ginikanan nga naglagot kaayo sila nako ug nga gipakyas nako sila. Nalisdan gyod ko niini kay importante kaayo nako ang ilang pag-uyon. ... Ang pagpabiling maunongon kang Jehova imbes sa mga tradisyon sa relihiyon wala magpasabot nga nagluib ko sa akong pamilya.” *

^ par. 2 Tan-awa ang Enero 1, 2002 nga gula sa Ang Bantayanang Torre, panid 12, parapo 15.

^ par. 8 Pananglitan, gimando ni Carlomagno sa mga tuig 785 C.E. nga patyon ang mga taga-Saxony nga wala magpabawtismo ingong Kristohanon. Giingon usab sa Peace of Augsburg, nga gipirmahan niadtong 1555 C.E. sa naggubatay nga mga grupo didto sa Balaang Imperyo sa Roma, nga ang matag magmamando sa usa ka lugar kinahanglang Romano Katoliko o kaha Lutherano ug nga ang tanan niyang sakop kinahanglang moanib sa iyang relihiyon. Papahawaon kadtong dili moanib sa relihiyon sa ilang magmamando.

^ par. 11 May susamang mga katungod sab diha sa African Charter on Human and Peoples’ Rights, sa American Declaration of the Rights and Duties of Man, sa 2004 Arab Charter on Human Rights, sa ASEAN (Association of Southeast Asian Nations) Human Rights Declaration, sa European Convention on Human Rights, ug sa International Covenant on Civil and Political Rights. Apan, bisan ang mga nasod nga nanaad sa pagtagana niana nga mga katungod managlahi sa ilang aktuwal nga pagpatuman sa paghatag sa maong mga katungod.

^ par. 14 Jehova ang ngalan sa matuod nga Diyos sumala sa Bibliya.

Pagkat-og Dugang

Ang mga Saksi ni Jehova ba Namungkag ug mga Pamilya o Nagpalig-on Niini?

Ang mga Saksi ni Jehova usahay akusahan nga mamungkag ug pamilya. Pero mga Saksi ba gyod ang hinungdan niana?

Unsa ang Maayong Balita Bahin sa Relihiyon?

Moabot kaha ang panahon dihang ang tanan mahiusa sa pagsimba sa bugtong matuod nga Diyos?